کلیات غزلیات ولی

ولی دکنی کے نام سے کون واقف نہیں۔ وہ اردو کے پہلے ایسے شاعر ہیں، جن کی زبان اور اسلوب نے اردو غزل کے ابتدائی نقوش پر زبردست اثر ڈالا۔ولی کی غزلیں، جب ان کے دیوان کے ساتھ دہلی پہنچیں تو لوگ گلیوں میں اسے گاتے پھرے، شاعروں نے اس کے طرز میں طبع آزمائی کی اور اس طرح تتبع کا ایک طویل سلسلہ شروع ہوا، جس کو اس وقت کے مشہور شاعر اور پیشے سے داروغہ مطبخ شیخ ظہور الدین حاتم نے بھی اپنایا اور ایک پورا دیوان، اسی طرز میں لکھا۔ دیوان ولی میں موجود ولی دکنی کی ان غزلیات کے بارے میں کہا جاتار ہا ہے کہ انہیں یہ مضامین ان کے ایک بزرگ یا پیر سعدا اللہ گلشن نے سجھائے تھے، لیکن میں نے اپنے ایک مضمون 'دکنی غزل کا جائزہ(ولی اور اس سے پیشتر دکنی شاعری کے حوالے سے)میں اس پر تحقیقی نقطہ نظر سے بات کرنے کی کوشش کی ہے، میرے خیال میں یہ بات نہ صرف نادرست ہے بلکہ گمراہ کن ہے۔بہرحال یہ ایک طویل اور بحث طلب موضوع ہے۔ہم آج آپ کے لیے یہاں 'کلیات غزلیات ولی' لے کر حاضر ہوئے ہیں۔ دہلی کی غزل پر جتنا اثر فائز نے نہیں ڈالا، اتنا ولی نے ثبت کیا ہے۔اب ولی کی تمام غزلیات یونی کوڈ میں موجود ہیں اور آپ انہیں کہیں سے بھی پڑھ سکتے ہیں۔ شکریہ(تصنیف حیدر)

ردیف ’الف‘

1

کیتا ہوں ترے نانوں کو میں ورد زباں کا

کیتا ہوں ترے شکر کو عنوان بیاں کا

جس گرد اُپر پانوں رکھیں تیرے رسولاں

اُس گرد کوں میں کحل کروں دیدۂ جاں کا

مجھ صدق طرف عدل سوں اے اہلِ حیا دیکھ

تجھ علم کے چہرے پہ نئیں رنگ گماں کا

ہر ذرۂ عالم میں ہے خورشید حقیقی

یوں بوجھ کے بلبل ہوں ہر اک غنچہ دہاں کا

کیا سہم ہے آفات قیامت ستی اُس کوں

کھایا ہے جوکُئی تیر تجھ ابرو کی کماں کا

جاری ہوئے آنجھو مرے یو سبزۂ خط دیکھ

اے خضر قدم! سیر کر اس آبِ رواں کا

کہتا ہے ولیؔ دل ستی یوں مصرع رنگیں

ہے یاد تری مجھ کوں سبب راحتِ جاں کا

2

وو صنم جب سوں بسا دیدۂ حیران میں آ

آتش عشق پڑی عقل کے سامان میں آ

ناز دیتا نئیں گر رخصتِ گل گشت چمن

اے چمن زار حیا دل کے گلستان میں آ

عیش ہے عیش کہ اس مہ کا خیال روشن

شمع روشن کیا مجھ دل کے شبستان میں آ

یاد آتا ہے مجھے جب وو گل باغ وفا

اشک کرتے ہیں مکاں گوشۂ دامان میں آ

موج بے تابیِ دل اشک میں ہوئی جلوہ نما

جب بسی زلف صنم طبع پریشان میں آ

نالہ و آہ کی تفصیل نہ پوچھو مجھ سوں

دفتر درد بسا عشق کے دیوان میں آ

پنجۂ عشق نے بے تاب کیا جب سوں مجھے

چاک دل تب سوں بسا چاک گریبان میں آ

دیکھ اے اہلِ نظر سبزۂ خط میں لب لعل

رنگ یاقوت چھپا ہے خطِ ریحان میں آ

حسن تھا پردۂ تجرید میں سب سوں آزاد

طالب عشق ہوا صورت انسان میں آ

شیخ یاں بات تری پیش نہ جاوے ہرگز

عقل کوں چھوڑ کے مت مجلس رندان میں آ

دردمنداں کو بجز درد نئیں صید مراد

اے شہ ملک جنوں غم کے بیابان میں آ

حاکم وقت ہے تجھ گھر میں رقیب بدخو

دیو مختار ہوا ملک سلیمان میں آ

چشمۂ آب بقا جگ میں کیا ہے حاصل

یوسف حسن ترے چاہِ زنخدان میں آ

جگ کے خوباں کا نمک ہوکے نمک پروردہ

چھپ رہا آکے ترے لب کے نمکدان میں آ

بسکہ مجھ حال سوں ہمسر ہے پریشانی میں

درد کہتی ہے مرا زلف ترے کان میں آ

غم سوں تیرے ہے ترحم کا محل حال ولیؔ

ظلم کو چھوڑ سجن شیوۂ احسان میں آ

3

اے گل عذار غنچہ دہن ٹک چمن میں آ

گل سر پہ رکھ کے شمع نمن انجمن میں آ

جیوں طفل اشک بھاگ نکو مجھ نظر ستی

اے نور چشم نور نمط مجھ نین میں آ

کب لگ اپس کے غنچۂ مکھ کو رکھے گا بند

اے نو بہار باغ محبت سخن میں آ

تا گل کے رو سے رنگ اڑے اوس کی نمن

اے آفتابِ حسن ٹک یک تو چمن میں آ

تجھ عشق سوں کیا ولیؔ دل کوں بیت غم

سرعت ستی اے معنیِ بے گانہ من میں آ

4

وو نازنیں ادا میں اعجاز ہے سراپا

خوبی میں گل رخاں سوں ممتاز ہے سراپا

اے شوخ تجھ نین میں دیکھا نگاہ کر کر

عاشق کے مارنے کا انداز ہے سراپا

جگ کے ادا شناساں ہے جن کی فکر عالی

تجھ قد کوں دیکھ بولے یو ناز ہے سراپا

کیوں ہوسکیں جگت کے دلبر ترے برابر

تو حسن ہور ادا میں اعجاز ہے سراپا

گاہے اے عیسوی دم یک بات لطف سوں کر

جاں بخش مجھ کو تیرا آواز ہے سراپا

مجھ پر ولیؔ ہمیشہ دل دار مہرباں ہے

ہر چند حسب ظاہر طناّز ہے سراپا

5

کتاب الحسن کا یہ مکھ صفا تیرا صفا دستا

ترے ابرو کے وو مصرع سوں اس کا ابتدا دستا

ترا مکھ حسن کا دریا و موجاں چین پیشانی

اُپر ابرو کی کشتی کے یوں تل جیوں ناخدا دستا

ترے لب ہیں بہ رنگ حوض کوثر مخزن خوبی

یہ خال عنبریں تس پر بلال آسا کھڑا دستا

اشاراتِ آنکھیاں سوں گرچہ ہوں بیمار میں لیکن

ترے لب اے مسیح وقت قانون شفا دستا

ہوا جو گوہر دل غرق بحر حسن، ہے نایاب

زبس دریائے حسنِ دلبراں بے انتہا دستا

بیاں اس کی نزاکت ہور لطافت کا لکھوں تاکے

سراپا محشر خوبی منیں ناز و ادا دستا

یو خط کا حاشیہ گرچہ ولیؔ ہے مختصر لیکن

مطوّل کے معانی کا تمامی مدّعا دستا

6

تو آج ہے سینہ شاد دستا

مطلب ہے کہ با مراد دستا

تجھ مکھ کے صفے پہ نقطۂ خال

سرمایۂ ہر مِداد دستا

ہر نسخہ لذّت جہاں کا

انکھیاں میں تری سواد دستا

ابرو کے نزک یہ خال موزوں

خوش مصرعۂ مستزاد دستا

تیری یہ جبین با صباحت

مجھ جلوۂ با مداد دستا

تجھ نین کی کیا کروں میں تعریف

یہ عین ثُلُث کا صاد دستا

مجھ پر ولیؔ ہمیشہ دل دار مہرباں ہے

ہر چند حسب ظاہر طناّز ہے سراپا

7

یو تل تجھ مکھ کے کعبہ میں مجھے اسود حجر دستا

زنخداں میں ترے مجھ چاہ زمزم کا اثر دستا

پریشاں سامری کا دل تری زلف طلسمی میں

زمرد رنگ یوتل مجھ کوں سحر باختر دستا

مرا دل چاند ہور تیری نگہ اعجاز کی اُنگلی

کہ جس کی یک اشارت میں مجھے شق القمر دستا

نین ویول میں پتلی یو ہے یا کعبہ میں اسود ہے

ہرن کا ہے یو نافہ یا کنول بھیتر بھنور دستا

ولیؔ شیرینی زبانی کی نئیں ہے چاشنی سب کو

حلاوت فہم کو میرا سخن شہد و شکر دستا

8

طاق ابرو ترا حرم دستا

محرم اس کا عرب عجم دستا

خط ترا سر نوشت عاشق میں

حرف تقدیر کا رقم دستا

خط ترا آئینہ سکندر ہے

ہر دو عالم منیں عدم دستا

لوح محفوظ ہے ترا رخسار

زلف اس پر مگر قلم دستا

تجھ زنخداں کے چاہ کنعاں میں

یوسفِ مصر دم بہ دم دستا

خط ترا ہے ضرور لشکر حسن

کاکل اُس کے اُپر علم دستا

جان من غصّہ و غضب تاکے

ولیؔ مشتاق پر کرم دستا

9

مت آتش غفلت سوں مرے دل کوں جلا جا

مشتاق دَرَس کا ہوں ٹک یک دَرَس دکھا جا

بے رحم نہ ہو، غصّہ نہ کر، بات مری سُن

ڈرتا نئیں، یک بات کی سو بات سُنا جا

جلتا ہوں میں مدّت ستی اے حسن کے دریا

ٹک مکھ کوں دکھا، آگ مرے دل کی بجھا جا

خواہش ہے مجھے وِرد کے پڑھنے کی ہمیشہ

یک بار کسو طرز سوں ٹک اسم بتا جا

جب اس کی طرف جاتا ہوں کر قصد تماشا

کہتا ہے مجھے خوف رقیباں سوں کہ جا جا

میں بوسہ کیا لب سوں پری رو کے طلب جیوں

غصّے ستی بولیا کہ چلا جا بے چلا جا

مدت سوں ولیؔ جھانج میں ہے ہات سوں دل کے

تو بھی اے جگر آہ کی نوبت کوں بجا جا

10

تن پیس سرمہ کر کے بسا تجھ نین میں جا

ہو بوئے گل بسا ہوں ترے پیرہن میں جا

ہر تار میں زُلف کی تری سیر جا کروں

باد صبا کا ساتھ لیا ہوں چمن میں جا

آتش نے تجھ جمال کے جلوے کوں دیکھ کر

کیتی ہے زندگی کوں اپس کی کفن میں جا

جگ میں جو اعتبار نہ پایا ترے نزیک

ہوکر خجل سُرج نے لیا ہے گگن میں جا

مانند خوں عقیق، ولیؔ گل کے بہہ چلے

شہرت مرے انجھوں کی پڑے جب یمن میں جا

11

مت غصّے کے شعلے سوں جلتے کوں جلاتی جا

ٹک مہر کے پانی سوں تو آگ بجھاتی جا

تجھ چال کی قیمت سوں دل نئیں ہے مرا واقف

اے مان بھر چنچل ٹک بھاؤ بتاتی جا

اس رات اندھاری میں مت بھول پڑوں تجھ سوں

ٹک پاؤں کے جھانجھر کی جھنکار سناتی جا

مجھ دل کے کبوتر کوں باندھا ہے تری لٹ نے

یہ کام دھرم کا ہے ٹک اس کو چھڑاتی جا

تجھ مکھ کی پرستش میں گئی عمر مری ساری

اے بت کی پُجن ہاری ٹک اس کو پُجاتی جا

تجھ عشق میں جل جل کر سب تن کوں کیا کاجل

یہ روشنی افزا ہے انکھیاں کو لگاتی جا

تجھ نیہہ میں دل جل جل جوگی کی لیا صورت

یک بار اسے موہن چھاتی سوں لگاتی جا

تجھ گھر کی طرف سُندر آتا ہے ولیؔ دایم

مشتاق دَرَس کا ہے ٹک دَرَس دکھاتی جا

12

دل رُبا آیا نظر میں آج میری خوش ادا

خوش ادا ایسا نئیں دیکھا ہوں دوجا دلربا

بے وفا گر تجھ کوں بولوں ہے بجا اے نازنین

نازنین عالم منیں ہوتے ہیں اکثر بے وفا

کم نما ہے نوجواں میرا بہ رنگ ماہ نو

ماہ نو ہوتا ہے اکثر اے عزیزاں کم نما

مدعائے عاشقاں ہر آن ہے دیدار یار

یار کے دیدار بن دوجا عبث ہے مدّعا

کیمیا عاشق کے حق میں ہے نگاہ گل رُخاں

گل رخاں سوں جگ میں پایا ہوں ولیؔ یہ کیمیا

13

غضب سوں چہرۂ رنگیں بہارِ ناز و ادا

بہارِ حسن میں ہے لالہ زارِ ناز و ادا

لکھا ہے صفحۂ ایجاد پر مصوّر صنع

قلم سوں موے کمر کے نگارِ ناز و ادا

چمن طراز نزاکت کیا ہے صنعت سوں

سہی قداں کا مکاں جوئبار ناز و ادا

سنا ہوں خضر سوں دل کے یہ حرف تازہ و تر

بہار جلوۂ خط ہے بہار ناز و ادا

ولیؔ پڑیا ہے نظرجب سوں وو کماں ابرو

ہزار دل سوں ہوا ہوں شکارِ ناز و ادا

14

دل کوں لگتی ہے دل رُبا کی ادا

جی میں بستی ہے خوش ادا کی ادا

گرچہ سب خوب رو ہیں خوب ولے

قتل کرتی ہے میرزا کی ادا

حرف بے جا بجا ہے گر بولوں

دشمنِ ہوش ہے پیا کی ادا

نقش دیوار کیوں نہ ہوئے عاشق

حیرت افزا ہے بے وفا کی ادا

گل ہوئے غرق آب شبنم میں

دیکھ اس صاحبِ حیا کی ادا

اشک رنگیں میں غرق ہے نِس دن

جن نے دیکھا ہے تجھ حنا کی ادا

اے ولیؔ درد سر کی دارو ہے

مجھ کوں اُس صندلی قبا کی ادا

15

ہوش کھوتی ہے نازنین کی ادا

سحر ہے سروِ گل جبیں کی ادا

گر ہے مطلوب تجھ کوں نقش مراد

دیکھ اس کی بھواں کی چیں کی ادا

ہوش میرا نئیں رہا مجھ میں

جب سوں دیکھا ہے نازنیں کی ادا

موجِ دریا کو دیکھنے مت جا

دیکھ اس زلف عنبریں کی ادا

اے ولیؔ دل کوں آب کرتی ہے

نگہ چشم شرمگیں کی ادا

16

ترے فراق میں دل کوں کیا ہوں بند جدا

کیا ہوں خال اُپر جی کو جیوں سپند جدا

تجھے شمع کے برابر سو کہہ سکوں کیوں میں

کہ نخل موم جدا سرو سر بلند جدا

ترے یو رُخ کو ہور ابرو کوں دیکھ اے ظالم

جلا ہے سو‘ر جدا ہور گلیا ہے چند جدا

ترے لباں کی حلاوت کو رکھ نظر بھیتر

شکر گھلی ہے جدی ہور گھلا ہے قند جدا

ترے جو قد سوں رکھا نَے شکر نے دل میں گرہ

تو کھینچ پوست کیا اس کوں بند بند جدا

ترے فراق میں کیا کہوں دوجے رقیباں سوں

ہوا ہے مجھ سوں مرا دل اے دل پسند جدا

نہ بوجھ دل میں دوجے طالباں برابر مجھ

کہ اہلِ عیش جدا ہور یو دردمند جدا

ترے یو مکھ کی جھلک ہور زلف کی موج کوں دیکھ

تپاں ہے سُرج تو بے تاب ہے سپند جدا

ولیؔ برہ میں ترے حال کی حقیقت دیکھ

خجل ہے ناصح و رسوا ہے اہل پند جدا

17

ہے فیض سوں جہاں کے دل با فراغ میرا

مرہم سوں نئیں ہوا ہے محتاج داغ میرا

اسباب سوں دنیا کے بے غرض ہوں سدا میں

بن تیل ہور بتی ہے روشن چراغ میرا

وو ماہ جلوہ گر ہو دل کوں کیا منوّر

ہے آج آسماں سوں اوپر دماغ میرا

مجھ دل کے آچمن میں کر یک نظر تماشا

داغاں کے ہے گُلاں سوں روشن یو باغ میرا

از بسکہ زندگی میں یوں محو ہوں ولیؔ میں

مشکل ہوا اجل کوں کرنا سراغ میرا

18

ہوا ہے سیر کا مشتاق بے تابی سوں من میرا

چمن میں آج آیا ہے مگر گل پیرہن میرا

مرے دل کی تجلی کیوں رہے پوشیدہ مجلس میں

ضعیفی سوں ہوا ہے پردۂ فانوس تن میرا

نئیں ہے شوق مجھ کوں باغ کی گل گشت کا ہرگز

ہوا ہے جلوہ گر داغاں سوں سینے کا چمن میرا

مُوا ہوں تجھ جدائی کے دُکھوں اے نورعینِ دل

برنگ مردمک انکھیاں کا پردہ ہے کفن میرا

لگے پھیکی نظر میں اے ولیؔ دوکانِ حلوائی

اگر ہو جلوہ گر بازار میں شیریں بچن میرا

19

دیکھا ہے جن نے تیرے رخسار کا تماشا

نئیں دیکھتا سُرج کی جھلکار کا تماشا

اے رشک باغ جنت جب سوں جدا ہوا توں

دوزخ ہے مجھ کوں تب سوں گلزار کا تماشا

بے قصد مجھ زباں پر آتا ہے لفظ تمکیں

دیکھا ہے جب سوں تیری رفتار کا تماشا

رشتے کو بندگی کے ڈالا اَپس گلے میں

دیکھا جو تجھ صنم کے زنار کا تماشا

نرگس نمن رہی نئیں پل مارنے کی طاقت

آ دیکھ اپس انکھیاں کے بیمار کا تماشا

اس مکھ کا رنگ اڑکر قوسِ قزح کوں پہنچا

دیکھا جو تجھ بھواں کی تردار کا تماشا

تب سوں ولیؔ کا مطلب جا بیچ میں پڑیا ہے

دیکھا ہے جب سوں تیری دستار کا تماشا

20

موسیٰ اگر جو دیکھے تجھ نور کا تماشا

اس کوں پہاڑ ہووے پھر طور کا تماشا

اے رشک باغ جنت تجھ پر نظر کیے سوں

رضواں کو ہووے دوزخ پھر حور کا تماشا

روز سیاہ اس کے مومو سوں جلوہ گر ہے

تجھ زلف میں جو دیکھا دیجور کا تماشا

کثرت کے پھول بَن میں جاتے نئیں ہیں عارف

بس ہے موحّداں کو منصور کا تماشا

ہے جس سوں یادگاری وو جلوہ گر ہے دایم

تو چیں میں دیکھ جاکر فغفور کا تماشا

وہ سر بلند عالم از بس ہے مجھ نظر میں

جیوں آسماں عیاں ہے مجھ دور کا تماشا

تجھ عشق میں ولیؔ کے آنجھو اُمنڈ چلے ہیں

اے بحرِ حسن آ دیکھ اِس پو‘ر کا تماشا

21

بے تاب آفتاب ہے تجھ مکھ کی تاب کا

پیاسا ہے اِس جہاں میں ترے لب کے آب کا

تجھ مکھ کی آب و زلف کی مو جاں کو دیکھنے

سب تن نین ہوا ہے سو جل پر حباب کا

تجھ حسن انتخاب کا لکھتے تھے جب حساب

موہوم یک نقط ہے سُرج اس حساب کا

ہے مدرسے میں چرخ کے خورشید فیض بخش

جب سوں لیا ہے درس تری مکھ کتاب کا

مجلس ہے گرم چرخ کی تجھ آفتاب سوں

خالی ہے جام سرد اُپر ماہتاب کا

تجھ شوق سوں مدام لبالب ہے جام نین

شیشے میں دل کے جوش ہے نت اُس شراب کا

مجھ شعر کی روانی سنیا جب سوں اے ولیؔ

نم ناک ہے تدھاں ستی دامن سحاب کا

22

روح بخشی ہے کام تجھ لب کا

دم عیسیٰ ہے نام تجھ لب کا

حسن کے خضر نے کیا لبریز

آب حیواں سوں جام تجھ لب کا

منطق و حکمت و معانی پر

مشتمل ہے کلام تجھ لب کا

جنتِ حسن میں کیا حق نے

حوض کوثر مقام تجھ لب کا

رگ یاقوت کے قلم سوں لکھیں

خط پرستاں پیام تجھ لب کا

سبزہ و برگ و لالہ رکھتے ہیں

شوق، دل میں دوام ، تجھ لب کا

غرق شکّر ہوئے ہیں کام و زباں

جب لیا ہوں میں نام تجھ لب کا

مثل یاقوت خط میں ہے شاگرد

ساغر مے مدام تجھ لب کا

ہے ولیؔ کی زباں کو لذت بخش

ذکر ہر صبح و شام تجھ لب کا

23

مجھ گھٹ میں اے نِگھرگھٹ ہے شوق تجھ گھونگھٹ کا

دیکھے سوں لٹ گیا دل تیری زلف کا لٹکا

کردیا تجھ کپٹ کوں پڑتے ہیں اشک ٹپ ٹپ

مکھ بات بولتا ہوں شکوہ تری کپٹ کا

تجھ نین کے دیکھن کا دل ٹھاٹ کر چلا تھا

غمزے کے دیکھ ٹھٹ کوں ناچار ہو کے ٹھٹکا

تجھ خط کے بن توجہ کھلنا ہے اُس کا مشکل

حلقے میں تجھ زُلف کے جو جیو جا کے اٹکا

ہرگز ولیؔ کسی کن شاکی ترا نہ ہوتا

گر تجھ میں اے ہٹیلے ہوتا نہ طور ہٹ کا

24

نہیں شوق اُس کے دل میں کدھین لالہ زار کا

مشتاق ہے جو پیو کے رُخ آب دار کا

لگتا ہے مجھ کوں پنجۂ خورشید رعشہ دار

دیکھا ہے جب سوں دست نگاریں نگار کا

ہر ذرہ اُس کی چشم میں لبریز نور ہے

دیکھا ہے جن نے حسن تجلّی بہار کا

طاقت نئیں کسی کوں کہ یک حرف سُن سکے

احوال گر کہوں میں دل بے قرار کا

آوے ولیؔ ہماری طرف، تیغ ناز لے

اُس شوخ کوں خیال اگر ہے شکار کا

25

جگ منیں دوجا نئیں ہے خوب رو تجھ سار کا

چاند کوں ہے آسماں پر رشک تجھ رخسار کا

جب سوں تیری زلف کوں دیکھا ہے زاہد اے صنم

ترک کر سُبحہ کوں ہے مشتاق تجھ زنار کا

دل کو میرے تب ستیں حاصل ہوا ہے پیچ و تاب

جب سوں دیکھا پیچ تیری لٹ پٹی دستار کا

تجھ گلی کی خاک رہ جب سوں ہوا ہوں اے پیا

تب سوں تیرا نقش پا تکیہ ہے مجھ بیمار کا

بلبلاں گر یک نظر دیکھیں ترے مکھ کا چمن

پھر نہ دیکھیں زندگی میں مکھ کدھیں گلزار کا

بحر بے پایاں نے مجھ انجھواں ستی پایا ہے فیض

ابرنیساں عبد ہے مجھ چشم گوہر بار کا

ٹک اپس کا مکھ دکھا اے راحت جان و جگر

ہے ولیؔ مدت ستی مشتاق تجھ دیدار کا

26

دیکھنا ہر صبح تجھ رخسار کا

ہے مطالعہ مطلع انوار کا

بلبل و پروانہ کرنا دل کے تئیں

کام ہے تجھ چہرۂ گل نار کا

صبح تیرا درس پایا تھا صنم

شوقِ دل محتاج ہے تکرار کا

ماہ کے سینے اُپر اے شمع رو

داغ ہے تجھ حسن کی جھلکار کا

دل کوں دیتا ہے ہمارے پیچ و تاب

پیچ تیرے طرّۂ طرّار کا

جو سُنیا تیرے دہن سوں یک بچن

بھید پایا نسخۂ اسرار کا

چاہتا ہے اس جہاں میں گر بہشت

جا تماشا دیکھ اُس رخسار کا

آرسی کے ہاتھ سوں ڈرتا ہے خط

چور کوں ہے خوف چوکیدار کا

سرکشی آتش مراجی ہے سبب

ناصحوں کو گرمیِ بازار کا

اے ولیؔ کیوں سن سکے ناصح کی بات

جو دِوانا ہے پری رُخسار کا

27

یاد کرنا ہر گھڑی اس یار کا

ہے وظیفہ مجھ دلِ بیمار کا

آرزوئے چشمۂ کوثر نئیں

تشنہ لب ہوں شربت دیدار کا

عاقبت کیا ہووے گا، معلوم نئیں

دل ہوا ہے مبتلا دل دار کا

کیا کہے تعریف دل، ہے بے نظیر

حرف حرف اس مخزن اسرار کا

گر ہوا ہے طالب آزادگی

بند مت ہو سُبحہ و زنار کا

مسند گل منزل شبنم ہوئی

دیکھ رتبہ دیدۂ بیدار کا

اے ولیؔ ہونا سری جن پر نثار

مدّعا ہے چشم گوہر بار کا

28

گر میری طرف ہوے گزر اس شوخ پسر کا

سب راہ کروں فرش اپس نور نظر کا

مقصود کا تیار کروں حلوۂ بے دود

تجھ لب ستی گر ہاتھ لگے تُنگ شکر کا

اے نور نظر جب سوں تو آیا ہے نظر میں

پلکاں کو کیا شانہ ترے موے کمر کا

شرمندہ ہو تجھ مکھ کے دِکھے بعد سکندر

بالفرض بنا دے اگر آئینہ قمر کا

جوں لالہ بجز آتشِ خاموش لب یار

مرہم نئیں عالم میں ولیؔ داغ جگر کا

29

زخمی ہے جلاّدِ فلک تجھ غمزۂ خوں ریز کا

ہے شور دریا میں سدا تجھ زلف عنبر بیز کا

تجھ صاحب نیرنگ کی دیکھے اگر تصویر کوں

دل جا پڑے حیرت منیں نقاّش رنگ آمیز کا

اے عیسوی دم جگ منیں پایا وو عمر جاوداں

جو جگ منیں بسمل ہوا تیری نگاہ تیز کا

تب سوں ہوا ہے دل مرا کان نمک اے با نمک

جب سوں سُنیا ہوں شور میں تجھ حسن شور انگیزکا

یوں شعر تیرا اے ولیؔ مشہور ہے آفاق میں

مشہور ہے جیوں کر سخن اس بلبل تبریز کا

30

عیاں ہے ہر طرف عالم میں حسن بے حجاب اس کا

بغیر از دیدۂ حیراں نئیں جگ میں نقاب اس کا

ہوا ہے مجھ پہ شمع بزم یک رنگی سوں یو روشن

کہ ہر ذرے اُپر تاباں ہے دائم آفتاب اس کا

کرے عشاق کوں جیوں صورت دیوار حیرت سوں

اگر پردے سوں وا ہووے جمال بے حجاب اس کا

سجن نے یک نظر دیکھا نگاہ مست سوں جس کوں

خراباتِ دوعالم میں سدا ہے وو خراب اس کا

مرا دل پاک ہے از بس، ولیؔ زنگ کدورت سوں

ہوا جیوں جو ہر آئینۂ مخفی پیچ و تاب اس کا

31

سناوے مجکوں گر کُئی مہربانی سوں سلام اُس کا

کہاؤں آخر دم لگ بہ جاں منت غلام اُس کا

اگرچہ حسبِ ظاہر میں ہے فرقت درمیاں لیکن

تصور دل میں میرے جلوہ گر ہے صبح و شام اُس کا

محبت کے مرے دعوے پہ تا ہووے سند مجھ کوں

لکھیا ہوں صفحۂ سینہ پہ خونِ دل سوں نام اُس کا

برنگ لالہ نکلے جام لے کر اس زمیں سے جَم

اگر بخشے تکلم سوں مئے جاں بخش جام اُس کا

کُفَر کوں توڑ دل سوں دل میں رکھ کر نیتِ خالص

ہوا ہے رام بَن حسرت سوں جا لکھمن سو رام اُس کا

ہوئی دیوانگی مجنوں کی یوں میرے جنوں آگے

کہ جیوں ہے حسنِ لیلیٰ بے تکلف پائے نام اُس کا

کرے آزادگی اپنی گرفتاری اُپر قرباں

جو دیکھے یک قدم پھر، سرو گلشن میں خرام اُس کا

زباں تیشے کی کر سمجھے زبان دوجے فصیحاں کی

اگر فرہاد دل جا کر سنے شیریں کلام اُس کا

ولیؔ دیکھا جو اس انکھیاں کے ساقی کن وو جام مے

ہوا ہے بے خبر عالم سوں ہور خواہانِ جام اُس کا

32

چاروں طرف کھُلیا ہے گلزار رنگ درس کا

اس سیر جاں فزا سوں سینہ کھلیا ہوس کا

تجھ مکھ کے دیکھنے سوں اے آفتاب طلعت

مشتاق دل سوں میرے شعلہ اُٹھا اُمس کا

سب دلبراں پہ حق نے تجھ کو دیا فضیلت

ہر مدرسے کے بھیتر چرچا ہے تجھ دَرَس کا

یاں پیم کے دریا میں گرداں ہے کشتیِ عقل

اس موج شعلہ زن میں کیا آسرا ہے خس کا

پھرپھر ولیؔ ترے کَن آتا ہے جیوں کے سائل

تیری مٹھی زباں کا پایا ہے جب سوں چسکا

33

گزر ہے تجھ طرف ہر بوالہوس کا

ہوا دھاوا مٹھائی پر مگس کا

اپس گھر میں رقیباں کو نہ دے بار

چمن میں کام کیا ہے خار و خس کا

نگہ سوں تیری ڈرتے ہیں نظر باز

سدا ہے خوف دزدوں کو عسس کا

بجز رنگیں ادا دوجے سوں مت مل

اگر مشتاق ہے تو رنگ درَس کا

ولیؔ کوں ٹک دکھا صورت اپس کی

کھڑا ہے منتظر تیرے درَس کا

34

تری زلفاں کا ہر تار سیہ ہے کال عاشق کا

ہوا ہے اُس کے جلوے سوں پریشاں حال عاشق کا

نئیں درکار تا بولے بیاں اپنی زباں سیتی

عیاں ہے اشک کے طومار سواں احوال عاشق کا

جاوے ملک بیتابی سوں یک لمحہ کدھی باہر

زمیں میں بے قراری کی گڑیا ہے نال عاشق کا

ترا دل اے پری پیکر اگر شہرت کا طالب نئیں

تو اپنا مکھ دکھا کر دور کر جنجال عاشق کا

اگر جاوے پیا کے مکھ طرف بخت آزمائی کوں

کرے پیو کا تغافل اُٹھ کے استقبال عاشق کا

پیا کے ابروے کج نے کیا ہے دل کوں سرگرداں

کرو معلوم اس چوگان و گو سوں حال عاشق کا

نہ ہووے چرخ کی گردش سوں اس کے حال میں گردش

بجا ہے قطب کے مانند استقلال عاشق کا

کدھی دام محبت سوں خلاصی اس کو ممکن نئیں

ترے انکھیاں کے ڈورے سوں بُنا ہے جال عاشق کا

نہ پوچھو عشق میں جوش و خروش دل کی ماہیّت

بہ رنگ ابر دریا بار ہے رومال عاشق کا

ولیؔ ، یو مصرعِ رنگیں ہوا ہے درد جان و دل

فدا ہے عشق میں دلبر کے جان و مال عاشق کا

35

مجھ درد پہ دوا نہ کرو تم حکیم کا

بن وصل نئیں علاج برہ کے سقیم کا

دیکھا ہوں قدّو زلف و دہن پیو کا جب ستی

کیتا ہوں درد تب سوں الف لام میم کا

جنت میں کب دیے ہیں وہ رضواں کو مرتبہ

جو مرتبہ ہے تیری گلی کے مقیم کا

پیو کے نزیک انجھو کو مرے کچھ وقار نئیں

عالم میں گرچہ قدر ہے دُرِّ یتیم کا

کرتا ہے اس کی زلف کی تعریف اے ولیؔ

جو ہے مرید سلسلۂ مستقیم کا

36

دل کو گر مرتبہ ہو درپن کا

مفت ہے دیکھنا سری جن کا

جامہ زیباں کو کیوں تجوں کہ مجھے

گھیر رکھتا ہے دور دامن کا

اے زباں کر مدد کہ آج صنم

منتظر ہے بیانِ روشن کا

حکمت عشق بوعلی سوں نہ پوچھ

نئیں وہ قانوں شناس اس فن کا

آئینہ تجھ سے ہو کے ہم زانو

غیرت افزا ہوا ہے گلشن کا

امن میں تجھ نگہ سوں ہیں بے درد

خوف نئیں مفلسوں کوں رہزن کا

دل صد پارہ تجھ پلک سوں ہے بند

خرقہ دوزی ہے کام سوزن کا

تجھ نگہ سوں بہ شکلِ شان عسل

دل ہوا گھر ہزار روزن کا

ٹک ولیؔ کی طرف نگاہ کرو

صبح سوں منتظر ہے درشن کا

37

ہر طرف ہے جگ میں روشن نام شمس الدین کا

چین میں ہے شور جس کے ابروے پُرچین کا

مکھ پہ لے رنگ خجالت، چھوڑ کر معدن گیا

لعل نے سن کر سخن تیرے لب رنگین کا

ہے ترے ہر مو سوں روشن جلوہ گر رنگ وقار

کیا عجب گر تجھ سے لیوے درس نت تمکین کا

دیکھ تجھ پلکاں کوں بولیا عاشق جاں بازیوں

مرغ دل کے صید کوں چنگل ہے یو شاہین کا

صورت تسکیں نئیں دِستی مگر اس حال میں

اے ولیؔ جب پیو پو‘چھے حال مجھ مسکین کا

38

بدخشاں میں پڑیا ہے شور تیرے لعل رنگیں کا

ہوا ہے چین میں شہرہ تری اس زلف پُرچیں کا

عجب نئیں ہے اگر ساقی فلک کا اے کمال ابرو

تری مجلس میں لیا دے جام روشن ماہ سیمیں کا

لکھیا اے ظالم خوں خوار و صیّاد دل عاشق

تری مژگاں نے میرے دل اُپر مضمون شاہیں کا

اُٹھے شیریں سر تعظیم کوں اس کی ادب سیتی

اگر کئی کوہ کن بولے سخن تجھ عزّ و تمکیں کا

ولیؔ اُس طبع کا گلشن گل معنی سوں ہو روشن

کوئی دل کوں کرے مسکن مرے اشعار رنگیں کا

39

ہوا ہے دل مرا مشتاق تجھ چشم شرابی کا

خراباتی اُپر آیا ہے شاید دن خرابی کا

کیا مدہوش مجھ دل کوں آ نیندی نین ساقی نے

عجب رکھتا ہے کیفیّت زمانہ نیم خوابی کا

خطِ شب رنگ رکھتا ہے عداوت حسن خوباں سے

کہ جیوں خفّاش ہے دشمن شعاعِ آفتابی کا

نہ جاؤں صحن گلشن میں کہ خوش آتا نئیں مجکوں

بغیر از ماہ رو ہرگز تماشا ماہ تابی کا

نہ بوجھو اب ہوا ہے کم سخن وو دلبر رنگیں

لب تصویر پر ہے رنگ دائم لاجوابی کا

پری رخ کوں اٹھانا نیند سوں برجا ہے اے عاشق

عجب کچھ لطف رکھتا ہے زمانہ نیم خوابی کا

نہ جانوں کس پری رو سوں ہوا ہے جا کے ہم زانو

کہ آئینے نے پایا ہے لقب حیرت مآبی کا

ولیؔ سوں بے حسابی بات کرنا بے حسابی ہے

نئیں وو آشنا اے یار ہرگز بے حسابی کا

40

نئیں کُئی تا سنے احوال میری دل فگاری کا

کہوں کس کن گریباں چاک کر دکھ بے قراری کا

عجب نئیں اُٹھ کے بے تابی سوں سر مارے کنارے پر

سنے گر ماجرا دریا ہمارے اشک جاری کا

ترے غم میں نَین سے جو نکلتا ہے انجھو باہر

دوجا گوہر کہاں ہے جگ میں اُس کی آبداری کا

تری وو انتظاری ہے جسے حد ہور نہایت نئیں

شکایت کس کنے جاکر کروں اس انتظاری کا

ہوئی ہے آرسی جوگن ترے مکھ کے تصوّر مسں

بھبھوتی موں پہ لیا دم مارتی ہے خاک ساری کا

کھڑا ہے راستی کے دم میں یک پگ پرسو جیوں جوگی

ترے قد سوں لگا ہے دھیان سروِ جوئباری کا

ولیؔ انکھیاں کی کر داوات پُتلی کی سیاہی سوں

لکھیا تیری صفت کوں لے قلم معنی نگاری کا

41

طالب نئیں مہر و مشتری کا

دیوانہ ہوا جو تجھ پری کا

یو غمزۂ شوخ ساحری میں

استاد ہے سحرِ سامری کا

تجھ تل سوں اے آفتاب طلعت

ممنون ہوں ذرّہ پروری کا

کفار فرنگ کوں دیا ہے

تجھ زلف نے درس کافری کا

تیرا خط خضر رنگ اے شوخ

سلطان ہے خشکی و تری کا

توں سر سوں قدم تلک جھلک میں

گویا ہے قصیدہ انوری کا

خورشید ستی ہوا ہے ہم سر

چیرا، ترے سر اُپر، زری کا

اے غنچہ نہ کر تو فخر، یو دل

ہے بند پیا کی بکتری کا

پایا ہے جو کوئی دولت فقر

مشتاق نئیں سکندری کا

پھیکی لگے اس کوں شان دولت

چاکھیا جو مزہ قلندری کا

کہتا ہے ولیؔ پکار یو بات

بندہ ہوں پیا کی دلبری کا

42

شغل بہتر ہے عشق بازی کا

کیا حقیقی و کیا مجازی کا

ہر زباں پر ہے مثل شانہ مدام

ذکر تجھ زلف کی درازی کا

آج تیری بھواں نے مسجد میں

ہوش کھویا ہے ہر نمازی کا

گر نئیں راز عشق سوں آگاہ

فخر بے جا ہے فخر رازی کا

اے ولیؔ سر و قد کو دیکھوں گا

وقت آیا ہے سرفرازی کا

43

یکایک مجھ دِسا یک شہ جواں آ سوار تازی کا

کہ جن نے حق سوں پایا ہے خطاب عاشق نوازی کا

نزک میرے کرم کر کر فصاحت ہور بلاغت سوں

کہا وو سرو قد مجھ کوں سخن سو سرفرازی کا

محبت یار بے پروا کی سینے میں ہے رات ہور دن

یہی مطلب ہے رات ہور دن نمازی ہور نیازی کا

مجھے بولیا کہ گر عشق حقیقی سوں تو واقف نئیں

تو بہتر یوں ہے جا دامن پکڑ عشق مجازی کا

سنیا ہوں جب سوں یو نکتہ ولیؔ شیریں سخن سیتی

لگیا ہے تب سوں شیوہ جی کوں میرے عشق بازی کا

44

پڑیا ہے لعل میں پر تو سجن تجھ لب کی لالی کا

بیاں ہے مہ سوں روشن تر تری صاحب کمالی کا

ترا قد مصرعِ برجستہ ہے دیوان عالی کا

تری یو بیت ابرو شعر دستا ہے ہلالی کا

گئی ہے خواب مخمل کی ترے پانو کی سرخی سوں

کہ جس کے عکس سوں رنگیں ہوا ہے نقش قالی کا

تری لب کی حلاوت نے کیا مجھ طبع کو شیریں

ہوا ہے نقلِ مجلس ذکر مجھ شیریں مقالی کا

ہوا مجھ دل کی جنّت میں سو ہر یک آہ جیوں طوبیٰ

لٹک چلنا جو دیکھا، بسکہ میں سیدِ معالی کا

نزاکت تجھ کمر کی دل نشیں ہے، اس سبب ساجن

ہوا ہے شہرہ عالم میں مری نازک خیالی کا

رنگیلے شعر کا کہنا کیا تھا ترک مدّت سوں

ترا یو قد ہوا ہے پھر کے باعث فکر عالی کا

تری وہ طبع ہے ہموار اے رشک مہِ کنعاں

کہ جس میں مو‘ برابر نئیں اثر بے اعتدالی کا

ولیؔ تجھ شعر کوں سنتے ہوئے ہیں مست اہلِ دل

اثر ہے شعر میں تیرے شراب پرتگالی کا

45

کیا ہوں جب سوں دعویٰ شاہ خوباں کی غلامی کا

علم برپا ہوا ہے تب سوں میری نیک نامی کا

اسے دشوار سے جگ میں نکلنا غم کے پھاندے سوں

جو کُئی دیکھا ہے تیرے بر منیں جامہ دو دامی کا

اُٹھا ریحاں اگرچہ خواجۂ بستاں سَرا لیکن

دیا تجھ خط کوں اے یاقوت لب سر خط غلامی کا

پری رویاں کے کوچہ میں خبرداری سوں جا اے دل

کہ اطراف حرم میں ڈر ہمیشہ ہے حرامی کا

ہوا جوہر شناس تیغ معنی اے ہلال ابرو

کہ جن نے درس پایا ہے تجھ ابرو کی حامی کا

بسے فرہاد کے مانند کوہ بے ستوں میں جا

اگر قصّہ سنے خسرو تری شیریں کلامی کا

اگر تجھ حسن کامل کی سنیں تعریف مہ رویاں

تمام آکر کریں اقرار اپنی نا تمامی کا

اگر تجھ حسن عالم گیر کو دیکھیں سخن فہماں

نہ لاویں پھر زباں اوپر بیاں خوبان نامی کا

لگے جیوں نخل ماتم سر و گلشن اُس کی انکھیاں میں

تماشا جن نے دیکھا ہے سجن تجھ خوش خرامی کا

حقیقت سوں تری مدّت ستی واقف ہیں اے زاہد

عبث ہم پختہ مغزاں سوں نہ کر اظہار خامی کا

ولیؔ لکھتا ہے تیری مست انکھیاں دیکھ اے ساقی

بیاضِ گردنِ مینا اُپر دیوان جامی کا

46

عبث غافل ہوا ہے گا فکر کر پیو کے پانے کا

صفا کر آرسی دل کی سکندر ہو زمانے کا

چراغ دل اگر گل ہے تو کر جیوں گل اسے روشن

کہ یہ تحفہ ہے سالک کوں نزک حق کے لجانے کا

نہ پاوے دین کی لذت جسے دنیا کی خواہش ہے

قُفَل ہے لذت دنیا حقیقت کے خزانے کا

نئیں یو آہ ہور زاری جو سینے ہور انکھاں میں ہے

سمجھ بیشک کہ افسوں ہے یہ اُس پیو کے لبھانے کا

موے کو جیو بخشے آب حیواں بے گماں ہے جیوں

نین میں تیو نچ پانی ہے سوتے دل کے جگانے کا

برہ کی آگ میں دھنسنے کی نئیں ہے کچھ فکر دل کوں

کہ جیوں غم نئیں ہے ابراہیم کو آتش میں جانے کا

ولیؔ تجھ کو رکھیں گے شیر مرداں اپنی مجلس میں

رہے گر سگ ہوکر دائم نبیؐ کے آستانے کا

47

کیا،یک بات میں واقف مجھے راز نہانی کا

لکھوں غنچے اُپر حرف اس دہن کی نکتہ دانی کا

کتابت بھیجنی ہے شمع بزم دل کوں اے کاتب

پر پروانہ اوپر لکھ سخن مجھ جاں فشانی کا

عزیزاں بعد مرنے کے نہ بوجھو تم کہ تنہا ہوں

لکھا ہوں پردۂ دل پر خیال اُس یار جانی کا

چھپا کر پردۂ فانوس میں رخ شمع ہے گریاں

سنیا ہے جب سے آوازہ تری روشن بیانی کا

پرت کی بزم میں تا سرخ روئی مجھ کوں ہو حاصل

نین سوں اپنے دے ساغر شراب ارغوانی کا

بجا ہے گر کرے پرواز رنگ چہرۂ عاشق

ہوا ہے شوق موہن کوں لباس زعفرانی کا

ترے مکھ کی صفائے حیرت افزا کیوں سکے لکھ کر

قلم ہے جو ہر آئینۂ نا صاف مانی کا

رہے وو مُو کمر جیوں دیدۂ تصویر حیراں ہو

لکھوں گر خامۂ موسوں بیاں مجھ ناتوانی کا

شراب جلوۂ ساقی سوں مت کر منع اے زاہد

یہی ہے مقتضا عالم میں ہنگامِ جوانی کا

ولیؔ جن نے نہ باندھیا دل کوں اپنے نونہالاں سوں

نہ پایا پھل جہاں میں ان نے ہرگز زندگانی کا

48

لیا ہے جب سوں موہن نے طریقہ خود نمائی کا

چڑھیاں ہے آرسی پر تب سوں رنگ حیرت فزائی کا

اپس کی زلف کافر کیش کی جھلکار ٹک دکھلا

کہ زاہد بے خبر دم مارتا ہے پارسائی کا

سُرج کوں گر اجازت ہو تو آوے سیس سوں چل کر

کہ اس کوں شوق ہے تجھ آستاں پر جبہّ سائی کا

مرے دل کی حقیقت یوں ہوئی ہے شہرۂ عالم

کہ جیوں مذکور ہووے جگ میں تیری دل رُبائی کا

کرے تا تجھ شکر لب سے طلب اک بوسۂ شیریں

مرے دل نے لیا ہے اس سبب شیوہ گدائی کا

جو کُئی تیری سیہ چشماں کوں سمجھا بے مروت کر

بھروسا کیوں کے ہووے اس کوں تیری آشنائی کا

سجن کی انجمن میں ہوئے تب ہر یک طبع روشن

ولیؔ چرچا اُچھے مجلس میں جب طبع آزمائی کا

49

جس وقت اے سری جن تو بے حجاب ہوے گا

ہر ذرّہ تجھ جھلک سوں جیوں آفتاب ہوے گا

مت جا چمن میں لالن بلبل پہ مت ستم کر

گرمی سوں تجھ نگہ کی گُل گل گلاب ہوے گا

مت آئینے کوں دکھلا اپنا جمال روشن

تجھ مکھ کی آب دیکھے آئینہ آب ہوے گا

نکلا ہے وو ستم گر تیغ ادا کو لے کر

سینے کا عاشقاں کے اب فتح باب ہوے گا

رکھتا ہے کیوں جفا کوں مجھ پر روا اے ظالم

محشر میں تجھ سوں میرا آخر حساب ہوے گا

مجکو ہوا ہے معلوم اے مست جام خوبی

تیری انکھیاں کے دیکھے عالم خراب ہوے گا

ہاتف نے یوں دیا ہے مجھ کو ولیؔ بشارت

اُس کی گلی میں جا تو مقصد شتاب ہوے گا

50

اس قد سوں جس چمن میں وو نونہال ہوگا

کیا سرو کیا صنوبر ہر یک نہال ہوگا

آوے گا گر سخن میں وو مایۂ لطافت

شرمندہ اس کے آگے آبِ زُلال ہوگا

عالم میں جو ہوا ہے طالب تری بھواں کا

اس کے نگین دل پر نقشِ ہلال ہوگا

ہے اُس کے حق میں ہر شب مانند روز محشر

جس کوں فراق جاناں سینے کا سال ہوگا

معنی کے ہے چمن کا جو بلبل معانی

تجھ گل بدن کے دیکھے رنگیں خیال ہوگا

جیوں شمع گل پڑیں گے شرمندگی سوں گُل رو

جس انجمن میں حاضر گو بند لال ہوگا

البتہ وصف تیرا لاوے گا ہر سخن میں

جو شعر میں ولیؔ سا صاحب کمال ہوگا

51

تجھ غمزۂ خوں ریز سوں لڑ کون سکے گا

تجھ ناز ستم گر سوں جھگڑ کون سکے گا

تجھ حسن کے بازار میں دیوانۂ دل کوں

بِن زلف کی زنجیر جکڑ کون سکے گا

پھرتی ہیں سیہ مست ہو شمشیر نظر لے

بِن نیند اُن انکھیا کو پکڑ کون سکے گا

ہیں خضر کے چشمے سوں ترے لب یو لبالب

بِن سبزۂ خط اُس کوں انپڑ کون سکے گا

تجھ زلف کا بستار لکھا آج ولیؔ نے

اس سحر کے طومار کوں پڑ کون سکے گا

52

تجھ نین کے شسوار سوں لڑ کون سکے گا

بن نیند اس انکھیاں کوں پکڑ کون سکے گا

خوش آب حیاتی ستیں یو لب ہیں لبالب

بیڑے بغیر اُس لب کوں انپڑ کون سکے گا

بدمست دو پستاں ترے سینے پہ ہیں قائم

اُن باج بھی اس صدر پہ چڑ کون سکے گا

دریاے برہ غم میں مجھے دل ہے سو یونس

اس بحر میں دل باج سو پڑ کون سکے گا

مانند ولیؔ تجھ سوں جو پایا شرف وصل

اس باج اپس دل سوں بچھڑ کون سکے گا

53

زرد رو ہے جو کیا ہے فکر تسخیر طلا

مت ہو اے وحشی صفت زنہار نخچیر طلا

کیوں کرے آلودۂ زر جگ منیں صید مراد

ہے علم او پر معطل صورت شیر طلا

گر غرض ہے حاصل غیر گردش اس کوں جگ ہیں رات دن

جیوں سُرج لاگے ہیں جس کے دل منیں تیر چلا

دیکھ کر تجھ مکھ کے پرتو کوں اے رشک آفتاب

موج سوں پانی نے ڈالا پگ میں زنجیرطلا

جب سنا تجھ حسن سوں دعوی کیے ہیں اختراں

گرم ہو نکلا سُرج لے ہاتھ شمشیر طلا

شمع تیری بزم میں جس وقت ہووے جلوہ گر

ماہ نو لاوے اپس کوں کر کے گل کیر طلا

بوالہوس رکھتے ہیں دائم فکر رنگِ عاشقاں

جوں مہوّس کے سدا دل میں ہے تدبیر طلا

زندگی زرّیں لباساں کی گئی بازی منیں

دیکھ جگ کے گنجفے میں صورت میر طلا

آہ سوں عاشق کی عارف بوجھتے ہیں حال دل

جیوں کہ سمجھے صوت سوں صرّاف تقریر طلا

یوں زمین عشق میں ہے، دام عاشق، نام یار

نام شہ جیوں ہوتا ہے نس دن گلوگیر طلا

شکل تجھ بت کی جو مجھ دل میں منقش ہوئے ہے

ہے سمندر کی نمط آتش میں تصویر طلا

اے ولیؔ یو شعر ہے لبریز معنی سربسر

ہے بجا اطراف اس کے گر ہو تحریر طلا

54

پی کے ہوتے نہ کروں توں مہ کی ثنا

معتبر نئیں ہے حسن دور نما

باعثِ نشۂ دو بالا ہے

حسن صورت کے ساتھ حسن ادا

اے گل باغ حسن مکھ سوں ترے

جلوہ پیرا ہے رنگ و بوے حیا

ماہ نو تجھ بھواں پہ کر کے نظر

سوے مغرب چلیا ہے رو بہ قفا

سرخ رویاں منیں سرآمد ہے

تجھ قدم کے اثر سوں رنگ حنا

نئیں ہے گل پی کے مکھ سا عالم میں

قائل اس بات کی ہے باد صبا

اے ولی مجھ سخن کوں وو بوجھے

جس کو حق نے دیا ہے فکر رسا

55

تیرے شکر لب کوں اب مثل عسل بولنا

بلکہ عسل ہے یو اصل اُس کوں نقل بولنا

تجھ قد و قامت آگے سرو ہوا سرنگوں

تجھ سے رواں سرو آگے سرو کوں شل بولنا

مکھ کے صدف میں ترے دُر ہے مبارک بچن

دُر سمندر اسے سٹ کے عقل بولنا

بات کی مجلس منیں میر سخن تو نچھ ہے

جگ میں مسیحا تجھے جیبھ سنبھل بولنا

مور ضعیف ہے ولیؔ خاک قدم ٹھار اسے

بلکہ ضعیفی منیں اُس نے نبل بولنا

56

تجھ حسن عالم تاب کا جو عاشق شیدا ہوا

ہر خوبرو کے حسن کے جلوے سوں بے پروا ہوا

دیکھا ہے تیری زُلف کے حلقے کو جن یک نظر

تجھ خال کے نقطے نمن وو بے سرو بے پا ہوا

جس وقت سوں تجھ قد کے تیں لائے ہیں شاعر فکر کر

اس وقت سوں عالم منیں نرخ سخن بالا ہوا

ہیں صلح کل کے گوہراں میرے سخن سوں جلوہ گر

از بسکہ وسعت مشربی سوں دل مرا دریا ہوا

پایا ہے جگ میں اے ولیؔ وہ لیلیِ مقصود کوں

جو عشق کے بازار میں مجنوں نمن رسوا ہوا

57

تجھ برہ کی آتش منیں دل جل کے انگارا ہوا

اس کے اُپر جلنے کوں جیوجیوں عنبر سارا ہوا

تجھ مکھ کے مصحف کے بھتر آیت جو دیکھی قہر کی

ہیبت سوں جیوں زیر و زبر دل ٹوٹ سیپارا ہوا

فرہاد کے تیشے سوں مجھ ادھکا ہوا ہے غم ترا

ہر آہ دل کوں چیرنے سینے بھتر آرا ہوا

گلشن منیں اس خلق کے وو مکھ ہے تیرا رشک گل

شبنم عرق کا جب اُڑا افلاک کا تارا ہوا

مجھ نین کے یعقوب کی نظارہ بازی پیر تھی

یوسف کے دیکھے سوں جواں پھر آج نظارا ہوا

مارا ہے جس کوں اے صنم وو رات دن تجھ پاس ہے

دامن کوں بلکا گرد ہو تجھ راہ کا مارا ہوا

غافل نہ رہ اے سنگ دل ہرگز ولیؔ کے حال سوں

جس آہ کی آتش کوں سن خارا کا دل پارا ہوا

58

تجھ مکھ کا یو تل دیکھ کر لالے کا دل کالا ہوا

تجھ دور خط سوں طوق جیوں مہتاب پر ہالا ہوا

مستی منیں محشر تلک کونین کوں بسرا ہے وو

جو تجھ نین کے جام سوں مدھ پی کے متوالا ہوا

گل زار کے مبحث منیں تھی راستی کی گفتگو

شمشاد پر تجھ سرو کا اکثر سخن بالا ہوا

کاجل نین کا دیکھ کر بولے ہیں یوں جادوگراں

عشاق کی تسخیر کوں یو سحر بنگالا ہوا

غمزاں کو فوجاں باندھ کر آئے ہیں راوت نین کے

ہر مو پلک کا ہاتھ میں اُن کے سو جو‘ں بھالا ہوا

جلتا ہے دوزخ رات دن تیرے جلے کے رشک سوں

مشتاق تیرے درس کا جنت سوں نروالا ہوا

سٹ نیں کی شمشیر کی اوجھڑ ولیؔ کے دل اُپر

تیرے شکار ستاں میں یو نخچیر ہے پالا ہوا

59

جب صنم کوں خیال باغ ہوا

طالب نشّۂ فراغ ہوا

فوج عشاق دیکھ ہر جانب

نازنیں صاحبِ دماغ ہوا

رشک سوں تجھ لباں کی سرخی پر

جگر لالہ داغ داغ ہوا

دل عشاق کیوں نہ ہو روشن

جب خیال صنم چراغ ہوا

اے ولیؔ گل بدن کوں باغ میں دیکھ

دل صد چاک باغ باغ ہوا

60

جلوہ گر جب سوں وو جمال ہوا

نور خورشید پائمال ہوا

فیض تشبیہ قدِّ دلبر سوں

سرو گلشن منیں نہال ہوا

نشۂ سبزیِ خطِ خوباں

والیِ عالم خیال ہوا

یاد کر تجھ بھواں کی بیت بلند

ماہِ نو صاحبِ کمال ہوا

دیکھ کر تجھ نگاہ کی شوخی

ہوش عاشق رم غزال ہوا

حسن اس دل رُبا کا مدت سوں

عکس آئینۂ خیال ہوا

وصف میں تجھ بھواں کے ہر مصرع

ثانیِ مصرع ہلال ہوا

عزل مجنوں کے بعد مجھ کوں ولیؔ

صوبۂ عاشقی بحال ہوا

61

جب تجھ عرق کے وصف میں جاری قلم ہوا

عالم میں اس کا ناؤں جواہر رقم ہوا

نقطے پہ تیرے خال کے باندھا ہے جن نے دل

وو دائرہ میں عشق کے ثابت قدم ہوا

تجھ فطرت بلند کی خوبی کوں لکھ قلم

مشہور جگ کے بیچ عطار و رقم ہوا

طاقت نہیں کہ حشر میں ہووے وو داد خواہ

جس بے گنہ پہ تیری نگہ سوں ستم ہوا

بے منت شراب ہوں سرشار انبساط

تجھ نین کا خیال مجھے جام جم ہوا

جن نے بیاں لکھا ہے مرے رنگ زرد کا

اس کوں خطاب غیب سوں زریں رقم ہوا

شہرت ہوئی ہے جب سے ترے شعر کی ولیؔ

مشتاق تجھ سخن کا عرب تا عجم ہوا

62

تصویر تیری دیکھ کر سارا جگت حیراں ہوا

تجھ زلف کے کوچے منیں دل جا کے سرگرداں ہوا

ابرو کی کشتی مت چھپا اس وقت اے دریائے حسن

تجھ نین کی گردش ستی عالم منیں طوفاں ہوا

نئیں خال تیرے مکھ اُپر یہ دل ہے اس کا اے صنم

تیری زلف کوں دیکھ کر جو دشمن ایماں ہوا

سنبل پڑیا ہے دام میں تجھ زلف کے اے گل بدن

تجھ خط کی خوبی دیکھ کر فرماں میں نافرماں ہوا

وہ عاشقی کے کیش میں ثابت ہے دائم اے ولیؔ

تجھ سے کماں ابرو اُپر جو جیو سوں قرباں ہوا

63

عشق سوں تیرے صنم جیو پہ طوفاں ہوا

مسکنِ اشکِ نین ساحل داماں ہوا

اے گل باغ ادا، سرو ترے قد انگے

دل پہ ہر آزاد کے صورت سوہاں ہوا

درد سوں آیا مری شام پہ روز سیہ

صبح کا مجھ حال سوں چاک گریباں ہوا

کنج میں تجھ عشق کے جن نے کیا ہے مقام

اس کوں ٹوٹا بوریا تخت سلیماں ہوا

بسکہ اے نور نین تجھ میں ہے انسانیت

عشق سوں تیرے صنم صورت انساں ہوا

جب سوں ترے مکھ کی یاد کرتا ہوں اے گل بدن

تب سوں ہر اک زخم دل باب گلستاں ہوا

تیری انکھیاں کے آگے کیوں کے ہر اک آسکے

مدِّ نگہ چوب دار ہر مژہ درباں ہوا

جگ کے دل اے برہمن کانپتے ہیں مثل بید

جب سوں یو ہندوے خال دشمن ایماں ہوا

تب سوں ولیؔ کی زباں تیز ہے تجھ وصف میں

تجھ مژۂ شوخ کا جب سوں زباں داں ہوا

64

وو مرا مقصود جان و تن ہوا

جس کا مجھ کوں رات دن سُمرن ہوا

مثل میناے شراب بزم حسن

حوض دل تجھ عکس سوں روشن ہوا

نور کا ہے گنج تیرا یو جمال

حسن کے گوہر کا توں معدن ہوا

بسکہ یادِ حسن حیرت بخش ہے

دل مرا صافی میں جیوں درپن ہوا

جو ولیؔ ہے مرجعِ ہر جزو کل

وو مرا مقصود جان و تن ہوا

65

ہر انجھو تجھ غم میں اے رنگیں ادا گل گوں ہوا

غیرت گل زار جنت دامن پُر خوں ہوا

ہے پسند طبع عالی مصرع سرو بلند

جب سوں گلشن میں ترا قد دیکھ کر موزوں ہوا

رات دن انجھواں میں اپنے شاستر کرتا ہے تر

اے برہمن دیکھ تجھ کوں بید خواں مجنوں ہوا

گر نہیں ہے خنجر بے داد خوباں کا شہید

دامن صد چاک گل کس واسطے پُر خوں ہوا

ہر غزل میں وصف لکھتا ہے ترے بے اختیار

تجھ نگاہ با ادا سوں جب ولیؔ ممنوں ہوا

66

تجھ لب مِٹھے کوں دیکھ پھکا انگبیں ہوا

چیں بہ جبیں کو دیکھ خجل نقش چیں ہوا

مجھ دل کے دائرے میں سویدا نہ بوجھ توں

تجھ خال کا خیال مجھے دل نشیں ہوا

مسجود آفتاب ہوا ہے شرف سوں آج

وہ نقش پاک زینت روے زمیں ہوا

تو جہاں رہتا ہے واں تجھے دیکھتا ہوں میں

تجھ یاد میں ز بسکہ یو دل دوربیں ہوا

تجھ زلف کا خیال کہ وہ رشک مشک ہے

عنبر سوں موج بحر میں جا ہم نشیں ہوا

پی کی گلی نگاہ کرو ہے عجب مکاں

اس اشرف المکاں میں یو دل جا مکیں ہوا

ہے آج مجکو جگ میں ولیؔ دست گاہ جم

اس کا خیال دل منیں نقش نگیں ہوا

67

تخت جس بے خانماں کا دشت ویرانی ہوا

سر اُپر اس کے بگولا تاج سلطانی ہوا

کیوں نہ صافی اس کوں حاصل ہو جو مثل آرسی

اپنے جوہر کی حیا سوں سر بسر پانی ہوا

زندگی ہے جس کوں دائم عالم باقی منیں

جلوہ گر کب اُس اَنگے یو عالم فانی ہوا

بے کسی کے حال میں یک آن میں تنہا نہیں

غم ترا سینے میں میرے ہمدمِ جانی ہوا

اے ولیؔ غیرت سوں سورج کیوں جلے نئیں رات دن

جگ منیں وو ماہ رشک ماہِ کنعانی ہوا

68

پھر میری خبر لینے وو صیّاد نہ آیا

شاید کہ مرا حال اسے یاد نہ آیا

مدت ستی مشتاق ہیں عشاق جفا کے

بے داد کہ وو ظالم بے داد نہ آیا

جاری کیا ہوں جوے رواں اشک رواں سوں

افسوس کہ وو غیرت شمشاد نہ آیا

جس غم منیں موزوں کیا ہوں آہ کا مصرع

وو مصرع دل چسپ پری زاد نہ آیا

پہنچی ہے ہر اک گوش میں فریاد ولی ؔ کی

لیکن وو صنم سننے کوں فریاد نہ آیا

69

افسوس اے عزیزاں وو سیم بر نہ آیا

مجھ درد کی خبر سن وو بے خبر نہ آیا

بیمار پر برہ کے نہیں کُئی کہ مہرباں ہو

مجھ دکھ کے پوچھنے کو جز درد سر نہ آیا

مدت تلک جنگل میں دیوانہ ہو پھرا میں

آخر کوں وو پری رو میری نظر نہ آیا

آزاد سوں سُنیا ہوں یہ مصرعِ مناسب

’’جس سوں وو یار ملتا ایسا ہنر نہ آیا‘‘

کیوں عاشقاں کی صف میں پاویں وو سرخروئی

جن کی انکھیاں کے اوپر خون جگر نہ آیا

میں غم سوں گل سراپا جیوں مو ہوا ہوں لیکن

مجھ ناتواں کی جان وو مو کمر نہ آیا

عشاق متفق ہو کہتے ہیں جان و دل سوں

ہرگز زمیں کے اوپر تجھ سا بشر نہ آیا

کچھ نقد جاں کا کھونا تخصیص نئیں ولیؔ کی

نئیں کُئی کہ تجھ گلی میں دل کوں بِسر نہ آیا

70

بے داد ہے بے داد کہ وو یار نہ آیا

فریاد ہے فریاد کہ غم خوار نہ آیا

صد حیف ہے صد حیف کہ وو ناز و ادا سوں

یک بار مرے بر منیں دل دار نہ آیا

اغماض کیا، چلتا رہا، مجھ کوں نہ پوچھا

کیا اُس کوں مرے حال پہ کچھ پیار نہ آیا

میں جیوں کوں رکھیا عشق کے بازار میں لیکن

ہیہات مرے جیو کا خریدار نہ آیا

کیا ہے سبب اس وقت ولیؔ جیوکوں لینے

خنجر کوں لیے ہات میں خوں خوار نہ آیا

71

صد حیف کہ وو یار مرے پاس نہ آیا

میرا سخن راست اسے راس نہ آیا

بیگانی لگی بات یگانے کی عجب ہے

آخر کوں اُسے غیر سوں وسواس نہ آیا

بلبل کی نمط نالہ و زاری میں ہوں نس دن

افسوس وو گل دستۂ خوش باس نہ آیا

اس یار وفادار سوں مجھ آس تھی لیکن

ہرگز وو بجھانے کوں مری پیاس نہ آیا

میں انبہ نمط تن کوں گلایا ہوں اپس کے

وو باغ محبت کا اننّاس نہ آیا

جس باج مرے سینے پہ ہر آن ہے یک سال

اُس ماہ بناتن پہ مرے ماس نہ آیا

یو بات ولیؔ دل کی سیاہی سوں لکھا ہوں

وہ نور نین حیف مرے پاس نہ آیا

72

ترے بن مجکوں اے ساجن یو گھر اور بار کرناں کیا

اگر تو نا اچھے مجھ کَن تو یو سنسار کرناں کیا

مُنڈی گردن منے بھاکر اپس کے آپ منصف ہو

نگارا یو نچھ بک بک کراتا بیزار کرناں کیا

اَگے جب سوں نہ آنے کی تھی منسا من میں تمنا کے

تو مجھ سے دکھ بھری سوں پھر جھوٹا اقرار کرناں کیا

پتیارا نئیں ترے کہنے کا چپ حیران کرنا ہے

جو من میں نہینچھ ملنے کا تو پھر تکرار کرناں کیا

ترے آنے کی باٹ اوپر بچھاے ہوں میں انکھیاں کو

توں بیگی آ، کہ تجھ بن مجکوں یہ گھردوار کرناں کیا

تمھیں ملنے سوں گر اپنے سہاگن نا کروگے مجھ

تو جوڑا گجکری کا اور کریلا دھار کرناں کیا

جو کئی جالے پرت کی آگ میں تن من کو یوں اپنے

ولیؔ سنگم بنا، ایسے کوں پھر آدھار کرناں کیا

73

پرت کی کنٹھا جو پہنے اسے گھر بار کرناں کیا

ہوئی جوگن جو کئی پی کی اسے سنسار کرناں کیا

جو پیو نے نیر نیناں کا سے کیا کام پانی سوں

جو بھوجن دکھ کا کرتی ہے اسے آدھار کرناں کیا

سکھی تمنا کوں ارزانی یہ کسوت ہور زرینہ سب

وو ہے جو جیوں سوں بیزار اسے سنگھار کرناں کیا

خجالت کی گرد انجھواں کے پانی سوں گلابے میں

بنانے غم کے گھر مجکوں دوجا معمار کرنا کیا

نئیں کُئی دھرم دھاری جو کہے پیتم سوں سمجھا کر

کہ دکھیا کوں بجھوہی سوں اِتا بیزار کرناں کیا

محل دل کا تری خاطر بنایا ہوں میں دل جاں سوں

جدائی سوں اسے یک بارگی مسمار کرناں کیا

سہیلیاں جب تلک مجھ سوں نہ بولیں گے ولیؔ آکر

مجھے تب لگ کسی سوں بات ہور گفتار کرناں کیا

74

اہل گلشن پہ ترے قد نے جب امداد کیا

اوّلاً سرو غلامی ستی آزاد کیا

اس کی تعظیم ہوئی اہل چمن پر لازم

بلبل باغ نے جب مصحف گل یاد کیا

روز ایجاد تری چشم سوں اے نور نظر

حسن کہ فرد پہ دیوان ازل صاد کیا

جن نے عشاق کے چہرے کوں دیا رنگ نیاز

معنیِ ناز کوں تجھ قد ستی ایجاد کیا

سب سوں ممتاز ہوا سلسلۂ معنی میں

دل دیوانہ کوں جب عشق نے ارشاد کیا

سینۂ بلبل قمری کوں کیا مخزن درد

جب کہ اس سرو نے سیر گل و شمشاد کیا

آج تجھ یاد نے اے دلبر شیریں حرکات

آہ کوں دل کے اُپر تیشۂ فرہاد کیا

اے ولیؔ جب سوں کیا عشق میں تحصیل جنوں

روح مجنوں نے اپس کا مجھے استاد کیا

75

مستی نے تجھ نین کی مجھ بے خبر کیا

دل کوں مرے بھواں نے تری جیوں بھنور کیا

تیری نگہ کے تیر کی ہیبت کوں دل میں رکھ

سورج نے تن اپس کا سراسر سپر کیا

تجھ مہر کا ہوا ہے دل و جاں سوں مشتری

جب سوں ترے جمال پہ مہ نے نظر کیا

تب سوں ہوا ہے محمل لیلیٰ کی شکل دل

جب سوں ترے خیال نے دل میں گزر کیا

جیوں سرو بے خزاں ہے جہاں میں وو سبز بخت

تیرے قد بلند پہ جن نے نظر کیا

ہر شب تری زلف سوں مطول کی بحث تھی

تیرے دہن کوں دیکھ سخن مختصر کیا

حق تجھ عذار دیکھ کے سُر چاہے رنگ گل

پیدا ترے لباں ستی شہد و شکر کیا

دیکھا ہے یک نگہ میں حقیقت کے ملک کوں

جب بے خودی کی راہ میں دل نے سفر کیا

تیرا یو شعر جگ میں موثر ہے اے ولیؔ

تو دل منیں ہر ایک کے جاکر اثر کیا

76

دل میں جب عشق نے تاثیر کیا

فرد باطل خط تدبیر کیا

بند کرنے دل وحشت زدہ کوں

دام زہ زلف گرہ گیر کیا

موج رفتار نے تجھ قد کی صنم

سرو آزاد کوں زنجیر کیا

سبز بختوں میں اسے لکھتے ہیں

وصف تجھ خط کے جو تحریر کیا

جز الم اُس کوں نہ ہووے حاصل

عشق بے پیر کوں جو پیر کیا

شمع مانند جلی اس کی زباں

جن نے مجھ سور کی تقریر کیا

گریہ و گرد ملامت سوں ولیؔ

خانۂ عشق کوں تعمیر کیا

77

کشور دل کوں ترے ناز نے تسخیر کیا

فوج مجنوں کوں تری زلف نے زنجیر کیا

پیچ سوں نقد دل عاشق بے تاب کوں لے

زلف کوں اپنی پری رو نے گرہ گیر کیا

عاشق زار سمجھ مجھ سوں ہوا ہے بیزار

نقد دل دے کے میں دلدار کوں دلگیر کیا

نالۂ شوق نے شعلے کی زباں سوں جیوں برق

درس میں شوخ کے جا عشق کی تقریر کیا

کیونکہ ذرّات جہاں تجھ کوں پرستش نہ کریں

حق نے تجھ حسن کوں خورشید جہاں گیر کیا

گردِ غم آب نئیں، درد کے معمار نے لے

خانۂ عشق جگر سوز کوں تعمیر کیا

اے ولیؔ شوخ کی زلفاں کی سیاہی لے کر

قصہۂحال پریشاں کوں میں تحریر کیا

78

خدا نے مکھ پہ ترے باب حسن باز کیا

قد بلند کوں تیرے تمام ناز کیا

یو مکھ تراہے جیوں مسجد بھواں ہیں جیوں محراب

انکھیا سوں جا کے میں وھاں عشق کی نماز کیا

گھُلا ہوں شمع نمط اُس کے مکھ کے پرتو سے

کہ جس کی یاد کی آتش نے تن گداز کیا

فدا کیا ہوں یو قیامت اُپر دل و جاں کوں

کہ مجھ کوں شور قیامت سوں بے نیاز کیا

کمند شوق میں کھینچا ہے زہرہ رویاں کو

تری زلف کی حکایت کوں جو دراز کیا

مثال زلف پڑی دل کی فوج بیچ شکست

تری نگاہ نے جب آکے ترک تاز کیا

خدا دیا ہے مجھے صد ہزار عجز و نیاز

جو سرسوں پانوں تلک تجھ کوں شکل ناز کیا

ولیؔ اپس کے قدم بوس کے شرف سوں مجھے

ہزار شکر کہ دلبر نے سرفراز کیا

79

صحن گلشن میں جب خرام کیا

سرو آزاد کوں غلام کیا

حق ترا جگ میں کیوں نہ ہو حافظ

کہ تجھے حافظ کلام کیا

کاملیت کا تجھ کوں تھا دعویٰ

حق نے دعویٰ ترا تمام کیا

وو بھواں ہم سوں کیوں نہ ہوں بانکی

ماہ نو نے جسے سلام کیا

غمزۂ شوخ نے بہ نیم نگاہ

کام عشاق کا تمام کیا

حق نے تجھ قد کوں دیکھ مثل الف

خوش قداں کا تجھے امام کیا

کاف کوفی ہے تجھ کمر کا پیچ

جگ میں اس کو سرِ کلام کیا

تجھ دہن نے کہ میم معنی ہے

دل سیماب میں مقام کیا

تا کہے خلق تجھ کوں ماہ تمام

زلف تیری کوں حق نے لام کیا

گل رخاں خوف سوں ہوئے یکسو

تجھ نگہ نے جب اہتمام کیا

نام تیرا ولیؔ نے اے اکملؔ

شوق سوں درد صبح و شام کیا

80

تجھ زلف کے مشتاق کوں مشکِ عنبر سوں کام کیا

طالب جو تیرے لب کے ہیں اُن کوں شکّر سوں کام کیا

بوجھے ضرر کوں جو نفع اور نفع کوں بوجھے ضرر

اُس عاشق ممتاز کوں نفع و ضرر سوں کام کیا

جو بھید سوں محرم نئیں ہور طعن عاشق پر رکھے

یو عاشق جاں باز کوں اس بے خبر سوں کام کیا

غافل قیامت کے بھتر اپنے کیے کوں پائیں گے

جو کام کیتے یھاں درست ان کوں حشر سوں کام کیا

یو شعر سن دل سوں ولیؔ خطرہ گہر کا کاڑ سٹ

میرا سخن جس کَن اچھے اس کوں گہر سوں کام کیا

81

ہے قد ترا سراپا معنیِ ناز گویا

پوشیدہ دل میں میرے آتا ہے راز گویا

معنی طرف چلیا ہے صورت سوں یوں مرا دل

سورت ستی چلیا ہے کعبے جہاز گویا

ہر یک نگہ میں تیری ہے نغمۂ محبت

ہر تار تجھ نگہ کا ہے تارِ ساز گویا

اے قبلہ رو ہمیشہ محراب میں بھواں کی

کرتی ہیں تیری پلکاں مل کر نماز گویا

تیری کمر مصوّر چترا ہے اس ادا سوں

کیتا ہے صَرف اس میں ناز و نیاز گویا

تجھ زلف کوں جو بولیا ہم دوش مصرع قد

رکھتا ہے مجھ برابر فکر دراز گویا

وہ قاتل ستم گر آتا ہے یوں ولیؔ پر

جلدی سوں صید اوپر آتا ہے باز گویا

82

چشم دلبر میں خوش ادا پایا

عالم دل کوں مبتلا پایا

سیر صحرا کی توں نہ کر ہرگز

دل کے صحرا میں گر خدا پایا

جب نہ آیا تھا شکم مادر میں

ابتدا سوں نہ انتہا پایا

اسم اللہ وو میم احمد ہے

حق ستیں حق کوں حق نما پایا

حفظ کرنے کوں مصطفی رو کوں

فیہ خیراً و حافظا پایا

بعد شاہ نجف ولی اللہ

پیر کامل علی رضا پایا

اس معانی کوں بوالہوس ناداں

کیوں کے سمجھے ولیؔ نے کیا پایا

ردیف ’ب‘

83

ترے جلوے سوں اے ماہِ جہاں تاب

ہوا دل سر بسر دریاے سیماب

ترے مکھ کے سُرج کوں دیکھ جیوں برف

ہوئے ہیں عاشقاں سر تا قدم آب

رکھوں جس خواب میں تجھ لب اُپر لب

مجھے شکر سوں شیریں تر ہے وو خواب

تری نیناں وو قاتل ہیں کہ جن پاس

دو ابرو کی ہیں دو تیغ سیہ تاب

ولیؔ تجھ سوز میں اے آتشیں خو

سراپا ہے بہ رنگ شعلۂ بے تاب

84

کیوں ہوسکے جہاں میں ترا ہم سر آفتاب

تجھ حسن کی اگن کا ہے یک اخگر آفتاب

دیکھا جو تجھ کوں آپ سوں روشن جگت منیں

شرموں لیا نقاب زریں مکھ پر آفتاب

آیا ہے نقل لینے ترے مکھ کتاب کی

تار خطوط سیتی بنا مسطر آفتاب

گرمی سوں بے قرار ہو نکلیا سِنے کوں کھول

تجھ عشق کا پیا ہے مگر ساغر آفتاب

ہندو سُرج کوں دور سوں نت پوجتے ولے

ہندوے زلف کے ہے بغل بھیتر آفتاب

جن نے ترے جمال پہ کیتا ہے یک نظر

دیکھا نئیں وو پھر کے نظر بھر کر آفتاب

پوجا کوں تجھ درس کی ہو جوگی فلک اُپر

نکلیا ہے پہن جامۂ خاکستر آفتاب

تجھ مکھ کے آفتاب اُپر گر کرے نگاہ

پنہاں ہو ہر نظر ستی جیوں اختر آفتاب

جگ میں ولیؔ سو کس کوں برابر کہے ترے

ذرّے سوں ہے نزیک ترے کمتر آفتاب

85

ترے مکھ پر اے نازنیں یو نقاب

جھلکتا ہے جیوں مطلعِ آفتاب

ادا فہم کے دل کی تسخیر کوں

ترا قد ہے جیوں مصرعِ انتخاب

بجا ہے ترے حسن کی تاب سوں

تری زلف کھاتی ہے گر پیچ و تاب

نظر کر کے تجھ مکھ کی صافی اُپر

ہوئی شرم سوں آرسی غرقِ آب

ترے عکس پڑنے سوں اے گل بدن

عجب نئیں اگر آپ ہووے گلاب

ترے وصل میں اس قدر ہے نشاط

کہ مخمل کوں آئے سوں راحت خراب

کریں بخت میرے اگر ٹک مدد

ولیؔ اُس سجن سوں ملوں بے حجاب

86

جب سوں وو نازنیں کی میں دیکھا ہوں چھب عجب

دل میں مرے خیال ہیں تب سوں عجب عجب

جاتا ہے دن تمام اسی مکھ کی یاد میں

ہوتا ہے فکر زلف میں احوال شب عجب

قطعہ

بے تاب ہو کے مثل گدایاں نزیک جا

بے باک ہوکے تب یو کیا میں طلب عجب

دو نین سوں ترے ہے دو بادام کا سوال

سن یو سوال دل میں رہا پستہ لب عجب

بولیا مری نگاہ کی قیمت ہے دو جہاں

جس دیکھنے سوں دل میں ترے ہے طرب عجب

اس دولتِ عظیم کوں یوں مفت مانگنا

لگتی ہے بات مجکو تری بے ادب عجب

کیتا میں اس سوال میں دوجا بھی اک سوال

کر بہرہ مند لب سوں کہ تیرے ہیں لب عجب

یک بار اس سوال میں سن یہ دوجا سوال

دل میں رہا اپس کے وو شیریں لقب عجب

اوّل تو شوخ آکے غضب میں غصہ کیا

سر تا قدم وو ناز اُٹھا یو غضب عجب

جیو میں اپس کی ہمت عالی پہ کر نظر

شیریں لباں سوں اپنے چکھایا رطب عجب

اس شعر کی یہ طرح نکالا ہے جب ولیؔ

یو اختراع سن کے رہے دل میں سب عجب

87

ملیا وو گل بدن جس کوں اُسے گلشن سوں کیا مطلب

جو پایا وصل یوسف اُس کوں پیراہن سوں کیا مطلب

مجھے اسباب خود بینی سوں دائم عکس ہے دل میں

کیا جو ترک زینت کوں اسے درپن سوں کیا مطلب

سخن، صاحب سخن کے سن کے ملنے کی ہوس مت کر

جواہر جب ہوئے حاصل تو پھر معدن سوں کیا مطلب

عزیزاں باغ میں جانا نپٹ دشوار ہے مجھ کوں

گلی گل رو کی پایا ہوں مجھے گلشن سوں کیا مطلب

ولیؔ جنت منیں رہنا نئیں درکار عاشق کوں

جو طالب لا مکاں کا ہے اسے مسکن سوں کیا مطلب

88

ہوا تجھ غم سوں جاری شوق کا طومار ہر جانب

ہوا ہے گرم تیرے عشق کا بازار ہر جانب

تماشا دیکھ اے لیلیٰ کہ تیرے غم کی گردش میں

بگولے کی نمط پھرتا ہے مجنوں خوار ہر جانب

برہ میں دیکھ کر فرہاد پر شیریں کو سنگیں دل

اسی فریاد میں ہے رات دن کہسار ہر جانب

زبان حال سوں مجھ کوں کہا نرگس نے سمجھا کر

کہ اُس انکھیاں کے ہر گلشن میں ہیں بیمار ہر جانب

ہوا ہے مست اس کے جام لب سوں باغ میں لالہ

کہ جس کے مکھ کے جلوے سوں کھُلا گُل زار ہر جانب

تمسک مُہر سوں اس کی رکھا ہوں مِہر سوں دل میں

کہ جس کے خال و خط کی جگ میں ہے گفتار ہر جانب

تفحص کر کے دیکھا میں ہر اک کے مدرسے میں جا

اسی کے حسن کے مطلب کا ہے تکرار ہر جانب

ہر اک لبریز ہے خم تجھ محبت کے اثر سیتی

ہر اک ساغر تری نیناں سوں ہے سرشار ہر جانب

ولیؔ تجھ طبع کے گلشن میں جو کُئی سیر کرتے ہیں

وہ تحفہ کر لے جاتے ہیں گل اشعار ہر جانب

ردیف ’ت‘

89

مدّت کے بعد آج کیا جوں ادا سوں بات

کھلنے سوں اس لباں کے ہوا حلِّ مشکلات

دیکھے سوں آج مجھ پہ شباں روز نیک ہے

وو زلف و مکھ کہ جس سوں عبارت ہے دیس و رات

میٹھی تری یو بات اہے نت نبات ریز

گویا رکھے ہیں لب میں ترے مایۂ نبات

ظلمات سوں نکل کے جہاں میں عیاں اچھے

گر حکم لیوے لب سوں ترے چشمۂ حیات

تجھ ناز ہور ادا سوں مری یہ ہے عرض عرض

یا عین التفات ہو یا حکم التفات

تب سوں اُٹھا ہے دل سوں مرے غیر کا خیال

تیرا خیال جب سوں ہوا ہے مرے سنگات

اُس وقت مجھ کوں عیش دوعالم ملے ولیؔ

جس وقت بے حجاب کروں پیو سنگات بات

90

سبز چیرے نے ترے اے سبز بخت

زہر قاتل ہو کیا جیو لخت لخت

مجھ دل مجروح کے حق میں سجن

مت ہو جیوں الماس ہرگز سینہ سخت

حسن کے کشور کا توں ہے بادشاہ

ہے تجھے ناز و ادا کا تاج و تخت

مکھ اُپر تیرے ہے ایسا جھل جھلاٹ

جس کے دیکھے ہوش نے باندھیا ہے رخت

کر ولیؔ پر ٹک عنایت کی نظر

سن یو میرا حرف اے فرخندہ بخت

91

سجن ہے بسکہ تیرے حسن عالم گیر کی شہرت

سکندر کوں ہوئی حاصل مثال آرسی حیرت

چلیا دہشت سوں ڈرتا کانپتا مشرق سوں مغرب کوں

فلک اوپر سُرج جب سوں سنا تجھ حسن کی شہرت

نہ ہووے مرگ کی تلخی سوں ہرگز آشنا جگ میں

تری شیریں زبانی کا ملے عاشق کوں گر شربت

تری انکھیاں کی گردش نے کیا ساغر سرگرداں

تری زلفاں کے حلقے نے کیا گرداب کوں چکرت

جگت کے دل ربایاں کا ہوا تجھ میں ظہور آکر

زُلف ہے کشن، رخ بدری و لب مصری سخن امرت

نہ ڈھونڈو شہر میں فرہاد و مجنوں کا ٹھکانا تم

کہ ہے عشاق کا مسکن کبھو صحرا کبھو پربت

ولیؔ کوں اے سجن گاہے عطا کر بھیک درسن کی

دیا ہے لطف سوں تجھ کوں خدا نے حسن کی دولت

92

سینے میں ہے تجھ ابروے پیوست کی نشست

جیوں تیر دل میں ہے نگہ مست کی نشست

تجھ زلف کج کا دل منیں بیٹھا ہے یوں خیال

ماہی کے جیوں گلے منیں ہے شِست کی نشست

تیرے دو نین دل میں مرے فتنہ خیز ہیں

مشکل ہے ایک ٹھار دو بدمست کی نشست

تیری نگہ کے باز سوں ہے مرغ دل کا حال

جیوں تن پہ ناتواں کے زبردست کی نشست

تا سرخ رنگ کوں زرد کرے اس سبب یو غم

دل میں ولیؔ کے مس میں ہے جیوں جست کی نشست

93

زباں حال سوں کہتا ہے یوں شمشاد ہر ساعت

پڑیں گے قید میں اس قد کوں دیکھ آزاد ہر ساعت

بچے گا کب تلک اے طائر دل زور وحشت سوں

نگہ کا دام لے آتا ہے وو صیّاد ہر ساعت

ہوا ہے جب ستی پروانہ دل اے شمع رو تیرا

نگہ تجھ چشم کَن جاتی ہے بہر صاد ہر ساعت

اپس کی چشم مے گوں سوں دکھا کر گردش ساغر

صنم کرتا ہے میرے ہوش کوں برباد ہر ساعت

ترا خط خوف میں ہے ہاتھ سوں مقراض کے دائم

کہ جیوں رکھتا ہے کودک دہشتِ استاد ہر ساعت

نہیں یک عاشق و معشوق اس کے درد سوں خالی

گل و بلبل سوں سنتا ہوں یہی فریاد ہر ساعت

ولیؔ مجھ دل میں بستا ہے خیال اُس سرو قامت کا

کہ جس کے شوق سوں جنبش میں ہے شمشاد ہر ساعت

94

لب ترے پر کہ روح کا ہے قوت

کاتب ناز نے لکھا ہے سکوت

نشہ بخشی میں مے سوں بہتر ہے

تجھ لباں کی مفرحِ یاقوت

اس کے دیکھے سوں کیوں رہے طاقت

جس کی باتاں سوں دل ہوا مبہوت

جو مُوا داغ عشق سوں اُس کوں

تختۂ لالہ سوں کرو تابوت

اے ولیؔ سبزۂ لب دلبر

خوش نمائی میں ہے خط یاقوت

95

کیا اس بات نے مجھ دل کو مبہوت

کہ کیوں آتا نئیں وو روح کا قوت

بجا ہے گر شہید سرو قد کوں

بناویں چوب سوں طوبیٰ کی تابوت

روایت خضر سوں پہنچی ہے مجھ کوں

کہ اُس کا خط ہے موج آب یاقوت

دسے پلکاں سوں تجھ انکھیاں کی یو دھج

کہ جیوں برچھی پکڑ نکلے ہیں رجپوت

ولیؔ اس خوش بچن کی بات سر کر

کہ اُس کی بات ہے عشاق کا قوت

96

گمراہ ہیں تجھ زلف میں کئی اہل ہدایت

یہ باٹ ہے ظلمات کی نئیں جس کوں نہایت

غمزے نے کیا ظلم مرے دل پہ سو تس پر

کرتے ہیں ترے نین دو ظالم کی حمایت

عشاق کا ہے خون روا عشق کی رہ میں

تجھ نین کے مفتی سوں سُنیا ہوں یہ روایت

یو مکھ ہے ترا موردِ انوار الہٰی

نازل ہے ترے حسن پہ سب حق کی عنایت

ہر درد پہ کر صبر ولیؔ عشق کی رہ میں

عاشق کو نہ لازم ہے کرے دکھ کی شکایت

97

خوباں کی ہر ادا سوں ہے نازک اداے بیت

معنی ستی بنا ہے نقابِ حیاے بیت

مت شعر پر تو چشم حقارت سوں کر نظر

مانند ابرو واں کے انکھیاں پر ہے جاے بیت

معنی کی صورت اس منیں ہوتی ہے جلوہ گر

روشن ہے آرسی سوں رخِ باصفاے بیت

وو مصرعِ بلند ہے معنی میں مہرباں

لیاتا ہے چیں بھواں منیں ظاہر براے بیت

اس کے سوادِ زلف سوں عالم میں اے ولیؔ

کعبہ نمن سیہ ہے سراپا رداے بیت

ردیف ’ث‘

98

ملتا نئیں ہے مجھ سوں وو دل دار الغیاث

اس بے وفا کے جور سوں صد بار الغیاث

مجھ دل کا دیکھ حال پریشاں ہو آپ سوں

کرتے ہیں تیری زلف کے ہر تار الغیاث

نئیں دیکھتا ہے باغ میں نرگس کوں اے صنم

تیری انکھیاں کا آج طلب گار الغیاث

تیری نَین کوں دیکھ کے گلشن میں گل بدن

نرگس ہوا ہے شوق سوں بیمار الغیاث

بازار میں جہاں کے نہیں کوئی اے ولیؔ

تیرے سخن کا آج خریدار الغیاث

99

شوخ میرا بے میا ہے الغیاث

صاحب جور و جفا ہے الغیاث

وو صنوبر قامتِ گل زار حُسن

محشر ناز و ادا ہے الغیاث

اس کماں ابرو کا ہر تیر نگہ

جیوں خدنگِ بے خطا ہے الغیاث

پائمال قاتل رنگیں ادا

خون عاشق جیوں حنا ہے الغیاث

ہوں پیا کے شربت لب بِن مریض

جس میں گل قند شفا ہے الغیاث

جن نے دیوانہ کیا ہے خلق کوں

وو پری رو کیا بلا ہے الغیاث

بلبل باغ وفا ہوں میں ولیؔ

گل سراپا بے وفا ہے الغیاث

100

کدھی میری طرف لالن تم آتے نئیں سو کیا باعث

چھبیلا مکھ اپس کا ٹک دکھاتے نئیں سو کیا باعث

جدائی کے پھنسا ہوں دام میں بولو مرے شہ کوں

کہ مجھ اس دکھ کے پھاندے سوں چھڑاتے نئیں سو کیا باعث

کیا سب زندگانی کوں فدا تیری محبت میں

اجھوں لگ بات اپس دل کی سناتے نئیں سو کیا باعث

ہوا ہے دل مرا مخمور تیرے غم سوں اے ساجن

اپس کے نین سوں پیالا پلاتے نئیں سو کیا باعث

ولیؔ اس بات کا افسوس ہے مجھ دل منیں دائم

کہ میری بات کوں خاطر میں لاتے نئیں سو کیا باعث

ردیف ’ج‘

101

ہے جلوہ گر صنم میں بہارِ عتاب آج

لینا ہے اس کے ناز و ادا کا حساب آج

عالم کا ہوش کیوں کے رہے گا عجب ہوں میں

چکتا ہے اس کی نین سوں رنگ شراب آج

کیا ناز و کیا غرور ہے اُس نو بہار میں

دیتا نئیں سلام کا میرے جواب آج

کیوں مو نمن ضعیف نہ ہوں غم سوں اے صنم

تیری کمر نے مجھ کوں دیا پیچ و تاب آج

تیرے انگے لباں کے کہ ہیں چشمۂ حیات

لگتا ہے آب خضر مثال سراب آج

اُس کی نگاہ مست سوں معلوم یوں ہوا

یکسر کرے گی خانۂ عاشق خراب آج

اعجاز حسن دیکھ کہ وو روے با عرق

پیدا کیا ہے چشمۂ آتش سوں آب آج

کیا بے خبر ہوا ہے معلّم صنم کوں دیکھ

مکتب میں اُس کے بھول گیا ہے کتاب آج

معلوم نئیں کہ ہاتھ میں شمشیر لے صنم

آتا ہے کس کے قتل کوں ایتا شتاب آج

کیا آرزوے وصل کروں اس سوں اے ولیؔ

دیتا نئیں ہے ناز سوں سیدھا جواب آج

102

ہے حسن کے نگر میں سجن تجھ کوں راج آج

خوش دلبری کا تجھ کوں ملا تخت و تاج آج

اس ناز ہور ادا کے تجمل کوں دیکھ کر

سب دل براں نے آکے دیا تجھ کوں باج آج

پروانہ ہو کے کیوں نہ گرے چاند چرخ سوں

فانوس دل میں شوق ترا ہے سراج آج

تجھ زلف کی زنجیر پہ رکھ دانت فیل مست

کس بھید سوں کنگھی کوں دیا آکے عاج آج

مقصود دوجہاں منیں میرا سو تونچہ ہے

جگ میں نئیں کسی سوں ترے باج کاج آج

لب میں ترے مفرح یاقوت ہے سجن

بیمار دل مرے کوں وہی ہے علاج آج

وو شوخ مجھ کوں آکے ملا اس سبب ولیؔ

شادی میں اس کی صرف کیا ہوں میں لاج آج

103

جولاں گری میں گرم ہے وو شہسوار آج

سینے سوں عاشقاں کے اُٹھے ہے غبار آج

تجھ اسپ برق تاز کی جولاں کوں دیکھ دل

مانند بیجلی کے ہوا بے قرار آج

بے شک کرے گا خاطرِ عشاق باغ باغ

آیا ہے التفات پہ وو نو بہار آج

گل زار تجھ جمال کا گلشن میں دیکھ کر

قرباں ہیں عندلیب ہزاراں ہزار آج

سینے کے رکھ طبق میں دل چاک چاک کوں

لایا ہوں میں نیاز بجاے انار آج

اے آتشیں بہار ترے مکھ کی آب دیکھ

پیدا کیا ہوا کوں دل خاک سار آج

ہیں بے شمار دل میں مرے خار خار شوق

چیرے کوں دیکھ سر پہ ترے نوک دار آج

گردش ترے نین کی کہ جوں دور جام ہے

دیکھے سوں اس کے دل کا گیا ہے خمار آج

تیرے نین نے یک نگہِ التفات سوں

عالم کے وحشیاں کو کیا ہے شکار آج

اطراف آسماں کے ہجوم شفق نہیں

تجھ رنگ نے ہوا کوں کیا لالہ زار آج

برجا ہے آسماں سوں تواضع طلب کرے

پایا ہے تجھ کرم سوں ولیؔ اعتبار آج

104

دیکھے سوں تجھ لباں کے اُپر رنگِ پان آج

چونا ہوئے ہیں لالہ رخاں کے پَران آج

نکلا ہے بے حجاب ہو بازار کی طرف

ہر بوالہوس کی گرم ہوئی ہے دُکان آج

تیرے نین کی تیغ سوں ظاہر ہے رنگ خوں

کس کوں کیا ہے قتل اے بانکے پٹھان آج

آخر کوں رفتہ رفتہ دل خاک سار نے

تیری گلی میں جاکے کیا ہے مکان آج

اعجاز عشق دیکھ کر مجھ ناتواں اُپر

اس سنگ دل کے دل کوں کیا مہربان آج

کل خط زبان حال سوں آکر کرے گا عذر

عاشق سوں کیا ہوا جو کیا تونے مان آج

البتہ گل پیادہ ہو دوڑیں رکاب میں

اس نو بہار حسن کی دیکھیں جو شان آج

تیری بھواں کوں دیکھ کے کہتے ہیں عاشقاں

ہے شاہ جس کے نام چڑھی یو کمان آج

گنگا رواں کیا ہوں اپس کے نین ستی

آ اے صنم شتاب ہے روزِ نہان آج

اے عقل مو شگاف تامل سوں کر نظر

آتا ہے کس ادا سوں وو نازک میان آج

کیوں دائرے سوں زہرہ جبیں کے نکل سکوں

یک تان میں لیا ہے مرے دل کو تان آج

میرے سخن کوں گلشن معنی کا بوجھ گُل

عاشق ہوئے، ہیں بلبل رنگیں بیان آج

جو دھا جگت کے کیوں نہ ڈریں تجھ سوں اے صنم

ترکش میں تجھ نین کے ہیں ارجن کے بان آج

جاناں کوں بسکہ خوف رقیباں ہے دل منیں

ہوتا ہے جان بوجھ ہمن سوں آجانا آج

تجّارِ حسن پاس ہیں وو لعلِ بے بہا

اس جنس آب دار کا لینا ہے دان آج

شعلے کوں دل کے سہج ہے جانا فلک اُپر

برپا کیا ہوں آہ سوں میں نردبان آج

کیوں کر رکھوں میں دل کوں ولیؔ اپنے کھینچ کر

نئیں دست اختیار میں میرے عنان آج

ردیف’ ح‘

105

دستا ہے تجھ جبیں سوں سراسر ظہور صبح

تجھ دیکھنے کوں جگ میں ہوا ہے عبور صبح

بے تاب آفتاب ہے تب سوں جہاں منیں

دیکھا ہے تجھ کوں جب ستی اے رشک نور صبح

تجھ مکھ کی آرسی میں ہے نور خدا عیاں

روشن ہے تجھ جمال ستی کوہ طور صبح

ظاہر ہیں تجھ بہار میں اسباب عیش کے

ہے جلوہ گر یوں تجھ ستی دار السرور صبح

تجھ مکھ کا نور جب سوں تماشا کیا ولیؔ

کڑوا لگا ہے تب سوں جگت میں مرور صبح

106

برنگ صافی دل کیوں ہو صفاے قدح

کہ دست آئینہ رو ہے مدام جائے قدح

زہے طرب کہ ہوا بزم عیش میں دم ساز

صنم کے لعل سوں یاقوت بے بہاے قدح

کیا ہے ساقی عشرت بہار الفت سوں

حناے پنجۂ رنگیں نگار پاے قدح

اگر اشارت ابرو کرے وو ماہ تمام

ہلال بزم میں ہو چرخ زن بجاے قدح

خمار حشر سوں کیا غم ہے مے پرستاں کوں

لکھے جو قبر کے تعویذ پر دعاے قدح

سدا ہے اس خم نیلی سوں جوش زن یہ بات

کہ نقد ہوش فلاطوں ہے رونماے قدح

ہوا ہے قلقل مینا سوں مجھ اُپر ظاہر

کہ مئے پرست کے سینے میں ہے ثناے قدح

ہوا ہے صبح کے مانند آفتاب ضمیر

عیاں ہے جس کے اُپر جلوۂ ضیاے قدح

ولیؔ کے دل ستی اے شوخ احتراز نہ کر

ہمیشہ انجمن گل رخاں ہے جاے قدح

ردیف ’خ‘

107

سجن اَول کے زمانے میں یوں نہ تھا گستاخ

اسی دنوں میں ہوا ہے یو کیا بلا گستاخ

چمن میں مکھ کے ترے مثل تاک ہے سرکش

اپس کے مکھ پہ نہ کر زلف کوں اِتا گستاخ

ترے یو لب پہ خط سبز کیا ہے بوجھ اسے

شکر اُپر ہے یو طوطئی خوش ادا گستاخ

یو رنگ زرد اُڑا مجھ ضعیف کوں لے کر

ہوا ہے کاہ لے جانے یو کہر با گستاخ

ولیؔ کے دل میں ہے شوخی سو تجھ ہوا کی اِتی

تری زُلَف پہ ہوئی جس قدر ہوا گستاخ

108

مژہ بتاں کی ہیں تجھ غم میں خواب مخملِ سرخ

لگی ہے ترک کے پٹکے کوں یا مسلسلِ سرخ

سجن کی دیکھ کے میں چشم سرخ خواب آلود

اپس انکھیاں کوں کیا خواب گاہ مخمل سرخ

کتاب عشق پہ شنگرف اشک خونیں سوں

پلک کی کر کے قلم کھینچتا ہوں جدولِ سرخ

کیا ہے دفع مرے درد سر کوں رونے نے

ہوا ہے حق میں مرے خون دیدہ صندلِ سرخ

شفق نہ بوجھ کہ مجھ آہِ آتشیں نے ولیؔ

فلک کوں جا کے کیا ہے برنگ مِن قلِ سرخ

ردیف’ د‘

109

ہمیشہ ہے بہار سرو آزاد

نہ جاوے دولت حسن خدا داد

ترے رخ سوں کہ دائم بے خزاں ہے

ہوا ہے زیب ور گُل زار ایجاد

ہوا مانند مجنوں مو پریشاں

ترا قد دیکھ کر گلشن میں شمشاد

کیا ہوں سہو راہ کوچۂ غم

ہوا ہوں بسکہ تیرے لطف سوں شاد

خلاصی کیوں کہ پاوے بلبل دل

نگاہ مہرباں ہے دام صیّاد

وفا کوں ترک مت کر ہرگز اے دل

محبت ہے وفا بِن سست بنیاد

تجھ گل بدن پہ جگ کے ہوئے گل عذار بند

ولیؔ جس دل میں ہے زلف پری زاد

110

تجھ گل بدن پہ جگ کے ہوئے گل عذار بند

گلشن میں تجھ بہار کے ہے نو بہار بند

گل زار میں لٹک کے چلے گر تو یک قدم

مانند آبِ آئنہ ہو جوئبار بند

مالی نے تجھ جمال کے گلشن کوں دیکھ کر

بیچا لجا کے شہر میں پھولاں کے ہار بند

تیری نین پہ دیکھ میں آہو کوں مبتلا

بوجھا کہ تجھ نکھ میں ہے وحشت شعار بند

ہے تجھ شکار بند کی ہر یک کوں آرزو

خوش وو شکار جن کو ملے یو شکار بند

تجھ قد کوں دیکھ سرو ہے گلشن میں پا بہ گِل

آزاد یاں ہوا ہے سو بے اختیار بند

امید مجھ کوں یوں ہے ولیؔ کیا عجب اگر

اس ریختے کو سن کے ہو معنی نگار بند

111

جب سوں ہوا ترا یو قدِ دل رُبا بلند

سنتا ہوں ہر طرف سوں صداے بلا بلند

مت پست فطرتاں سوں مل اے سرو نازنیں

تجھ قد کا نام جگ میں ہے نام خدا بلند

بیمار گر نئیں یہ تری چشم غمزہ زن

کیوں ہاتھ میں لیے ہیں نگہ کا عصا بلند

تجھ ابرواں کوں دیکھ کے کیتا ہے اے صنم

تجھ حق منیں ہلال نے دست دعا بلند

گلزار زندگی میں بجز وصل سرو قد

عشاق کوں نئیں ہے دوجا مدعا بلند

یو آفتاب نئیں کہ عیاں ہے فلک اُپر

حق نے کیا جہاں میں ترا نقش پا بلند

میں عاشقاں کی فوج کا سردار ہوں ولیؔ

مجھ آہ کا ہوا ہے علم تا سما بلند

112

ہوا ہے گرم توں جب آفتاب کے مانند

کیا ہے ہوش نے پرواز آب کے مانند

زمیں پہ کیوں نہ گریں اہل بزم جرعہ نمن

تری نگہ میں ہے مستی شراب کے مانند

نگاہ گرم کرے گر فلک کے گلشن میں

گُلِ ستارہ گریں گل گلاب کے مانند

سجن کے غم سوں نکلتا ہے نالۂ بے تاب

ہر ایک رگ ستی تار رباب کے مانند

بہ رنگ برق اگر جلوہ گر ہووے گل رو

غبار سینہ ہو پانی سحاب کے مانند

توقع قدم شہسوار دل میں رکھ

ہوا ہوں خالی اپس سوں رکاب کے مانند

لکھا ہوں بسکہ پری رہ کی زلف کی تعریف

سیاہ نامہ ہوا ہوں کتاب کے مانند

ترے فراق میں ہر آہ اے کماں ابرو

گئی ہے چرخ پہ تیر شہاب کے مانند

ترے خیال میں اے بحر حسنِ دیدۂ تر

ہوئے ہیں آب سراپا حباب کے مانند

کیا ہے طرز تغافل نے شوخ کے جگ میں

ہر ایک چشم کوں تسخیر خواب کے مانند

نہ کر سوال مرے درد کی حکایت کا

کہ مجھ زبان پہ ہے حاضر جواب کے مانند

نہ بھول گرم نگاہی پہ شوخ چشماں کی

محبت ان کی ہے دھوکا سراب کے مانند

گر آبرو کی ہے خواہش کسی کی نعمت پر

نہ کھول حرص کے دیدے کو قاب کے مانند

نہ ہو تو فکرسوں دنیا کی مو نمن باریک

سیاہ دل کو کرے گی خضاب کے مانند

نگاہ گرم سوں اس شعلہ قد نے مجلس میں

کیا برشتہ ولیؔ کوں کباب کے مانند

113

تیری نین کی سختی ہے دلبری کے مانند

تیری نگاہ موزوں ہے عبہری کے مانند

ظاہر نئیں کسی پر تجھ لعل کی حقیقت

واقفیت ہوا ہوں اُس سوں میں جوہری کے مانند

ہرچند رنگ زردی حاصل ہے عاشقوں کوں

لیکن شگفتہ رو ہیں گل جعفری کے مانند

طاقت نئیں کسی کوں تا اس صنم کوں دیکھے

عالم کی ہے نظر سوں پنہاں پری کے مانند

یہ ریختہ ولیؔ کا جاکر اُسے سناؤ

رکھتا ہے فکر روشن جو انوریؔ کے مانند

114

چنچل کوں جا کے بولو آ بیجلی کے مانند

اس وقت انکھیاں برستی ہیں بادلی کے مانند

سوزن سوں تجھ پلک کی اے نور جان و دیدہ

ہر استخواں میں روزن ہے بانسلی کے مانند

عالم میں جس کے سر پر گل دستۂ ادب ہے

وو کیوں کہے چمن کو تیری گلی کے مانند

گر آرزو ہے تجھ کوں مقصد کے گل کے کھلنا

ٹک بند کر زباں کوں مکھ میں کلی کے مانند

مشتاق تجھ درس کا اے شمع بزم خوبی

دیکھا نئیں ہے دوجا ہرگز ولیؔ کے مانند

115

سخن شناس کے نزدیک نئیں ہے کم ز یزید

کسی کے مطلب رنگیں کوں جو کیا ہے شہید

یہ زلف و خال سیہ نے دیا ہے جگ کوں فریب

دغا کے دینے میں یک رنگ ہیں یہ پیر و مرید

کھلا ہے عقدۂ دل تجھ پلک کی سوزن سوں

ترے نَین کا اشارہ ہے قفل دل کی کلید

ہوا ہے مشتری اُس رشک مشتری کا دل

کیا جو اہل خرد کے ہزار دل کوں خرید

ہوا ہے حق کی توجہ سوں اے ہلال ابرو

ترا جمال منور ولیؔ کے دل کی عید

ردیف’ ذ‘

116

اے شکر لب قند سوں تجھ لب کی ہیں باتاں لذیذ

حرف تر اس کے ہیں جیسے حلوۂ سوہاں لذیذ

دل کوں فرحت بخش ہے دائم ترے غم کا ہجوم

صاحب ہمت کوں نت ہے کثرت مہماں لذیذ

مت ہر اک نا اہل کے ملنے سوں راضی ہو صنم

ہے نصیحت تلخ ظاہر لیک ہے پنہاں لذیذ

لذت معنی نہیں کچھ لذت صورت سوں کم

حرف با معنی ہے جیسے بوسۂ خوباں لذیذ

اے ولیؔ معنی نہیں کچھ لذت صورت سوں کم

جیوں ہے دنیا دار کوں فکرِ سرو ساماں لذیذ

ردیف’ ر‘

117

گر چمن میں چلے وو رشک بہار

گل کریں نقد آب و رنگ نثار

بلبلاں ہر طرف سوں اُٹھ دوڑیں

دیکھنے کوں اُسے ہزار ہزار

یاد تجھ خط سبز کی اے شوخ

زخم دل پر ہے مرہم زنگار

حق نے تیری انکھیاں کوں بخشا ہے

مئے وحشت سوں ساغر سرشار

جن نے دیکھا ہے اس پری رو کوں

صورت ہوش سوں ہوا بیزار

تجھ درس کے خیال میں دائم

مثل نیساں ہے چشم گوہر بار

تجھ لب آگے اے مشتری طلعت

آب حیواں کا سرد ہے بازار

بسکہ پایا ہے تجھ جفا سوں شکست

خانۂ دل ہوا ہے آئینہ زار

اے ولیؔ اس سوں حرف ہوش نہ پوچھ

جو ہوا مستِ جلوۂ دیدار

118

مجھ کوں پہنچی اس شکر لب کی خبر

حق شکر خورے کوں دیتا ہے شکر

بوعلی سینا اگر دیکھے اسے

قاعدے حکمت کے سب جائے بِسر

سات پردوں میں رکھوں اس کوں چھپا

آوے گر انکھیاں میں وو نور نظر

مجھ کوں سب عالم کہے باریک بیں

گر لگے ٹک ہاتھ وو نازک کمر

اس لباں کا اے ولیؔ طالب ہے دل

جس کے غم سوں لعل ہے خونیں جگر

119

آیا توں کمر باندھ کے جب جور و جفا پر

میں جی کوں تصدق کیا تجھ بانکی ادا پر

مجھ دیدۂ خوں بار میں یک بار قدم رکھ

اے شوخ ترا جیو ہے گر رنگ حنا پر

انکھیا ہیں یہ خوبان جہاں کی کہ لگی ہیں

بوٹے نئیں نرگس کے صنم تیری قبا پر

تشبیہ جو تجھ خط کوں دیا مشک ختن سوں

عالم کوں وو آگاہ کیا اپنی خطا پر

دشوار ہے حیرت سوں ولیؔ اس کوں نکلنا

باندھا ہے جو دل اُس رخ آئینہ نما پر

120

کیتا ہے نظر جب ستی اس رشک پری پر

باندھیا ہے جو کُئی جیوں کوں اُس چھند بھری پر

دیکھے سوں ترے داغ کے جلوے کوں جگر پر

کیا خوب اُٹھا نقش عقیق جگری پر

چنچل نے نظر ناز سے آہو پہ کیا نئیں

قرباں ہوا اس چشم کی والا نظری پر

ہموار کیا آپ اُپر ترک وفا کوں

باندھیا ہے کمر ناز سوں اب حیلہ گری پر

بوجھا ہے ولیؔ تب ستی موہن نے سُرج کوں

کیتا ہے نظر جب ستی دستار زری پر

121

سجن تجھ گل بدن کا آج نئیں ثانی چمن بھیتر

غلط بولا چمن کیا بلکہ جنّات عدن بھیتر

ترے گلزار رنگیں کا جو کُئی مقتول ہے اے گل

وو اپنے خوں میں جیوں گل غرق ہے خونیں کفن بھیتر

پڑی ہے دل میں پروانے کے تیرے عشق کی آتش

ہوئی ہے شمع تیرے مکھ سوں روشن انجمن بھیتر

تو وو گل پیرہن ہے مصر میں خوبی کے اے موہن

کہ لاکھاں دل کے یوسف ہیں ترے چاہ ذقن بھیتر

چمن میں اس سبب جاتا ہوں اے رشک ہزاراں گل

کہ تیری باس کی پاتا ہوں ٹک بو یا سمن بھیتر

سراپا زندگانی کوں جلاتی ہے ترے شوقوں

عجب تجھ عشق کی گرمی ہے شمع شعلہ زن بھیتر

یہ مکھ کی شمع سوں روشن ہے ہفت اقلیم کی مجلس

ولیؔ پروانگی کرتا تری ملکِ دکن بھیتر

122

اب جدائی نہ کر خدا سوں ڈر

بے وفائی نہ کر خدا سوں ڈر

راست کیشاں سوں اے کماں ابرو

کج ادائی نہ کر خدا سوں ڈر

مت تغافل کوں راہ دے اے شوخ

جگ ہنسائی نہ کر خدا سوں ڈر

ہے جدائی میں زندگی مشکل

آ جُدائی نہ کر خدا سوں ڈر

آرسی دیکھ کر نہ ہو مغرور

خود نمائی نہ کر خدا سوں ڈر

اُس سوں جو آشنائے درد نہیں

آشنائی نہ کر خدا سوں ڈر

رنگ عاشق غضب سوں اے ظالم

کہربائی نہ کر خدا سوں ڈر

اے ولیؔ غیر آستانۂ یار

جبہہ سائی نہ کر خدا سوں ڈر

123

سنایا جب خبر شادی کی قاصد صبح دم آکر

منگا رخصت مرے نزدیک باہر دل سوں غم آکر

ترے ملنے سوں تا روشن کرے دل کی مجالس کوں

ہوئی ہے شعلہ زن سینے میں خواہش دم بدم آکر

بجز تجھ جام لب کے اے پری پیکر نہ پیوں ہرگز

اگر دیوے اپس کے ہاتھ سوں مجھ جام جم آکر

نظارہ جو کیا میں تجھ مبارک حسن کا موہن

کھبا مجھ دل میں تیری زلف خم در خم کا خم آکر

ولیؔ تجھ حسن کی تعریف میں جب ریختہ بولے

سنے تب اُس کوں جان و دل سوں حسّانِ عجم آکر

124

اگر گلزار میں بیٹھے وو سرو نازنیں آکر

کرے نظاّرگی اس کی سو فردوس بریں آکر

اگر ہووے صنم خانے پہ اس بت کا گزر بیشک

تصدق اس پہ ہوویں سب نگارستاں چیں آکر

عجب اُس شوخ چنچل کی انکھاں ہیں شوخ اور چنچل

ہوے قرباں جس اوپر آہوے صحرا نشیں آکر

کرے شیرازہ بندی دل کی جو اس مکھ کے دیکھے سوں

پریشاں ہو اگر دیکھے وو زلف عنبریں آکر

عجب نئیں جال میں اس کے اگر اٹکا ولیؔ کا دل

کہ اس کے دام میں لاکھاں پھنسے ہیں اہل دیں آکر

125

پڑا ہوں کوہِ غم میں اس دل ناشاد سوں جاکر

دعا بولو مری جانب سوں کُئی فرہاد سوں جاکر

برہ کے ہاتھ سوں گرداب غم میں جا پڑا ہے دل

کہو میری حقیقت چرخ بے بنیاد سوں جاکر

گرفتاراں کی غم خواری اِتا لازم ہوئی تجھ پر

حقیقت مرغ دل کی یوں کہو صیّاد سوں جاکر

کیا ہے خون نے سودا کے غلبہ تن منیں میرے

نگہ کے نیشتروں کوں لا کہو فصّاد سوں جاکر

ولیؔ اُس قد کا طالب ہے مبارک باد آ بولو

کہو سمجھا کے گلشن میں ہر اک شمشاد سوں جاکر

126

عاجزاں کے اُپر ستم مت کر

اس قدر سختی اے صنم مت کر

اس ترقی کے وقت میں اے شوخ

مہربانی اپس کی کم مت کر

رحم بے جا ستم برابر ہے

یوں رقیباں اُپر کرم مت کر

اِس نصیحت کوں گوش جاں سوں سُن

دل کوں میرے مکانِ غم مت کر

رام تجھ امر کا ہوا ہے ولیؔ

گر ہے انصاف اس سوں رم مت کر

127

چمن میں جب چلے اُس حسن عالم تاب سوں اُٹھ کر

کرے تعظیم خوش بو ہر گل سیراب سوں اُٹھ کر

کرے گر آرسی گھر میں لجا تجھ مکھ کی مہمانی

دُھلاوے ہات کوں تیرے اپس کی آب سوں اُٹھ کر

ترے ابرو کی گر پہنچے خبر مسجد میں زاہد کوں

تماشا دیکھنے آوے ترا محراب سوں اُٹھ کر

ترے پانواں کی نرمی کی اگر شہرت ہو عالم میں

وہیں آوے قدم بوسی کوں مخمل خواب سوں اُٹھ کر

ولیؔ تجھ زلف کی کر سحر سازی کا بیاں بولے

چلے پاتال سوں باسُک سو پیچ و تاب سوں اُٹھ کر

128

میں تجھے آیا ہوں ایماں بوجھ کر

باعث جمعیتِ جاں بوجھ کر

بلبل شیراز کوں کرتا ہوں یاد

حسن کوں تیرے گلستاں بوجھ کر

دل چلا ہے عشق کا ہو جوہری

لب ترے لعل بدخشاں بوجھ کر

ہر نگہ کرتی ہے نظاّرے کی مشق

خط کوں تیرے خطِّ ریحاں بوجھ کر

اے سجن آیا ہوں ہو بے اختیار

تجھ کوں اپنا راحتِ جاں بوجھ کر

زلف تیری کیوں نہ کھاوے پیچ و تاب

حال مجھ دل کا پریشاں بوجھ کر

رحم کر اُس پر کہ آیا ہے ولیؔ

درد دل کا تجھ کوں درماں بوجھ کر

129

اے بادِ صبا باغ میں موہن کے گزر کر

مجھ داغ کی اُس لالۂ خونیں کوں خبر کر

کیا درد کسی کوں کہ کہے درد مرا جا

اے آہ مرے درد کی توں جا کے خبر کر

سب طرز تغافل کوں مرے حق میں روا رکھ

اے شوخ مری آہ سوں البتہ حذر کر

دوجا نہیں تا پی سوں کہے دل کی حقیقت

اے درد تو جا جیو میں اُس پی کے اثر کر

کیا غم ہے اُسے تیر حوادث سوں جہاں میں

بوجھا جو کوئی گردش ساغر کوں سپر کر

کئی بار لکھا اس کی طرف نامے کوں لیکن

ہر بار سٹا اشک نے مجھ نامے کو تر کر

ہر وقت نہ سٹ کحل تغافل کوں انکھاں میں

ٹک مہر سوں اس طرف اےبے مہر نظر کر

اس صاحب دانش سوں ولیؔ ہے یہ تعجب

یک بارگی کیوں مجھ کوں گیا دل سے بسر کر

130

ہشیار زمانے کے ترے مکھ پہ نظر کر

تجھ نیہہ کے کوچے میں گئے ہوشِ بسر کر

عالم میں ہے وو تیر ملامت کا نشانہ

جس دل میں ترے غم کا گیا تیر گزر کر

تجھ حسن کی جھلکار سوں کیا بدر کو نسبت

جو کئی کہ تجھے بدر کہے اس کوں بدر کر

اس ظالم خوں خوار کوں جی پیش کیا ہوں

جس عشق نے عالم کوں سَٹا زیر و زبر کر

رونے ستی فارغ ہو ولیؔ پیو کوں دیکھا

کعبے کی زیارت کیا دریا سوں اُتر کر

131

شوخ نکلا جب قدم کوں تیز کر

ناز کے شبدیز کوں مہمیز کر

یک بہ یک آیا ادا سوں مجھ طرف

ہر پلک کوں دشنۂ خوں ریز کر

میں کیا یوں عرض از روے نیاز

مہربانی اس کی دست آویز کر

کہہ اپس کی نرگس بیمار کوں

عاشقاں کے خون سوں پرہیز کر

اے ولیؔ آتا ہے وو مقصود دل

خانۂ دل خوں سوں رنگ آمیز کر

132

اے سرو خراماں توں نہ جا باغ میں چل کر

مت قمری و شمشاد کے سودے میں خلل کر

کر چاک گریباں کوں گُلاں صحن چمن میں

آئے ہیں ترے شوق میں پردے سوں نکل کر

صنعت کے مصور نے صباحت کے صفحے پر

تصویر بنایا ہے تری نور کوں حل کر

اے نور نظر شمع کوں دیکھا ہوں سراپا

تجھ عشق کی آتش ستی کاجل ہوئی جل کر

بے آب لگے آب حیات اس کی نظر میں

پانی ہوا تجھ گال کے چو عشق میں گل کر

تجھ ابروے خم دار سوں ہرگز نہ پھرے دل

کیوں جاوے سپاہی دمِ شمشیر سوں ٹل کر

اے جانِ ولیؔ لطف سوں آ بر میں مرے آج

مجھ عاشق بے کل ستی مت وعدۂ کل کر

133

ہوا ہوں بے خبر تجھ مست انکھیاں کی خبر سن کر

ہوا ہوں ناتواں جیوں مو تری نازک کمر سن کر

نئیں تجھ لعل شیریں پر خط سبز اے گلستاں رو

یہ طوطی ہے کہ آئی ہے ترے لب کی شکر سن کر

سراپا ہو کے سودائی پڑا تجھ غم کے حلقے میں

تری زلفاں کی سنبل نے حکایت سر بسر سن کر

پرت کے پنتھ میں ہرگز قدم پیچھے نہ رکھ اے دل

ہٹاتے ہیں قدم نامرد اس رہ کے خطر سن کر

بگولے کی نمط آتا ہے مجنوں بے سرو بے پا

مرے دیوانۂ دل کوں اپس کا راہبر سن کر

صبا کے ہاتھ سوں جیوں ہے ہراک غنچہ پریشاں دل

یونہی ہر دل پریشاں ہے مری آہ سحر سن کر

ولیؔ تیری گلی کوں سن کے یوں مشتاق ہے نس دن

کہ جیوں عشاق ہوں مشتاق وصف مو کمر سن کر

134

دل مرا ہے وو آتشیں پیکر

راکھ ہوگئے ہیں جس کوں دیکھ شرر

کیا کہوں نبض دل کی بے تابی

قوت جس کا ہے آتشیں نشتر

عشق بازاں میں اس کوں راحت ہے

جس کوں الماس کا ملا بستر

اُن نے پایا ہے منزلِ مقصود

عشق جس کا ہے ہادی و رہبر

ترک لذّت کی جس کوں ہے لذّت

شکّر اس کو زہر ، زہر شکّر

آشنایاں کوں موج آب وفا

ہے محبت کی تیغ کا جوہر

بزم دلبر میں اے ولیؔ جا تو

شوق کا آج ہاتھ لے ساغر

135

جو آیا مست ساقی جام لے کر

گیا یک بارگی آرام لے کر

نگہ تیری سدا آتی ہے جیوں تیر

دل زخمی طرف پیغام لے کر

نہ جانوں خط ترا کس بے خطا پر

چلا ہے آج فوج شام لے کر

اُڑا آ ہوئے دل سوں رنگ وحشت

جو آئی زلف تیری دام لے کر

جو کُئی باندھا ہے تیری زلف میں دل

سٹا ہے کفر میں اسلام لے کر

ترے لب ہور تری انکھیاں کوں ہدیہ

چلا ہوں پستہ و بادام لے کر

بنائی ہے جہاں میں لیلۃ القدر

سیاہی تجھ زُلَف کی وام لے کر

تری ساقی گری کوں لالۂ باغ

کھڑا ہے منتظر ہو جام لے کر

میں اس کوں جیوں نگیں کرتا ہوں سجدہ

جو کُئی آتا ہے تیرا نام لے کر

ولیؔ تیرے لباں سوں اے تنک طبع

چلا ہے لذت دشنام لے کر

136

عجب نئیں جو کرے دل میں شیخ کے تاثیر

اگر مقدمۂ عشق کوں کروں تحریر

جنون عشق ہوا اس قدر زمیں کوں محیط

کہ پارسا کوں ہوئی موج بوریا زنجیر

زبان قال نئیں طفل اشک کوں لیکن

زبان حال سوں کرتے ہیں عشق کی تقریر

صفحے پہ چہرۂ عشاق کے مصور عشق

جگر کے خوں سوں لکھا طفل اشک کی تصویر

گلی سوں نیہہ کی کیوں جاسکوں ولیؔ باہر

ہوئی ہے خاک پری رو کی رہ دامن گیر

ردیف’ ز‘

137

ہوا مجھ چشم سوں بستاں غم سبز

ہوا تجھ جور سوں بخت الم سبز

ہوا قد سرو کے مانند صنم کا

لباس سبز سوں سر تا قدم سبز

کہیں جوہر شناساں حسن تجھ دیکھ

زمرد کا تراشے ہیں صنم سبز

ثنا لکھنے میں تجھ آہو نین کی

ہوا جیوں شاخ نرگس ہر قلم سبز

ولیؔ نے جو لکھا تجھ خط کی تعریف

ہوا جیوں برگ ریحاں ہر رقم سبز

138

لباس اپنا کیا وو گل بدن سبز

ہوا سر تا قدم مثل چمن سبز

عجب چھب سوں کھڑا ہے وو پری رو

سر اوپر چیرا بَر میں پیرہن سبز

اگر اس دھج سوں آوے انجمن میں

تو ہوویں بخت اہل انجمن سبز

فصاحت کیا کہوں اُس خوش دہن کی

کسی کا واں نہیں ہوتا سخن سبز

ولیؔ جو جی دیا اُس خط کوں کر یاد

بجا ہے گر کریں اس کا کفن سبز

139

نہ مل ہر بلبل مشتاق سوں اے گل بدن ہرگز

ہر اک گلشن میں جیوں نرگس نہ کھول اپنے نین ہرگز

جہاں کے گل رخا سارے تجھے نازک بدن کہتے

تو ہر پلکاں کے کانٹاں پر نہ رکھ اپنے چرن ہرگز

تو بے شک روح ہے جگ میں خلاصہ چار عنصر کا

بجز تجھ روح کے قائم نہ ہو جگ کا بدن ہرگز

زلیخا سے کتے عاشق ترے پر جیو وارے ہیں

نہ کر مسکن ہر اک یوسف کا یہ چاہِ ذقن ہرگز

بغیر از عید مت دکھلا کسی کوں یہ ہلال ابرو

نہ مل مہتاب میں بھی کس سوں اے چندر بدن ہرگز

جو شائق شمع رو کا ہے اسے وسواس جاں سوں کیا

نہ دھرنا مثل پروانے کے پروائے کفن ہرگز

حقیقت کے لغت کا ترجمہ عشق مجازی ہے

وو پائے شرح میں مطلب، نہ بوجھے جو متن ہرگز

دم تسلیم سوں باہر نکلنا سو قباحت ہے

نہ دھراس دائرے سوں ایک دم باہر چرن ہرگز

غنیمت جان اس تن کے قفس میں مرغ دم اپنا

نہ پہنچے گا بغیر از شوق تا حُب الوطن ہرگز

140

ہوا نئیں وو صنم صاحب اختیار ہنوز

بجائے خود ہے رقیباں کا اعتبار ہنوز

پری رخاں کی جھلک کا کیا ہوں بسکہ خیال

برنگ برق مرا دل ہے بے قرار ہنوز

وو چشم چار ہوئی شوق چار ابرو سیں

ولے نئیں وو دو رنگی ہوا دوچار ہنوز

ہزار بلبل مسکیں کا صید ہے باقی

مقیم ہے چمن حسن میں بہار ہنوز

بجا نئیں تجھے انکار خون عاشق سوں

گیا نئیں ہے ترے ہاتھ سوں نگار ہنوز

اپس کی چشم کی گردش سوں دے پیالہ مجھے

گیا نئیں ہے مری چشم سوں خمار ہنوز

بجائے خود ہے اے رنگیں بہار گل فطرت

تری پلک کا مرے دل میں خار خار ہنوز

چلے ہیں آہوے مشکیں ختن سوں سن کے کہ ہے

نگاہ شوخ صنم درپئے شکار ہنوز

ولیؔ جہاں کے گلستاں میں ہر طرف ہے خزاں

ولے بحال ہے وو سرو گل عذار ہنوز

141

مت جا سجن کہ ہوشِ دل آیا نئیں ہنوز

میں درد اپس کا تجھ کوں سنایا نئیں ہنوز

اس چشم اشک بار سوں میری عجب نہ کر

سینے کا داغ تجھ کوں دکھایا نئیں ہنوز

تجھ لطف کے زلال نے اے مایۂ حیات

میرے سِنے کی آگ بجھایا نئیں ہنوز

ہوں گرچہ خاکسار ولے از رہِ ادب

دامن کوں تیرے ہاتھ لگایا نئیں ہنوز

اپنی انکھاں کے نور کوں تیرے قدم تلے

اے نور دیدہ فرش بچھایا نئیں ہنوز

زاہد اگرچہ فہم میں ہے بوعلیِ وقت

میرے سخن کے رمز کوں پایا نئیں ہنوز

آزاد اپنے عشق سوں مت کر ولیؔ تئیں

تیرا غلام جگ میں کہایا نئیں ہنوز

142

تو ہے رشک ماہ کنعانی ہنوز

تجھ کوں ہے خوباں میں سلطانی ہنوز

ہر جھلک دیتی ہے تجھ رخسار کی

آرسی کوں درس حیرانی ہنوز

شرم سوں تجھ مکھ کے اے دریائے حسن

چہرۂ گو ہر پہ ہے پانی ہنوز

حلقہ زن ہے تجھ دہن کی یاد میں

خاتم دست سلیمانی ہنوز

رات کوں دیکھا تھا تیری زلف کوں

دل میں ہے باقی پریشانی ہنوز

تجھ کمر کوں دیکھ حیراں ہو رہا

مو قلم لے ہاتھ میں مانی ہنوز

روز اوّل سوں چمن میں حسن کے

نئیں ہوا پیدا ترا ثانی ہنوز

جان جاتی ہے، ولے آتا نئیں

کیا سبب وو دلبر جانی ہنوز

اے ولیؔ اس گل بدن کے عشق میں

شغل بلبل ہے غزل خوانی ہنوز

143

داغ سوں دل قُرص زر اندود رکھتا ہے ہنوز

مثل سورج آتش بے دود رکھتا ہے ہنوز

بسکہ گایا ہوں سرود عشق تیری یاد میں

دل یو میرا لہجۂ داؤد رکھتا ہے ہنوز

باغ میں دیکھا ہوں اے یاقوت لب ریحاں کیتیں

شوق تجھ خط کا غبار آلود رکھتا ہے ہنوز

نور تجھ رخسار کا سینے میں ہے نت جلوہ گر

مجمر دل آتشِ نمرود رکھتا ہے ہنوز

گرچہ غیر از نامرادی اب تلک حاصل نئیں

لیک دل تجھ لب ستی مقصود رکھتا ہے ہنوز

تجھ دہان کالعدم سوں ہے تعجب مجھ کہ حق

طالباں کو اس کے کیوں موجود رکھتا ہے ہنوز

یو ولیؔ تجھ عشق کے مجمر پہ تا اسپند کرے

چنگ میں دل کوں بجائے عود رکھتا ہے ہنوز

ردیف’ س‘

144

میں جب ستی دیکھا ہوں بہار گل نرگس

ہے وحشی دل تب سوں شکار گل نرگس

کیوں بار نگہ ہوے تجھ انکھیاں کے چمن میں

پلکاں ہیں مری خار حصار گل نرگس

بیمار ہے اے یار تری چشم کے دوراں

آ دیکھ ٹک یک دیدۂ زار گل نرگس

نرگس نے کیا اس کے نین دیکھ زر ایثار

کر نقد دل اپنے کوں نثار گل نرگس

آیا ہے ولیؔ مطلع رنگیں لے ترے پاس

یو مطلع رنگیں ہے بہار گل نرگس

ردیف’ ش‘

145

عشق کے ہاتھ سوں ہوے دل ریش

جگ میں کیا بادشاہ کیا درویش

جیو میرا ہوا ہے زیر و زبر

جب سوں تیرا فراق آیا پیش

شوخ کے دل سوں دل ہوا پیوست

آتش عشق کا لگا ہے سریش

تجھ پہ قرباں ہوں اے کماں ابرو

جب سوں لیایا ہوں عاشقی کا گیش

جس کوں قربت ہے عشق سوں تیرے

اس کے نزدیک کب عزیز ہیں خویش

تجھ بن اک پل نہیں مجھے آرام

بیگ دکھلا درس اے مرہم ریش

اے ولیؔ اس کا زہر کیوں اُترے

جن نے کھایا ہے عاشقی کا نیش

ردیف’ ص‘

146

کیوں نہ ہو محبوب میرا جگ میں خاص

اس کی کرتے ہیں صفت سب عام خاص

خوش قداں سب اس انگے حیران ہیں

ہے لٹک میں جیوں کبک رفتار خاص

مجھ کوں پہنچا ہے صنم سیں اے سجن

عاشقوں کی جائے ہے دار الخواص

قتل کرتے ہیں دو نیناں پُرخمار

کون ہے لیوے تجھ آنکھوں سیں قصاص

آرزو ہے نت ولیؔ کوں وصل کی

کب ملے گا میرے تئیں وو نور خاص

147

نئیں مرے دل کوں تری زلف کے چوگاں سوں خلاص

زلف تیری سوں ہے لینا مجھے یک روز قصاص

عشق کی راہ میں جن سر کوں دیا ہے جگ میں

حق کے نزدیک اچھے گا سو وہی خاص الخاص

جب لٹ چال سجن کی مجھے یاد آتی ہے

دل مرا رقص میں آتا ہے مثال رقّاص

رکھ رقیباں سیہ رو کے سخن کوں دل میں

پی! نہ دھو! صفحۂ خاطر ستی حرف اخلاص

اے ولیؔ قدر ترے شعر کی کیا بوجھے عوام

اپنے اشعار کوں ہرگز توں نہ دے جز بہ خواص

ردیف’ ض‘

148

تجھ مکھ کے اس چمن میں یو خط ہے بہار محض

جنت ہے جس کے لطف اَگے شرمسار محض

وہ مکھ ترا ہے اے گل گلزار عاشقاں

ہے لالہ زار جس کے آگے داغ دار محض

بن مرہم وصال نہ ہووے اسے شفا

جو تجھ نگہ کے تیر سوں ہے دل فگار محض

شکر خدا کہ جس کے کرم سوں جہان میں

تجھ حسن کا خیال ہے مجھ شرمسار محض

اس کوں قرار کیوں کے اچھے لیل تار میں

جو تجھ زلف کی یاد میں ہے بے قرار محض

اے دل تو اس کی نین کی مستی سوں ذوق کر

بن اس کے جگ کے شغل ہیں تجھ کوں خمار محض

گاہے ولیؔ کے حال پہ چشم کرم سوں دیکھ

مدت سوں تجھ گلی میں ہے امیدوار محض

149

آزاد کوں جہاں میں تعلق ہے جال محض

دل باندھنا کسی سوں ہے دل پر وبال محض

باد خزاں سوں رمز یہ سمجھا کہ جگ منیں

آتی ہے باغ عیش سوں بوے ملال محض

یو بات عارفاں کی سنو دل سوں سالکاں

دنیا کی زندگی ہے یو وہم و خیال محض

بِن خامشی ولیؔ نہ ملے گوہرِ مراد

حیرت کے باج اور ہے سب قیل و قال محض

150

تجھ زلف کے بے تاب کوں مشک ختن سوں کیا غرض

تجھ لعل کے مشتاق کوں کانِ یمن سوں کیا غرض

مدت ستی اے گل بدن چھوڑا چمن کی سیر کوں

مشتاق ہوں تجھ درس کا مجکوں چمن سوں کیا غرض

پروا کفن کی نئیں مجھے اے شمع بزمِ عاشقاں

تجھ عشق میں جو سر دیا اس کوں کفن سوں کیا غرض

برجا ہے گر اہل ہوس طالب نہیں مجھ شعر کے

جن کو سخن کی بوجھ نئیں ان کوں سخن سوں کیا غرض

ہرگز ولیؔ کے پاس تم باتاں وطن کی مت کہو

جونیہہ کے کوچہ میں ہے اس کوں وطن سوں کیا غرض

ردیف’ غ‘

151

دل تجھ نگاہ گرم سوں سوزاں ہے جیوں چراغ

اس سوز شعلہ خیز سوں خنداں ہے جیوں چراغ

وو آب و تاب حسن میں تیرے ہے اے سجن

خورشید جس کوں دیکھ کے لرزاں ہے جیوں چراغ

یوں تجھ نزک خجل ہے نمک ہر جمال کا

روشن صبح کوں دیکھ پشیماں ہے جیوں چراغ

مسند پہ عافیت کی وو ہے بادشاہ وقت

جس دل کی انجمن منیں ایماں ہے جیوں چراغ

عالم کی دوستی سوں ہے نفرت ولیؔ کتیں

ہر آشنا کے دم سوں گریزاں ہے جیوں چراغ

152

جب سے گئے وو شہاں، آہ دریغا دریغ

غم میں ہے ہر دوجہاں، آہ دریغا دریغ

جب سوں وو نورِ جہاں جگ سوں ہوے ہیں نہاں

تب سوں ہے یو غم عیاں، آہ دریغا دریغ

سارے فلک میں ملک غم میں ہیں سر پاؤں لگ

جب سوں سنے یو بیاں، آہ دریغا دریغ

عابد دیں دار کوں، واقفِ اسرار کوں

درد ہے آہ و فغاں، آہ دریغاں دریغ

ویسے شہِ پاک کوں صاحب ادراک کوں

دکھ دیے وو گمرہاں، آہ دریغا دریغ

شاہ کے ماتم کا بھار، سر پہ ہوا بے شمار

تو ہوا خم آسماں، آہ دریغا دریغ

دین کے گلزار میں گلشنِ اسرار میں

کاں سوں آئی یو خزاں، آہ دریغا دریغ

دیں کا ہے خالص وو زر، غم کی کسوٹی اُپر

حق نے کیا امتحاں، آہ دریغا دریغ

غم میں ولیؔ ہے مدام، شاہ کا کمتر غلام

نت کیا وردِ زباں، آہ دریغا دریغ

ردیف’ ف‘

153

پڑی جب نظر چشم دلبر طرف

ہوا ہوش یک بارگی برطرف

اگر آبرو تجھ کوں درکار ہے

نہ جا خوب رویاں کے کشور طرف

گھلے دیکھ تجھ لب کا آب حیات

کرے یک نظر گر توں شکّر طرف

زبس تجھ ملاحت کا مشتاق ہوں

پڑا شور مجھ عشق کا ہر طرف

ولیؔ کوں نئیں مال کی آرزو

خدا دوست نئیں دیکھتے زر طرف

154

نہ کرسکوں ترے یک تار زلف کی تعریف

کروں ہزار کتب تجھ ثنا میں گر تصنیف

عجب نئیں جو فلک پر خط شعاعی دیکھ

اگر ورق پر سُرج کے لکھیں تری تعریف

لطیفہ وقت اُپر زیب بخش مجلس ہے

سدا گلاب میں ہرگز نئیں ہے بوئے لطیف

عجب نئیں جو سجن کہربا ہو مجھ کھینچے

کہ مجھ کوں کاہ نمن عشق نے کیا ہے ضعیف

کیا ہوں برمیں اپس کے لباس عریانی

ولیؔ برہ نے دیا یو قبا مجھے تشریف

155

ترے فراق میں گل کر ایتا ہوا ہوں ضعیف

بجا ہے تن کوں اگر بال سوں کروں تردیف

چمن میں دہر کے ہرگز نہ مجھ ہوا معلوم

کہ کب ہے فصل ربیع اور کدھاں ہے فصل خریف

ترے رقیب کوں عاشق سوں کیوں کے دیوں نسبت

کہ فرق اُن میں ہے جیوں فرق در کثیف و لطیف

تمیز سوں جو اگر مجھ طرف نگاہ کرے

تو شاہ حسن سوں بس ہے مجھے یہی تشریف

عجب نئیں جو مصنف پر آفریں بولے

ولیؔ جو کوئی سنے اس وضاں کی یو تصنیف

ردیف’ ق‘

156

چڑھی دیکھی جو تجھ بھوں کی کماں قرباں ہوئے عاشق

نشانِ ناوکِ مژگانِ خون افشاں ہوے عاشق

خیال سرو بالا ہے گل گل زار خوبی سوں

چمن آسا بہار آراے باغ جاں ہوئے عاشق

مئے سرگشتگی سوں جام دل پر بسکہ رکھتے ہیں

بہ رنگ ساغر گرداب سرگرداں ہوئے عاشق

ز بس تیغ نگاہ شوخ سرکش کی ہے خوں ریزی

نگاہ چشم قربانی نمط حیراں ہوئے عاشق

بہ رنگِ شمع بزم حسن میں ہے جب سوں تو روشن

پتنگ آسا ترے اوپر بلا گرداں ہوئے عاشق

نہیں یو لالۂ صحرا دریا لہو کا بھرا ہے گا

ز بس تجھ غم منیں انکھیاں سوں خوں باراں ہوئے عاشق

ولیؔ کر نقد دل اپنا نثار امرت بچن اوپر

کہ جس جاں بخش جاں آگے غلام از جاں ہوے عاشق

ردیف’ ک‘

157

چہرے پہ ہے سجن کے عجب نور کی جھلک

دیکھے سوں جس جھلک کے گئی بجلی کی چمک

لاتا ہے نذر آئینۂ آفتاب کوں

ہو مشتری جمال ترے کا سجن فلک

اس دور میں خلاصی جاں ہے نپٹ کٹھن

بانکی نَین کے ہاتھ میں خنجر ہے ہر پلک

پوشیدہ کیوں جہاں میں رہے عشق صاف قلب

ہے اس کے لعل لب کے اَگے خوب و بد محک

طاقت ہے کس کوں رخ پہ ترے کرسکے نگاہ

خورشید سوں ادھک ہے ترے چہرے کی جھلک

کہتے ہیں شاعران زمن مجھ کوں اے ولیؔ

ہرگز ترے کلام میں ہم کو نہیں ہے شک

158

اے صنم تیرے مکھ کی دیکھ جھلک

منفعل ہے مدام شمسِ فلک

دیکھ تجھ میں جمال حق کا ظہور

ہیں دعا گو فلک پہ سارے ملک

دیکھ کر تجھ دہن کی تنگی کوں

عالماں کے پڑا ہے دل میں شک

لب ترے کا حقوق ہے مجھ پر

کیوں بھلاؤں میں دل سوں حق نمک

اے ولیؔ جب نظر میں پیو آیا

ہوگیا سب وجود میرا حک

ردیف ’ل‘

159

دیکھ تیرے سو یو کھبالے بال

رشک سوں جل گئے ہیں کالے کال

جب کہ ابرو کی تو کماں کھینچی

تیر مژگاں نے تب سنبھالے بھال

زلف کے پیچ دیکھ کر سنبل

پیچ ہور تاب میں ہے ڈالے ڈال

کئیں شکاریاں نے تجھ نگہ کا دام

دیکھ آتش میں غم کے جالے جال

اس ولیؔ پر نظر رحم کی کر

ہے یہ تقصیر وار بالے بال

160

دل کی مچھلی پر سٹا تجھ برہ نے جنجال جال

دام میں تجھ نیہ کے دل کا ہوا بے حال حال

اے ستم گر عاشقاں پر یوں نہ کر جور و ستم

خیر ہو شر کی حقیقت میں ہے یک مثقال قال

خط نئیں آغاز تجھ رخسار کے یو آس پاس

حسن کے لینے کو یو آئے ہیں استقبال بال

مفلساں کوں عاقبت کے گھر میں نئیں درکار زر

حق کی بخشش سوں انھوں کوں بس ہے نیک اعمال مال

اے ولیؔ حق کی طلب یو دولتِ عظمیٰ اَ ہے

عشق سینے کے خزینے میں ہے مالامال مال

161

لب پہ دل بر کے جلوہ گر ہے جو خال

حوض کوثر پہ جیوں کھڑا ہے بلال

یو ہے عاشق اپس کی صورت کا

جیوں کہ حیراں ہے اُس اُپر تمثال

اُس کے مکھ کی شعاع کوں کرتا ہے

ہر صًبح آفتاب استقبال

نہیں کچھ مال و زر کی مجھ کوں طمع

شوق سوں اس کے دل ہے مالا مال

اے ولیؔ پی مئے محبت کوں

گر ہے رمضان و گر مہِ شوال

162

شمع بزم وفا ہے امرت لال

سرو باغ ادا ہے امرت لال

ماہ نو کی نمن ہے سب کو عزیز

اس سبب کم نما ہے امرت لال

دل مرا کیوں بند ہو اُس کا

آج رنگین قبا ہے امرت لال

خوش لباسی کی کیا کہوں تعریف

وضع میں میرزا ہے امرت لال

اس سوں بے گانگی کبھو نہ کرے

جس ستی آشنا ہے امرت لال

لعل تیرے بھرے ہیں امرت سوں

نام تیرا بجا ہے امرت لال

اے ولیؔ کیا کہوں بیاں اس کا

لطف میں دل ربا ہے امرت لال

163

ہے آج خوش قدی میں کمال گوبند لال

استاد چال سرو ہے چال گوبند لال

برجا ہے اس کے دل کوں کہوں گلشن بہار

آتا ہے جس کے دل میں خیال گوبند لال

خوباں حیا سوں غرق غرق ہوں تو کیا عجب

جس وقت جلوہ گر ہو جمال گوبند لال

ہے بسکہ بے مثال نہ دیکھا جو خواب میں

آئینۂ خیال مثال گوبند لال

کر اس دعا کوں ورد زباں اے ولیؔ مدام

لطف خدا ہو شامل حال گوبند لال

164

مدت ہوئی سجن نے دکھایا نئیں جمال

دکھلا اپس کے قد کوں کیا نئیں مجھے نہال

یک بار دیکھ مجھ طرف اے عید عاشقاں

تجھ ابرواں کی یاد سوں لاغر ہوں جیوں ہلال

برجا ہے گر ہمن پہ تصدق ہو مشتری

بولا ہوں تجھ جمال کوں خورشید بے زوال

وو دل کہ تھا جو سوختۂ آتش فراق

پہنچا ہے جا کے رُخ کو صنم کے برنگ خال

ممکن نئیں کہ بدر ہو نقصاں سوں آشنا

لاوے اگر خیال میں تجھ حسن کا کمال

گر مضطرب ہیں عاشق بے دل عجب نئیں

وحشی ہوئے ہیں تیری انکھاں دیکھ کر غزال

فیض نسیم مہر و وفا سوں جہان میں

گل زار تجھ بہار کا ہے اب تلک بحال

کھویا ہے گل رخاں نے رعونت سوں آب و رنگ

گردن کشی ہے شمع کی گردن اُپر وبال

ہرگز نہ دیوے رسم وفا ہاتھ سوں ولیؔ

یک بار اس غزل کوں سنے گر گوبند لال

165

چمن میں گیا جب سوں وو نونہال

ہوا سرو اُس سرو قد سوں نہال

ہوئی تب سوں خاطر نشاں جب ستی

ترے تیر کی دل میں پائی ہے بھال

موہا سرو نے گرچہ قمری کا دل

ترے قد کی لیکن نرالی ہے چال

مجھے یک گھڑی تجھ بنا چین نئیں

ترے بن ہے ہر آن سینے پہ سال

ترے عشق نے خم کیا ہے مجھے

مرے حال پر زلف تیری ہے دال

مرے دل کوں جیوں گوے گرداں کیا

کہوں کیا تجھ ابرو کے چوگاں کا حال

جہاں میں پھرا لیکن اے باحیا

نہ دیکھا ہے آئینہ تیری مثال

نہ ڈر روز محشر ستی سیّدا

کہ آلِ نبی پر نہ آئے گی آل

طمع مال کی سر بسر عیب ہے

خیالات گنج جہاں سرسوں ٹال

بھروسا نئیں دولت تیز کا

عجب نئیں کہ تا ظہر آوے زوال

جب آیا غضب میں وو آتش مزاج

کیا آب عشاق کے دل کو گال

تجھے زلف صیّاد دیتی ہے پیچ

نہ اِس دام کے ہاتھ سوں دل کو جال

ولیؔ شعر میرا سراسر ہے درد

خط و خال کی بات ہے خال خال

166

میری نگہ کی رہ پہ اے فرخندہ فال چل

ہے روز عید آج اے ابرو ہلال چل

تیری نین کی دید کوں اے نور ہر نظر

شک نئیں اگر ختن ستی آویں غزال چل

ممکن نئیں ہے تن کی طرف اس کی بازگشت

جو دل گیا ہے دلبر دل کش کی نال چل

پیتم کی زلف بیچ دسا مجھ سواد ہند

اس راہ مار پیچ میں اے دل سنبھال چل

وحدت کے مے کدے میں نہیں بار ہوش کوں

اس بے خودی کے گھر کی طرف سُدھ کو ڈال چل

اے بے خبر اگر ہے بزرگی کی آرزو

دنیا کی رہ گزر میں بزرگاں کی چال چل

گر عاقبت کے ملک کی خواہش ہے سلطنت

خوش خصلتی کے ملک میں اے خوش خصال چل

مرشد کی منزلت کا اگر عزم جزم ہے

سایہ نمط تو پیر کے دائم دنبال چل

آیا تری طرف جو ولیؔ تو عجب نہیں

آتے ہیں تجھ گلی منیں صاحب کمال چل

167

بیگ درس دے، نہ دے مکھ پہ اے چنچل انچل

جیو مرا ہت لے، نہ لے رسم فریب و دغل

مجھ پہ نظر کر، نہ کر بات رقیباں ستی

بیت مری سن، نہ سن دوسرے کی جا غزل

میرے نزیک آ، نہ آ رکھ کے وہم دل منیں

جی میں وفا دھر، نہ دھر سینے میں خوف و خلل

ظلم سے دل دھو، نہ دھو مہر کے پانی سوں ہاتھ

موم صفت ہو، نہ ہو کوہ نمن تو اَٹل

قول مجھے دے، نہ دے رسم وفا ہاتھ سوں

آ ولیؔ سوں مل، نہ مل کس سوں اے شیریں شکل

168

کہوں کس کَن عزیزاں! جا کے درد بے نشانِ دل

نئیں یک گوش محرم تا سنے آہ و فغانِ دل

غبار خاطر غم ناک سوں مجھ پر ہوا ظاہر

کہ غیر از درد دوجا نئیں ہے یار کاروانِ دل

ہوئی ہے بند تب سوں راہ اظہار شکایت کی

خیال خال خوباں جب سوں ہے مہر دہانِ دل

پڑی تجھ زلف کافر کیش پر جب سوں نظر میری

صنم تب سوں گئی ہے ہاتھ سوں دل کے عنانِ دل

بیان سینہ چاکاں اے ولیؔ کیوں کر سنے ہریک

کہ بوئے گل سوں نازک تر ہے آہنگ زبانِ دل

169

تجھ بے وفا کے سنگ سوں ہے پارہ پارہ دل

ریزش میں تجھ جفا سوں ہے مثل ستارہ دل

لرزاں ہے تب سوں رعشۂ سیماب کی نمط

جب سوں تری پلک کا کیا ہے نظارہ دل

تجھ مکھ کے آفتاب کی گرمی کوں دیکھ کر

جل شوق کی اَگن سوں ہوا جیوں انگارہ دل

بے شک شفاے خاطر بیمار ہو تدہاں

تجھ لب کے جب طبیب ستی پاوے چارہ دل

آوے اگر ولیؔ کے سِنے کے محل میں توں

دیکھے ترے جمال کوں پھر کر دوبارہ دل

170

عبارت تجھ زُلَف سوں ہے تسلسل

ہوا تیری کمر میں گُم تامل

ترے مکھ کے چمن کوں یاد کرکر

دیا لالے نے اپنے دل اُپر گل

دسے تجھ حسن کے دریا پہ جیوں موج

اگر رخسار پر چھوٹے یو کاکل

ترے رخسار و لب کوں دیکھ اے شمع

ہوئے پروانہ ہر طوطی و بلبل

میں دیکھا ہوں نگاہ دل سوں اے شوخ

تری انکھیاں سے بے جا ہے تغافل

کیا اس دور میں اے جلوہ بدمست

تر انکھیاں نے کارِ نشۂ مل

ہوا زنجیر بند اے دام عشاق

تری زلفاں کے ہر حلقے میں سنبل

ولیؔ تیری گلی کوں دیکھ بولیا

یہی ہے ہند اور کشمیر و کابُل

171

تجھ مکھ اُپر ہے رنگ شراب ایاغ گل

تیری زُلَف ہے حلقۂ دود چراغ گل

معشوق کوں ضرر نئیں عاشق کی آہ سوں

بجھتا نئیں ہے باد صبا سوں چراغ گل

رہتا ہے دل پیا کے تفحص میں رات دن

ہے کار عندلیب ہمیشہ سراغ گل

عاشق مدام حال پریشاں سوں شاد ہے

آشفتگی کے بیچ ہے دائم فراغ گل

تجھ داغ سوا ہوا ہے چمن زار دل مرا

ای شوخ آ کے دیکھ تماشاے باغ گل

جلتے ہیں پی کے شوق سوں عشاق رات دن

ہے دل میں بلبلاں کے شب و روز داغ گل

یوں تجھ سخن میں نشۂ معنی ہے اے ولیؔ

جوں رنگ و بو کی مے سوں ہے لبریز ایاغ گل

172

اے شمع تو روشن کیا جب انجمن گل

اپنے گل مقصود کوں پایا چمن گل

اے غنچہ دہاں نام ترا جب سوں لیا ہوں

اس آن سوں خوش باس ہوا ہے دہن گل

بازار میں شاید کہ کرے سیر سری جن

اس واسطے بازار ہوا ہے وطن گل

تجھ ناز کی تلوار نے جب سوں کیا زخمی

ہے تب ستی آلودۂ خوں پیرہن گل

مجھ دل پہ ولیؔ دل برِ رنگیں کی حقیقت

مخفی نئیں بلبل کے اُپر جیوں سخن گل

173

تجھ زلف اور دہن میں ہے مختصر مطوّل

تو صاحب درس ہے بوجھا ہوں روز اوّل

گل زار میں نکل کر گل گشت اگر کرے توں

تجھ گل بدن کے دیکھے سب گل پڑیں گے گل گل

جگ کے مصوّراں سب تصویر دیکھ تیری

حیرت میں جا پڑے سو لکھنا رہا معطل

تجھ سرو قد کوں دیکھے نقاش نقش بھولے

پھر نقش کاڑھنا سو ان کوں ہوا ہے اشکل

یو در کو مِرگ دیکھے سو مرگ کا ہو طالب

یو خاک تجھ قدم کی سٹ کر مقام جنگل

ہر جنس کا معما بوجھا گیا ہے لیکن

تجھ راز کا معما جگ میں رہا ہے لاحل

خوشبو بدن پہ تیری زلفاں نہیں ہیں چوندھر

کالے بھجنگ مل کر گھیرے درخت صندل

ساری سکھیاں نے مل کر کیا بے خطا دیا ہے

تجھ نازنیں موہن کی انکھیاں میں خطِّ کاجل

اے شوخ چشم عالم سن بات گوش دل سوں

تجھ بے وفا کے غم سوں دائم ولیؔ ہے بے کل

ردیف’ م‘

174

تجھ شاہ خوباں کے ہوئے کئی صاحب اکرام رام

تجھ حسن کے دیوان سوں پائے ہیں کئی حکّام کام

تجھ درس کا کئی برس سوں مشتاق ہوں اے بے وفا

دے شیشۂ لب سوں کدھی یک خیریت انجام جام

گَل کر پڑیں گے گُل نمن بے شک گلستاں کے بھتر

تجھ گل بدن کے حسن کوں گر ٹک کریں گل فام فام

ہر مرغ دل کوں آپ نے لاکر کریں گے بندیاں

دیکھیں گے پھر گر بھر نظر تجھ زلف کا خدام دام

تجھ زلف نے جو دائرے باندھے صفار رخسار پر

دیکھے نئیں اس شان کا کوئی صاحب اسلام لام

تجھ نین کے خنجر سوں ہے مجروح دل عشاق کا

تیری نگہ کی تیغ سوں ہیں صاحب سنگرام رام

تن کے مُلک میں اے ولیؔ تجھ عشق کے حاکم نے آ

دل کی رعیت سوں لے کر چوکھا کیا ہے دام دام

175

غم ترا ہے قوت کھاتا ہوں محبت کی قسم

نئیں مجھے دنیا کا غم تجھ غم کی راحت کی قسم

اے گل باغ نزاکت باغ میں امکان کے

تجھ سا نئیں دیکھا ہوں میں تیری نزاکت کی قسم

جب سوں اے آئینہ رو دیکھی تری تصویر کوں

گل رخاں تب سوں ہوئے تصویر حیرت کی قسم

عاشقاں اے رشک لیلیٰ دیکھ تیرے رم کے تئیں

مثل مجنوں ہیں بیاباں گرد وحشت کی قسم

اے ولیؔ اس دل ربا کوں کہہ کہ میرے حال پر

لطف سوں کر یک نگہ تجھ کوں مروت کی قسم

176

ہجرت کی رات نے مجھ یک آسماں دیا غم

اب مہر اپس کی ہرگز اے صبح رو نہ کر کم

اے آفتاب طلعت دل پر مرے نظر کر

تا یک گھڑی میں آوے تجھ پاس مثل شبنم

تجھ بھوں کو جب سوں دیکھا تجھ پاس اے سری جن

گوشے میں بیٹھ چلاّ مثل کماں ہوا خم

تجھ زلف سوں لیا ہے کعبہ سیاہ پوشی

تیرے ذقن کے شرموں پانی ہوا ہے زم زم

ہے اے ولیؔ پرت سوں معمور کعبۂ دل

نئیں باج حق کے دوجا دل کے حرم کا محرم

177

جلوں تجھ عشق کی آتش منیں تا چند اے ظالم

شتابی آ کہ جی تجھ پر کروں اسپند اے ظالم

خوش ابرو جیوں نگہ رکھتے ہیں انکھیاں میں مجھے جب سوں

تری انکھیاں کے ڈورے کا ہوا ہوں بند اے ظالم

پریشانی کے دفتر کا اسے فہرست کہہ سکیے

تری زلفاں سوں جس کے دل کو ہے پیوند اے ظالم

پڑی ہے آرسی حیرت میں تیرے مکھ کے جلوے سوں

مجھے تجھ حسن کی حیرت کی ہے سوگند اے ظالم

ولیؔ کی سوزش دل کی طبیباں کر سکیں دارو

ترے رخسار و لب سوں گر ملے گل قند اے ظالم

178

صنم کے لعل پر وقت تکلّم

رگِ یاقوت ہے موج تبسّم

سجن مکتب میں جب آیا ہر اک کوں

ہوا ہے سہو تعلیم و تعلّم

سمجھ کر بات کر اے مرد ناصح

نصیحت عاشقاں کو ہے تحکّم

نئیں کُئی داد دیتا اس کی جگ میں

کیا تجھ زلف سوں جس نے تظلّم

نہ جا انکھیاں میں آ مجھ دل میں اے شوخ

کہ نئیں خلوت میں دل کی خوف مردم

ہوا پیدا وو گل رو جب سوں جگ میں

ہوا ہے ہوش میرا تب ستی گم

ہوے اشکِ ولیؔ از بسکہ جاری

اُٹھا امواج دریا میں تلاطم

179

جیوں گل شگفتہ رو ہیں سخن کے چمن میں ہم

جیوں شمع سربلند ہیں ہر انجمن میں ہم

ہم پاس آکے بات نظیریؔ کی مت کہو

رکھتے نہیں نظیر اپس کی سخن میں ہم

ہیں داستان عشق ہمیں یاد کئی ہزار

استاد بلبلاں کے ہیں ہر یک چمن میں ہم

خوباں جگت کے جیوں سوں ملتے ہیں ہم ستی

کامل ہوئے ہیں بسکہ محبت کے فن میں ہم

اس شوخ شعلہ رنگ کی جب سوں لگن لگی

جلتے ہیں تب سوں شعلہ نمط اس لگن میں ہم

یک بار ہنس کے بول صنم نئیں تو حشر لگ

جیوں برق بے قرار رہیں گے گفن میں ہم

ہر چند جگ کے بخت سیاہوں میں ہیں ولے

کاجل ہو، جا بسے ہیں سجن کے نین میں ہم

فرہاد تب سوں تیشہ نمن سر کیا تلے

باندھے ہیں جب سوں جیو کیوں شیریں بچن میں ہم

دو جگ ہوئے ہیں دل سوں فراموش اے ولیؔ

رکھتے ہیں جب سوں یاد سری جَن کی من میں ہم

180

شراب شوق سیں سرشار ہیں ہم

کبھو بے خود کبھو ہشیار ہیں ہم

دو رنگی سوں تری اے سرو رعنا

کبھو راضی، کبھو بے زار ہیں ہم

ترے تسخیر کرنے میں سری جَن

کبھو ناداں، کبھو عیار ہیں ہم

صنم تیرے نین کی آرزو میں

کبھو سالم، کبھی بیمار ہیں ہم

ولیؔ وصل و جدائی سوں سجن کی

کبھو صحرا، کبھو گل زار ہیں ہم

ردیف’ ن‘

181

میٹھا بچن بولے اگر وہ دلبر شیریں زباں

ہو ماہ مصری جیوں شکر آب خجالت میں نہاں

زہرہ جبیناں خلق کے آویں بہ رنگ مشتری

گر ناز سوں بازار میں نکلے وو ماہ مہرباں

اے نور چشم عاشقاں تیری صفت کر نہ سکے

گر مردم بینا کوں ہو مانند مژگاں صد زباں

پڑھنا مطوّل کا کیا اُن نے درس میں مختصر

تیری زباں سوں جو سنا علم معانی کا بیاں

دیکھا ہوں دریائے جنوں تجھ آشنائی میں پیا

ہے پردۂ چشم پری کشتی کوں میری بادباں

دل بند ہے غنچہ نمط تیرے دہن کی فکر میں

ہے تجھ لباں کی یاد سوں ہر اشک رنگ ارغواں

تیری نگہ کے تیر سوں زخمی ہوا شیر فلک

تیری بھواں کے سہم سوں خم ہے کمان آسماں

انجھواں کی سرخی دیکھ کر یاقوت ہے خونیں جگر

ہور زعفراں ہے زرد رو دیکھے سوں رنگ عاشقاں

اے نو بہار خوش لقا جب سوں ہوا ہے تو جدا

تجھ بن ہے دل کے باغ میں اوّل سوں آخر لگ خزاں

نس دن سجن تجھ ہجر میں رہتے ہیں باب چشم وا

تا دُزد خواب آوے نہیں پتلی ہے ان میں پاسباں

یوں دوستاں کے ہجر سوں داغاں ہیں سینے پر ولیؔ

صحرا کے دامن کے اُپر جیوں نقش پائے رہرواں

182

کیوں نہ ہووے عشق سوں آباد سب ہندوستاں

حسن کی دہلی کا صوبہ ہے محمّد یار خاں

پیچ و تاب بے دلاں اس وقت پر بے جا نہیں

لٹ پٹی دستار سوں آتا ہے وو نازک میاں

دل ہوئے عشاق کے بے تاب مانند سپند

جب وو نکلے ہو سوارِ تازیِ آتش عناں

کیوں نہ ہو بے تابیِ عشاق کا بازار گرم

ہے نگاہ شوخ سرکش فتنۂ آخر زماں

جس طرف ہو جلوہ گر وو آفتاب بے نظیر

صبح کے مانند ہووے رنگ روئے گل رخاں

کب نظر آوے گا یا رب وہ جوان تیر قد

جس کے ابرو کے تصور نے کیا مجھ کوں کماں

اے ولیؔ گر مہرباں ہووے چمن آراے حسن

خاطر ناشاد ہووے رشگ گل زار جناں

183

یہ خط تجھ مکھ کے گلشن میں دسے جیوں سبزۂ ریحاں

ورق پر حسن کے دیکھو لکھے ہیں یہ خط ریحاں

جو تجھ خط کی غلامی میں کیا ہے ترک فرماں کوں

تو اس کا باغ کے بھیتر رکھے ہیں ناؤں نافرماں

جو تجھ یاقوت لب کا خط ہوا مشہور عالم میں

رہا یاقوت خط لے کر اپس کا جگ میں ہو حیراں

ترا خط دائرہ ہے جیم کا اور خال ٹھوری پر

بلا شک جیم کا نقطہ ہے اے اہل سخن داں جاں

ولیؔ یہ دائرہ خط کا اہے اس حسن کا قلعہ

سو اس قلعے منیں دیکھو تجلّیِ شہِ شاہاں

184

تجھ قد اُپر جب سوں پڑی جگ میں نگاہ عاشقاں

تب سوں گئی طوبیٰ تلک جیوں تیر آہ عاشقاں

جب سوں ترا مکھ دیکھ کر معشوق سب عاشق ہوئے

تب سوں تو ملک حسن میں ہے بادشاہ عاشقاں

ساعت شناساں دنگ ہیں عشاق کے احوال سوں

یک یک گھڑی تجھ ہجر کی ہے سال و ماہ عاشقاں

پہنچے ہیں منزل سالکاں تجھ حسن کے پرتو ستی

یہ نور تیرا اے سجن ہے شمع راہ عاشقاں

وو یوسف کنعانِ دل کس کارواں میں ہے ولیؔ

جس کے زنخداں کوں جگت بولے ہیں چاہ عاشقاں

185

ہے نازنیں صنم کا زلفاں دراز کرناں

فتنے کا عاشقاں پر دروازہ باز کرناں

دل لے گیا ہے میرا پھر مانگتا ہے جی کوں

بر جا ہے نازنیں کوں عاشق پہ ناز کرناں

اے قبلہ رو دِسے ہے محراب تجھ بھواں کی

واجب ہوا انکھاں سوں اب جا نماز کرناں

کیوں کر چھپا سکوں میں تجھ درد کی حقیقت

ہے کام آہ دل کا افشاے راز کرناں

ایسا بسا ہے آکر تیرا خیال جیو میں

مشکل ہے جیوں سوں تجھ کوں اب امتیاز کرناں

ہے منحصر اسی میں عاشق کی سرخ روئی

خدمت میں گل رخاں کی جیو سوں نیاز کرناں

میں عشق سوں کیا ہوں تجھ دل کوں نرم آخر

ہر اک کا کام نئیں ہے آہن گداز کرناں

یک بارگی رقیبِ بدخو کی بات سن کر

بے جا ہے پاک بیں سوں یوں احتراز کرناں

دروادئ حقیقت جن نے قدم رکھا ہے

اوّل قدم ہے اس کا عشق مجاز کرناں

ہے پہنچنے کا ساماں کعبے کوں مدعا کے

دریائے عاشقی میں دل کوں جہاز کرناں

شاید غزل ولیؔ کی لے جا اسے سنادے

اس واسطے بجا ہے مطرب سوں ساز کرنا

186

قسمت تری ہے حق پہ نہ ہونا اُمید یھاں

نئیں اس قُفَل کوں غیر توکّل کلید یھاں

سختی کے بعد عیش کا امیدوار اچھ

آخر ہے روزہ دار کو اک روز عید یھاں

ظلمات میں یو غم کے ملے گا تجھ آب خضر

دامن تلے ہے رات کے روز سفید یھاں

سب کام اپس کے سونپ کے حق کو نچنت ہو

یہ ہے تمام مقصد گفت و شنید یھاں

حاجت اپس کی کہنہ و نَو اس سوں کہہ ولیؔ

محتاج جس نزک ہیں قدیم و جدید یھاں

187

سجن تجھ انتظاری میں رہیں نس دن کھلی انکھیاں

مثال شمع تیرے غم میں رو رو بہہ چلی انکھیاں

ہوئی جیوں جلوہ گر تجھ یاد سوں مجھ دل میں بے تابی

تپش شعلہ نمن گرمی سوں غم کے تلملی انکھیاں

جدائی جب سوں ہُئی ظاہر تدہان سوں بوجھتا ہوں میں

ترے بِن تیل کے جیوں میل سرمے کی سلی انکھیاں

ترے بن رات دن پھرتیاں ہیں بن بن کشن کے مانند

اپس کے مُکھ اُپر رکھ کر نگہ کی بانسلی انکھیاں

نزک میرے کرم سوں تاکہ آوے بے حجاب ہوکر

تماشے میں ترے جیوں آرسی ہیں صیقلی انکھیاں

تری نیناں پہ گر آہو تصدق ہو تو اَچرج نئیں

کہ اُس کوں دیکھ کر گلشن میں نرگس نے ملی انکھیاں

اتی خواہاں ہیں تجھ حسن و ملاحت ہور لطافت کی

کہ گویا دل میں رکھتیاں ہیں سدا فکر ولیؔ انکھیاں

188

قرار نئیں ہے مرے دل کوں اے سجن تجھ بن

ہوئی ہے دل میں مرے آہ شعلہ زن تجھ بن

شتاب باغ میں آ اے گل بہشتی رو

کہ بلبلاں کوں جہنم ہوا چمن تجھ بن

قِران کب ہو میسر ترا اے زہرہ جبیں

ہر ایک آن ہے مجھ حق میں سو قرن تجھ بن

چمن کی سیر سوں نفرت ہے اس سبب کہ مجھے

سفید داغ سوں مکروہ ہے سمن تجھ بن

اے رشک چشمۂ خضر اپنے مکھ کی شمع دکھا

کہ ہے بہ صورت ظلمات انجمن تجھ بن

نہ کر تغافلی اے مصر حسن کے یوسف

مثال دیدۂ یعقوب ہیں نین تجھ بن

ولیؔ کے دل کی حقیقت بیان کیوں کے کروں

گرہ ہوا ہے زباں پر مری سخن تجھ بن

189

دل ہوا ہے مرا خراب سخن

دیکھ کر حُسن بے حجاب سخن

بزم معنی میں سرخوشی ہے اسے

جس کوں ہے نشۂ شراب سخن

راہ مضمون تازہ بند نہیں

تا قیامت کھلا ہے باب سخن

جلوہ پیرا ہو شاہد معنی

جب زباں سوں اُٹھے نقاب سخن

گوہر اس کی نظر میں جا نہ کرے

جن نے دیکھا ہے آب و تاب سخن

ہرزہ گویاں کی بات کیوں کے سنے

جو سنا نغمۂ رباب سخن

ہے تری بات اے نزاکت فہم

لوح دیباچۂ کتاب سخن

ہے سخن جگ منیں عدیم المثل

جز سخن نئیں دوجا جواب سخن

لفظ رنگیں ہے مطلع رنگیں

نور معنی ہے آفتاب سخن

شعر فہموں کی دیکھ کر گرمی

دل ہوا ہے مرا کباب سخن

عرفیؔ و انوریؔ و خاقانیؔ

مجکوں دیتے ہیں سب حساب سخن

اے ولیؔ درد سر کبھو نہ رہے

جب ملے صندل و گلاب سخن

190

تری زُلَف سوں ہر اک نس ہوں بے قرار سجن

ہوا ہوں شانہ صفت غم سوں دل فگار سجن

جواہراں پہ ہیں غالب ترے یہ ناخن سرخ

حنا سوں اس کے اوپر پھر نہ کر نگار سجن

تری انکھاں کے نشے سوں مدام گلشن میں

نین میں نرگس شہلا کے ہے خمار سجن

صبح پہ وعدہ نہ کر آج مجھ کوں دے دیدار

ترے بچن کا نہیں مجھ کوں اعتبار سجن

اپس کی مکھ کی طرف دیکھ کر نظر فرما

نہ کر زُلَف کی اشارت سوں مار مار سجن

تری بہار کے فیضِ ہوا سوں عالم میں

کھلے ہیں گل کی نمن جگ کے گل عذار سجن

ولیؔ نثار ہے تجھ پر تو اس پہ مہر سوں دیکھ

یو بات تجھ کوں کہاں ہوں میں لاکھ بار سجن

191

سب چمن کے گل رخاں کا تو ہے زیب اے گل بدن

گل بدن تجھ سا نہ دیکھا گرچہ دیکھا سب چمن

انجمن میں تجھ وراں دوجا نہیں کوئی زیب ور

زیب در سو تو نچ ہے مانند شمع انجمن

خوش بچن تیرے فصاحت میں ہیں مستثنائے وقت

وقت گر پاؤں تو تجھ مکھ سوں سنوں میں خوش بچن

برہمن تجھ مکھ کوں دیکھا پاس ہند و زلف کے

زلف کے تاراں جنیؤ کر کے سمجھا برہمن

دھن کے گالاں پر یہ بالاں کوں جو دیکھا مثل گال

گال نے اس خال کوں محبوب سمجھا مال و دھن

تجھ ذقن کی لذتاں میں محو پایا سیب کوں

سیب کوں ہے چاہ تب سوں جب سوں دیکھا تجھ ذقن

کئی جتن سوں شعر بولا ہوں ولیؔ سن شوق سوں

شوق سوں جوہر نمن رکھ اس کوں کر کے کئی جتن

192

مجھ کوں ہے دار الامن پیو کا نقش چرن

پیو کا نقش چرن مجھ کوں ہے دارالامن

پیو کا شیریں بچن مجکوں ہے آب حیات

مجکوں ہے آب حیات پیو کا شیریں بچن

اے مہ سیمیں بدن مکھ کوں اپس کے دکھا

مکھ کوں اپس کے دکھا اے مہ سیمیں بدن

مجھ سوں گیا ما ومن دیکھ کے تیرے نَین

دیکھ کے تیرے نَین مجھ سوں گیا ما ومن

تجھ سوں لگی ہے لگن اے گل باغِ حیا

اے گل باغِ حیا تجھ سوں لگی ہے لگن

زلف تری برہمن مکھ ہے ترا آفتاب

مکھ ہے ترا آفتاب زلف تری برہمن

دستۂ گل ہے سجن سن یو سخن اے ولیؔ

سن یو سخن اے ولیؔ دستۂ گل ہے سجن

193

ہوا ہے جب سوں ترا تل سوار آتش حسن

سپندوار ہے دل بے قرار آتش حسن

یو خط کوں دود نمن دیکھ کر ہوا معلوم

کہ گرم پھر کے ہوا روزگار آتش حسن

ہنوز حسن کی گرمی بجا ہے اے گل رو

خط سیاہ ہے تیرا حصار آتش حسن

وو شمع بزم ادا بر میں کر لباس زری

ہے آفتاب نمن شعلہ زار آتش حسن

نہیں ہے کسوت زر شعلہ قد کے قد اوپر

یہ ہر طرف سوں اُٹھے ہیں شرار آتش حسن

سجن کو دیکھ کے دشوار ہے بجا رہنا

نگاہ تیز نگاہاں ہے خار آتش حسن

ولیؔ کیا ہوں نظر بسکہ اس پری رو پر

ہوا کباب نمن دل شکار آتش حسن

194

گریۂ عشاق سوں خنداں ہے باغ بزم حسن

مغز پروانہ سوں روشن ہے چراغ بزم حسن

کیوں نہ ہووے عاشقاں کوں نشۂ دیوانگی

گردش چشم پری سوں ہے ایاغ بزم حسن

عاشقاں اس آتشیں رخسار کے چہرے اُپر

پیچ و تاب زلف ہے دودِ چراغ بزم حسن

بے خبر ہیں تجھ گلی سوں اس سبب اے گلبدن

بلبلاں کرتی ہیں گلشن میں سراغ بزم حسن

حسن کی مجلس کوں جب روشن کیا وو شمع رو

خوب رویاں سب ہوئے جیوں لالہ داغ بزم حسن

آتش غیرت سوں گل پانی ہوا مغز شمع

وو صنم جب سوں ہوا عالی دماغ بزم حسن

صرف کیتا ہے ولیؔ عالم منیں نقاش طبع

عیش کی تصویر میں رنگ فراغ بزم حسن

195

عاشق کے مکھ پہ نین کے پانی کو دیکھ توں

اس آرسی میں راز نہانی کوں دیکھ توں

سُن بے قرار دل کی اول آہ شعلہ خیز

تب اس حرف میں دل کے معانی کو دیکھ توں

خوبی سوں تجھ حضور و شمع دم زنی میں ہے

اس بے حیا کی چرب زبانی کوں دیکھ توں

دریا پہ جا کے موج رواں پر نظر نہ کر

انجھواں کی میرے آکے روانی کوں دیکھ توں

تجھ شوق کا جو داغ ولیؔ کے جگر میں ہے

بے طاقتی میں اس کی نشانی کو دیکھ توں

196

یک بار مری بات اگر گوش کرے توں

ملنے کو رقیباں کے فراموش کرے تو

ہے بسکہ تیر نَین میں کیفیّت مستی

یک دید میں کونین کوں بے ہوش کرے توں

اے سرو گل اندام اپس نقش قدم سوں

برجا ہے اگر صحن کوں گل پوش کرے توں

غیرت سوں کرے چاک گریباں دل پر خوں

گر گل کی حمائل کوں ہم آغوش کرے توں

اے جان ولیؔ وعدۂ دیدار کوں اپنے

ڈرتا ہوں مبادا کہ فراموش کرے تو

197

چلنے منیں اے چنچل ہاتی کوں لجاوے تو

بے تاب کرے جگ کوں جب ناز سوں آوے توں

یک بارگی ہو ظاہر بے تابیِ مشتاقاں

جس وقت کہ غمزے سوں چھاتی کوں چھپاوے توں

گویا کہ شفق پیچھے خورشید ہوا ظاہر

جب اوٹھ میں پردے کے چہرے کو دکھاوے توں

لوئیِ فلک مکھ میں انگشت تحیّر لے

جب پاؤں نزاکت سوں مجلس میں نچاوے توں

عشاق کی شادی کی اُس وقت بجے نوبت

مردنگ کی جس ساعت آواز سناوے توں

یک تان سنانے میں جی تان لیا سب کا

اب دل سوں بکیں سارے گر بھاؤ بتاوے توں

توبائے ریائی سوں شاید کہ کرے توبہ

اس وقت ولیؔ کوں گر بھر جام پلاوے توں

198

خوبی2 اعجاز حسن یار اگر انشاء کروں

بے تکلف صفحۂ کاغذ یدِ بیضا کروں

پونچتی نئیں کعبۂ مقصود کوں کشتیِ چشم

فیض سوں انجھواں کے دریا کوں مگر پیدا کروں

جیوں نسیم اب لگ سبک روحی مجھے حاصل نہیں

کس طرح اس غنچۂ بند قبا کوں وا کروں

کیا کہوں تجھ قد کی خوبی سرو عریاں کے حضور

خود بہ خود رسوا ہے اس کوں پھر کے کیا رسوا کروں

ہندوے زلف پری رو ہے پریشانی فروش

بیچ دیوے مجھ کوں سودے میں اگر سودا کروں

سنگ دل کے دل پہ ہووے نقش جیوں نقش نگیں

آہ کالے کر قلم جب درد کو انشاء کروں

سر کروں جب وصف تیرے جامۂ گلرنگ کے

جامہ زیباں کو برنگ صورت دیبا کروں

رات کوں آؤں اگر تیری گلی میں اے حبیب

زیور لب ذکر سُبحان الذی اسریٰ کروں

آرزو دل میں یہی ہے وقت مرنے کے ولیؔ

سرو قد کوں دیکھ سیر عالم بالا کروں

199

بھڑکے ہے دل کی آتش تجھ نیہ کی ہوا سوں

شعلہ نمط جلا دل تجھ حسن شعلہ زا سوں

گل کے چراغ گل ہو یک بار جھڑ پڑیں سب

مجھ آہ کی حکایت بولیں اگر صبا سوں

نکلی ہے جست کر کر ہر سنگ دل سوں آتش

چقماق جب پلک کی جھاڑا ہے توں ادا سوں

سجدہ بدل رکھے سر، سر تا قدم عرق ہو

تجھ با حیا کے پگ پر آکر حنا حیا سوں

یھاں درد ہے پرم کا بے ہودہ سر کہے مت

یہ بات سن ولیؔ کی جا کر کہو دوا سوں

200

میری طرف سوں جا کے کہو اس حبیب سوں

گر مجھ کوں چاہتا ہے تو مت مل رقیب سوں

مت خوف کر تو مجھ سوں اے دلدار مہرباں

آزار نئیں ہے گل کوں کبھو عندلیب سوں

مت راہ دے رقیب سیہ رو کوں اے صنم

واجب ہے احتراز بلائے مہیب سوں

پوچھو نکو طبیب کوں مجھ درد کا علاج

بیمار کوں برہ کے غرض نئیں طبیب سوں

اُس بے وفا کی طرز سوں شکوہ نہیں ولیؔ

ہے جنگ رات دیس مجھے مجھ نصیب سوں

201

تجھ مکھ کی جھلک دیکھ گئی جوت چندر سوں

تجھ مکھ پہ عرق دیکھ گئی آب گہر سوں

شرمندہ ہو تجھ مکھ کے دکھے بعد سکندر

بالفرض بناوے اگر آئینہ قمر سوں

تجھ زلف میں جو دل کہ گیا اس کوں خلاصی

نئیں صبح قیامت تلک اس شب کے سفر سوں

ہرچند کہ وحشت ہے تجھ انکھیاں ستی ظاہر

صد شکر کہ تجھ داغ کوں الفت ہے جگر سوں

اشرفؔ کا یو مصراع ولیؔ مجکوں ہے دل چسپ

الفت ہے دل و جاں کوں مرے پیم نگر سوں

202

باندھا ہے جو دل جگ منیں اس نور نظر سوں

دیکھا ہے وو دریا کوں اپس دیدۂ تر سوں

خوں ریزئ عشاق ہے موقوف اسی پر

شمشیر کوں باندھا جو کوئی موے کمر سوں

پتلی و نگہ سوں یو ترا غمزۂ خوں خوار

آیا دل عشاق طرف تیغ و سپر سوں

یک تل نہیں آرام مرے دل کو ترے باج

اے نور نظر دور نہ ہو میری نظر سوں

اُس لب کی حلاوت ہے ولیؔ طبع میں میری

یو شعر مرا جگ منیں میٹھا ہے شکر سوں

203

باندھا ہوں اپس جیو ترے موے کمر سوں

دیکھا ہوں اُسے جب ستی دقّت کی نظر سوں

پہنچی ہے مری فکر بلندی سوں فلک پر

تجھ قد کی جو تعریف کیا اس کے اثر سوں

ہے بسکہ ترے رنگ میں صافی و لطافت

لکھتا ہوں ترے وصف کوں میں آب گہر سوں

انکھیاں سوں ہوا پیو جدا جب ستی میری

جاتے ہیں مرے اشک گیا پیو جدھر سوں

تجھ ہجر میں دامان و گریبان و رُمالاں 

شاکی ہیں ہر اک رات مرے دیدۂ تر سوں

ہیں مغز میں پستے کی نمن تل کے سبب یوں

گویا یہ لباں لے کے گئے گوئے شکر سوں

پڑھتے ہیں ولیؔ شعر ترا عرش پہ قدسی

باہر ہے تری فکر رسا حدّ بشر سوں

204

جب سوں دل باندھا ہے ظالم تجھ نگہ کے تیر سوں

تب سوں رم نے رم کیا رمنے کے ہر نخچیر سوں

بے حقیقت گرم جوشی دل میں نئیں کرتی اثر

شمع روشن کیوں کے ہووے شعلۂ تصویر سوں

جگ میں اے خورشید و وو چرخ زن ہے ذرہ دار

جن نے دل باندھا ہے تیرے حسن عالم گیر سوں

اے پری تجھ قد کا دیوانہ ہوا ہے جب سوں سرو

پائے بند اس کوں کیے ہیں موج کی زنجیر سوں

خواب میں دیکھا جو تیرے سبزۂ خط کوں صنم

سبز بختوں میں ہوا اس خواب کی تعبیر سوں

جگ میں نئیں اہل ہنر اپنے ہنر سوں بہرہ یاب

کوہ کن کوں فیض کب پہنچا ہے جوئے شیر سوں

اے ولیؔ پی کا دہن ہے غنچۂ گلزار حسن

بوئے گل آتی ہے اس کی شوخیِ تقریر سوں

205

اے نور چشم تجھ پر نامہ لکھا پلک سوں

کیتا ہوں مہر اس پر انکھیا کی مردمک سوں

اے رشک مہر انور ٹک مہر سوں خبر لے

گزری ہے آہ میری تجھ غم میں نُہ فلک سوں

اہل چمن کے دل میں بے قدر ہے صنوبر

باندھے ہیں جب ستی جیو تجھ سرو کی لٹک سوں

اُس وقت ہوش عاشق ثابت قدم رہے کیوں

سلطان حسن آوے جب ناز کی کٹک سوں

اے آفتاب طلعت مانند مہ ولیؔ کا

روشن ہوا ہے سینہ تجھ حسن کی جھلک سوں

206

ہوا ہے دنگ بنگالہ تری نرگس کے جادو سوں

معطر ہے سواد ہند تیری زلف کی بو سوں

قسم تیرے تغافل کی کہ نرگس کی قلم لے کر

تری انکھیاں کے جادو کوں لکھا ہوں خون آہو سوں

کیا ہے مصرع برجستۂ قوس قزح موزوں

فلک مضمون رنگیں لے گیا تجھ بیت ابرو سوں

سخن میرا ہوا ہے تب سوں بالا ہر سخن اوپر

لگا ہے دھیان میرا جب ستی اس سرو دل جو سوں

ہوا تجھ حسن پر دو جگ دوانہ گر تعجب نئیں

اگر مجھ سے دوانے کا بندھا دل تجھ پری رو سوں

مجھے گلشن طرف جانا بجا ہے اے مہِ انور

کہ میں پاتا ہوں تجھ زلفاں کی بو ہر رات شبّو سوں

ولیؔ ہر شعر سوں میرے نزاکت جلوہ پیرا ہے

بجا ہے گر لکھوں اس مو کمر کوں خامۂ مُو سوں

207

آتا ہے جب چمن میں توں زریں کلاہ سوں

اُٹھتی ہے فوج حسن تری جلوہ گاہ سوں

بزم ادا و نازکوں وہ شوخ نازنیں

خوش بو کیا ہے عنبر موج نگاہ سوں

بے جا نہیں ہے رخ پہ مرے رنگ اضطراب

باندھا ہوں دل کوں آہوے وحشت پناہ سوں

پروانہ وار عشق میں تیرے جو جیو دیا

اس کا کفن ہے رشتۂ شمع نگاہ سوں

حاجت نہیں چراغ کی تجھ گھر میں اے ولیؔ

روشن ہے بزم عشق تری شمع آہ سوں

208

کیتا ہوں بند دل کوں اس غیرت پری سوں

جن نے کیا ہے مجنوں عالم کوں دلبری سوں

رکھتا ہے عاشقاں سوں بازار حسن گرمی

ہر چیز کی جہاں میں ہے قدر مشتری سوں

عاشق سوں جا کے پوچھو معشوق کی حقیقت

مخفی نہیں ہے خوبی جوہر کی جوہری سوں

جن نے رقم کیا ہے تعریف تجھ نیَن کی

معنی میں کیوں نہ ہووے ہم چشم عبہری سوں

دل دار کی گلی سوں کیوں جا سکوں ولیؔ میں

لیتا لپیٹ دل کوں جب چیرۂ زری سوں

209

جا لیا تمام نس مجھ اس طبع آتشی سوں

اب صبح دم ہے دم لے اے شمع سرکشی سوں

دل داشت کرسکے تو یہ دل لجا اپس سنگ

گر دل کُشی پہ دل ہے تو کیا ہے دل کشی سوں

عاشق کے دیکھنے سوں لاتا ہے چیں جبیں پر

اے خوش ادا میں خوش ہوں تیری یہ ناخوشی سوں

اے پستہ لب ترے لب ہیں کان سب نمک کے

کر بہرہ مند مجکوں اس کی نمک چشی سوں

دنیا کے غل و غش سوں فارغ رہوں ولیؔ میں

یک جام گر ملے مجھ صہبائے بے غشی سوں

210

سیہ روئی نہ لیجا حشر میں دنیائے فانی سوں

سہ نامے کوں دھو اے بے خر انجھواں کے پانی سوں

شب غم روز عشرت سوں بدل ہووے اگر دیکھے

تری جانب وو مہر ذرہ پرور مہربانی سوں

نزک جاناں کے گر تحفہ لجانا ہے تو اے ناداں

لجا گل دستۂ اعمال باغِ زندگانی سوں

نہیں ہے سیر یک ساعت اگر ملک جوانی میں

کہو کیا خضر کوں حاصل ہے ملک جاودانی سوں

اپس کے سر پہ مارا کوہ کن نے تیشۂ غیرت

ہوا جب خسروِ عالم ولیؔ شیریں زبانی سوں

211

میری طرف سوں جا کہو اُس ماہ عالم تاب کوں

یک رات فرش خواب کر مجھ دیدۂ کم خواب کوں

اپنے دل پُرخوں کوں میں لایا ہوں تیرے پیش کش

خرچ گر درکار ہے اطلس تجھے سنجاب کوں

گر عشق میں آیا ہے تو اے دل، گریباں پارہ کر

لیتے ہیں اس بازار میں بے تابیِ سیماب کوں

میرے دل گم نام کی کیا قدر بوجھے بے خبر

ہے دلبراں کَن اعتبار اس گوہر نایاب کوں

مجھ دل کوں سرگرداں کیا ساغر نمن اس شوخ نے

جس کی زلف کے پیچ نے چکر دیا گرداب کوں

صافی دلاں کَن بیٹھنا ہے کسب عزت کا سبب

دریا کا ہوکر ہم نشیں پہنچا ہے موتی آب کوں

تجھ یاد میں انجھواں ستی لبریز ہیں چشم ولیؔ

یک بار دیکھ اے سبز خط اس چشمۂ سیراب کوں

212

تشنگی اپنی نہیں کہتا کسی بے آب کوں

جیوں گہر رکھتا ہے دائم جو گرہ میں آب کوں

اضطراب دل گیا ہے اس کے مکھ کوں دیکھ کر

بے قراری سوں نکالے آرسی سیماب کوں

اشک ریزاں مثل انجم صبح محشر لگ رہا

جن نے دیکھا یک نظر اس ماہ عالم تاب کوں

تجھ بھواں کے خم کوں دیکھا جب ستی اے قبلہ رو

رات دن رکھتا ہے زاہد مکھ اَگے محراب کوں

اے ولیؔ پی کی محبت سوں زمیں کے فرش پر

آنکھ بھر دیکھا نہیں کُئی غیر مخمل خواب کوں

213

خدایا ملا صاحب درد کوں

کہ میرا کہے درد بے درد کوں

کرے غم سوں صد برگ صد پارہ دل

دکھاؤں اگر چہرۂ زرد کوں

ہٹا بوالہوس تجھ بھواں دیکھ کر

کہاں تاب شمشیر نامرد کوں

اگر جل میں جل کر کنول خاک ہو

نہ پہنچے ترے پانوں کی گرد کوں

لکھا تجھ دہن کی صفت میں ولیؔ

ہر ایک فرد میں جوہر فرد کوں

214

دیکھا ہے جن نے اے صنم تجھ طرّۂ طرار کوں

رکھتا ہے سینہ بر منیں جیوں شمع سوز نار کوں

جیوں زخم اُس کی چشم سوں جاری ہے خوں ہردم منیں

دیکھا ہے جو کُئی یک نگہ تجھ ناز کی تلوار کوں

تیری پرت کے پنتھ میں اے دراوے درماندگاں

بخشے ہیں عاصا آہ کا تجھ چشم کے بیمار کوں

اے سرگروہ سرکشاں لایا ہے نسّاجِ فلک

خط شعاعی سوں بُنا تجھ چیرۂ زر تار کوں

ہر استخواں سینے کا ہے مانند نَے فریاد میں

رکھتا ہوں دائم بر منیں تجھ غم کے موسیقار کوں

دیکھا ہے جب سوں آنکھ بھر تجھ مکھ کوں اے رشک چمن

چھوڑاں ہیں تب سوں بلبلاں عشق گلِ گل زار کوں

جیوں معنیِ رنگیں ولیؔ ہو مہرباں مجھ حال پر

وو صاحب معنی سُنے میرے اگر اشعار کوں

215

دیتا نہیں ہے بار رقیب شریر کوں

شاید کہ بوجھتا ہے ہمارے ضمیر کوں

اس نازنیں کی طبع گر آوے خیال میں

بوجھوں صدائے صور قلم کی صریر کوں

برجا ہے اس کوں عشق کے گوشے منیں قرار

جو پیچ و تابِ دل سوں بچھاوے حصیر کوں

اس کے قدم کی خاک میں ہے حشر کی نجات

عشاق کے کفن میں رکھو اس عبیر کوں

مجھ کوں ولیؔ کی طبع کی صافی کی ہے قسم

دیکھا نہیں ہوں جگ میں سجن تجھ نظیر کوں

216

میں دل کو دیا بند کر اس سحر بچن کوں

عشاق جسے دیکھ بسارے ہیں وطن کوں

عنقا ہے سخن اس کا سخن فہم کے نزدیک

رکھتا ہے جو کوئی یاد میں اس غنچہ دہن کوں

و اللہ کہ صادق ہے وہ عشاق کی صف میں

جو صبح نمن سرسوں لپیٹا ہے کفن کوں

اس شوخ نے دکھلا کے اپس رنگ کی خوبی

لوہو میں کیا غرق جو انانِ چمن کوں

ثابت رہے کیوں رنگ ولیؔ اس کا جہاں میں

دیکھا ہے جو دلدار کی زلفاں کی شکن کوں

217

نئیں معلوم ہوتا، داغ دینے کس بچارے کوں

چلا ہے آج یو لالہ ہزارے کے نظارے کوں

لیا ہے گھیر تجھ زلفاں نے تیرے کان کا موتی

مگر یہ ہند کا لشکر لگا ہے آ ستارے کوں

ہر اک احوال میں دلبر نظر میں خوب آتا ہے

لباس خوب کی حاجت نہیں حق کے سنوارے کوں

یہی ہے آرزو دل میں کہ صاحب درد کُئی جاکر

ہمارے درد کی باتاں کہے اس پی پیارے کوں

کمر سوں نئیں جدا ہوتی نظر اس شوخ چنچل کی

ولیؔ آخر کیا ہے صید چیتے نے چکارے کوں

218

دیکھوں گا شتابی ستی اس رشک پری کوں

گر کچھ بھی اثر ہے مری آہ سحری کوں

اے شوخ ترے ملنے کوں انکھیاں کے اُپر رکھ

لایا ہوں تری نذر عقیق جگری کوں

انجن کوں لگا سحر کے غائب ہووے ساحر

دیکھے جو تری نین کی جادو نظری کوں

اے حیلۂ گر رندی تری حیلہ گری دیکھ

سب حیلہ گراں ترک کیے حیلہ گری کوں

یک بارگی ہوتا ہے ولیؔ زر کے نمن زرد

جب باندھ کے آتا ہے تو دستار زری کوں

219

دیکھے گا ہر اک آن تری جلوہ گری کوں

پایا ہے تری مہر سوں جو دیدہ وری کوں

بخشا ہے تری نین نے کیفیت مستی

تجھ مکھ نے خبردار کیا بے خبری کوں

جاری ہوا تجھ غم ستی مجھ اشک کا مطلب

ہم دانہ وہم آب ملا اس سفری کوں

مجھ عاشق دیوانہ کوں گر حکم ہو تیرا

تجھ حور اَگے فرش کروں آج پری کوں

ہر گل کا سِنَہ چاک ہو سن درد کوں میرے

گلشن کی طرف بھیجوں گر آہ سحری کوں

کھا پیچ ڈُبے شرم سوں مغرب منیں سورج

گر دیکھے ترے سیس پہ دستار زری کوں

کرتا ہے ولیؔ سحر سدا شعر کے فن میں

تجھ نین سوں سیکھا ہے مگر جادوگری کوں

220

ہرگز تو نہ لے ساتھ رقیب دغلی کوں

مت راہ دے خلوت منیں ایسے خللی کوں

تیرے لب یاقوت اُپر خطِّ خفی دیکھ

خطاّط جہاں نسخ کیے خطِّ جلی کوں

اے زہرہ جبیں کِشن ترے مکھ کی کلی دیکھ

گاتا ہے ہر اک صبح میں اُٹھ رام کلی کوں

یاقوت کوں ہے قوت ترے خط کی محبت

ہے دل میں غبار اس کے سبب میرعلی کوں

اے ماہِ جبیں مہر لقا تیری جبیں پر

کرتا ہوں ہر اک دم منیں دم نادِ علی کوں

میں دل کوں ترے ہاتھ دیا روزِ ازل سوں

مت دل سوں بسار اپنے محب ازَلی کوں

نئیں منصب و جاگیر نہیں روز وظیفہ

ہر روز ترا نام وظیفہ ہے ولیؔ کوں

221

ہوا ہے رشک چنپے کی کلی کوں

نظر کر تجھ قبائے صندلی کوں

کرے فردوس استقبال اس کا

تصوّر جو کیا تیری گلی کوں

دلِ بے تاب نے تجھ غم کی خاطر

کیا ہے فرش خواب مخملی کوں

ہماری آہ آتش رنگ سن کر

ہوئی ہے بے قراری بیجلی کوں

ترے غم میں دل سوراخ سوراخ

کیا پیدا صدائے بانسلی کوں

دل پُرخوں نے میرے باغ میں جا

دیا تعلیم خوں خواری کلی کوں

کیا ہوں آب خجلت سوں سراپا

ہر اک مصرع سوں مصری کی ڈلی کوں

پڑے سن کر اُچھل جیوں مصرعِ برق

اگر مصرع لکھوں ناصرعلی کوں

ترے اشعار ایسے نئیں فراقیؔ

کہ جس پر رشک آوے گا ولیؔ کوں

222

جو کوئی سمجھا نہیں اُس مکھ پہ آنچل کے معانی کوں

وو کیوں بوجھے کہو اس شوخ چنچل کے معانی کوں

کریں کے بحث اس انکھیاں کے جادو کے سحر سازاں

نہ پہنچے کوئی باریکی میں کاجل کے معانی کوں

وو یوسف کوں کہے ثانی سو اس بے مثل کا کیوں کر

وو بیں کر جوکہ سمجھا چشم احول کے معانی کوں

نہ نکلے بحر حیرت سوں جو ہو اس مکھ کا ہم زانو

یہ بوجھے وو جو پہنچا ہے سجنجل کے معانی کوں

صفائی دیکھ اُس کے مکھ کی ہے بے ہوش سر تا پا

یہی تحقیق سمجھو خواب مخمل کے معانی کوں

بیاں زلف بدیعی کا ہے سعد الدین کا مطلب

اَجھوں لگ تم نہیں سمجھے مطوّل کے معانی کوں

ولیؔ اس ماہ کامل کی حقیقت جو نہیں سمجھا

وو ہرگز نئیں بُجھا عالم میں اکمل کے معانی کوں

223

فدائے دلبر رنگیں ادا ہوں

شہید شاہد گل گوں قبا ہوں

ہر اک مہ رو کے ملنے کا نئیں ذوق

سخن کے آشنا کا آشنا ہوں

کیا ہوں ترک نرگس کا تماشا

طلب گار نگاہ باحیا ہوں

نہ کر شمشاد کی تعریف مجھ پاس

کہ میں اس سرو قد کا مبتلا ہوں

کیا میں عرض اس خورشید رو سوں

تو شاہ حسن میں تیرا گدا ہوں

قدم پر اس کے رکھتا ہوں سدا سر

ولیؔ ہم مشرب رنگ حنا ہوں

224

میں سورۂ اخلاص ترے رو سوں لکھا ہوں

بسم اللہ دیوان تجھ ابرو سوں لکھا ہوں

تجھ چشم کی تعریف کوں آہو کے نَین پر

اکثر قلمِ نرگسِ جادو سوں لکھا ہوں

اے موئے میاں وصف ترے موئے میاں کے

چیتے کی کمر پر قلمِ مو سوں لکھا ہوں

تجھ طرّۂ طراّر کی تعریف کوں اے شوخ

سنبل کے چمن میں گل شبّو سوں لکھا ہوں

اس مردمک چشم طرف حال ولیؔ کا

پلکاں کی قلم کر اَپس انجھو سوں لکھا ہوں

225

تصویر تری جان مصفّا پہ لکھا ہوں

یہ نقش پری پردۂ مینا پہ لکھا ہوں

مجھ عاشق یک رنگ سوں دو رنگ ہوا توں

تیری یہ دو رنگی گل رعنا پہ لکھا ہوں

تجھ سنبل پر پیچ کی خوبی میں کتک سطر

موجاں کی نمن صفحۂ دریا پہ لکھا ہوں

یک تل نہیں آرام ترے تل کے سبب مجھ

یو صورت تل دل کے سویدا پہ لکھا ہوں

فرہاد لکھا صورت معشوق حجر پر

میں صورت دلبر دل شیدا پہ لکھا ہوں

ہرگز نہ کیا نرم صنم دل کوں اپس کے

یہ سنگ دلی تختۂ خارا پہ لکھا ہوں

اے مردمک چشم تجھ انکھیاں کی یہ لالی

نرگس کے قلم سوں گل لالہ پہ لکھا ہوں

اعجاز ترے اس خط روشن کا سری جن

جیوں خط شعاعی ید بیضا پہ لکھا ہوں

پیتم نے قدم رنجہ کیا میری طرف آج

یہ نقش قدم صفحۂ سیما پہ لکھا ہوں

تجھ عشق میں دیکھا ہے یہ دل وسعتِ منزل

یہ حالتِ دل دامن صحرا پہ لکھا ہوں

اے آہ بلندی تجھے اُس قد کے سبب ہے

تنخواہ تری عالمِ بالا پہ لکھا ہوں

تجھ نرگس مخمور کی کیفیّت مستی

اکثر خط ساغر ستی صہبا پہ لکھا ہوں

اس کے دہن تنگ کی تعریف کا نکتہ

صنعت سوں ولیؔ دیدۂ عنقا پہ لکھا ہوں

226

میں عاشقی میں تب سوں افسانہ ہو رہا ہوں

تیری نگہ کا جب سوں دیوانہ ہو رہا ہوں

اے آشنا کرم سوں یک بار آ درس دے

تجھ باج سب جہاں سوں بیگانہ ہو رہا ہوں

باتاں لگن کی مت پوچھ اے شمع بزم خوبی

مدّت سے تجھ جھلک کا پروانہ ہو رہا ہوں

شاید وو گنج خوبی آوے کسی طرف سوں

اس واسطے سراپا ویرانہ ہو رہا ہوں

سودائے زلف خوباں رکھتا ہوں دل میں دائم

زنجیر عاشقی کا دیوانہ ہو رہا ہوں

برجا ہے گر سنوں نئیں ناصح تری نصیحت

میں جام عشق پی کر مستانہ ہو رہا ہوں

کس سوں ولیؔ اپس کا احوال جا کہوں میں

سر تا قدم میں غم سوں غم خانہ ہو رہا ہوں

227

باطن کی گر مدد ہو اسے یار کر رکھوں

اپنے سخن کا اس کوں خریدار کر رکھوں

اس کی ادا و نازکی خوبی کوں کر بیاں

ہر خوب رو کوں صورت دیوار کر رکھوں

لائق ہے گر وو شوخ کہے اپنے فخر میں

آوے اگر پری تو پرستار کر رکھوں

برجا ہے گر چمن میں کہے وو نگاہ کر

نرگس کوں اپنی چشم کا بیمار کر رکھوں

تسبیح تیری زلف کوں کہتی ہے اے صنم

یک تاردے کہ رشتۂ زنار کر رکھوں

تیرے خیال آنے کی پاؤں اگر خبر

سینے کوں داغِ عشق سوں گلزار کر رکھوں

ایسے نصیب میرے کہاں ہیں ولیؔ کہ آج

اُس گل بدن کوں اپنے گلے ہار کر رکھوں

228

صدق ہے آب و رنگِ گلشنِ دیں

پاک بازی ہے شمع راہ یقیں

خوشہ چینِ جمال جاناں ہیں

خرمن ماہ و خوشۂ پرویں

ہے ترے لب سوں اے شکر گفتار

بات کہنا نبات سوں شیریں

قد سوں تیرے عیاں ہے اے جاناں

صورت ناز و معنی تمکیں

بسکہ رویا ہوں یاد کر کے تجھے

چشم میری ہے دامن گل چیں

زلف تیری ہے اے وفا دشمن

دشمنِ دین و دشمنِ آئیں

اے ولیؔ تب نہاں ہو لیلِ فراق

جب عیاں ہو وو آفتاب جبیں

229

آوے اگر وو شوخ ستم گر عتاب میں

جرأت جواب کی نہ رہے آفتاب میں

یک جام میں وو جگ کو کرے مست و بے خبر

تیری نین کا عکس پڑے گر شراب میں

رخسار دل ربا کا صفا کیا بیاں کروں

مخمل نے اس صفا کوں نہ دیکھا ہے خواب میں

تجھ حسن شعلہ زار کی تعریف رشک سوں

سننے کی تاب آج نہیں آفتاب میں

طاقت نہیں کہ تیری ادا کا بیاں لکھے

ہے گرچہ بے نظیر عطارد حساب میں

تجھ زلف حلقہ دار سوں مانند عاشقاں

گرداب و موج مل کے پڑے پیچ و تاب میں

تجھ حسن آبدار کی تعریف کیا کہوں

موتی ہوا ہے غرق تجھے دیکھ آب میں

تیری نگاہ مست، کہ ہے جام بے خودی

رکھتی ہے کیفیّت کہ نہیں وو شراب میں

تیری بھواں کے رتبۂ عالی کوں کر نظر

برجا ہے گر ہلال چلے تجھ رکاب میں

رکھتے ہیں اس سوں گلبدناں رغبتِ تمام

شاید کہ تجھ عرق کا اثر ہے گلاب میں

اے دل شتاب چل کہ تماشے کی بات ہے

بیٹھا ہے آفتاب نکل ماہتاب میں

ملنا بجا نہیں ہے مخالف سوں ایک آن

اس تان کو بجاوے ربابی رباب میں

میرے دل برشتہ میں محشر کا شور ہے

ہے تجھ نمک کا شاید اثر اس کباب میں

آوے وو نو بہار اگر بر سرِ سخن

طوطی کوں لاجواب کرے یک جواب میں

ہرگز نہیں ہے خشت سوں فرق اس کوں اے ولیؔ

خوش طلعتاں کی بات نہیں جس کتاب میں

230

ہے بس کہ آب و رنگ حیا کھیم داس میں

آتا نہیں کسی کے خیال و قیاس میں

ہے اُس کے مکھ سوں جلوہ نما موج آب و تاب

موتی کے مثل گرچہ ہے سادہ لباس میں

ق

بیراگیوں کے پنتھ میں آکر وو مہ جبیں

بیراگ کوں اُٹھا کے چڑھایا اَکاس میں

لگتا ہے اُس گروہ میں وو سرو نازنیں

گویا گلِ گلاب کیا جلوہ گھاس میں

اس کی بھواں کوں بوجھ کے شمشیر آبدار

اہل ہوس کی عقل ہے دائم ہراس میں

آوے فلک سوں زہرہ اُتر گر وو مہ جبیں

یک تان گاوے رام کلی یا بھباس میں

جاتا ہوں باغ یاد میں اس چشم کے ولیؔ

شاید کہ بوے اُس کی ہو نرگس کی باس میں

231

دیکھا ہے جن بنودؔ کوں اکرمؔ کے باغ میں

پہنچی ہے بوے عشق کی اس کے دماغ میں

کھویا ہے تجھ نگاہ نے عالم کے ہوش کوں

گردش عجب ہے تیری انکھیاں کے ایاغ میں

تجھ لب کا آب و رنگ جو کچھ خط سوں ہے عیاں

ہرگز وو آب و رنگ نہیں شب چراغ میں

تجھ شوق کی اگن سوں سِنہ جل گیا تمام

فی الجملہ اس کا رنگ ہے لالے کے داغ میں

تجھ وصل کے خیال سوں غافل نئیں ولیؔ

رہتا ہے رات دیس اسی کے سراغ میں

رکھتا ہوں شمع آہ سجن کے فراق میں

حاجت نہیں چراغ کی میرے رواق میں

آب حیات وصل سوں سینے کو سرد کر

جلتا ہوں رات دیس پیا تجھ فراق میں

سن کر خبر صبا سوں گریباں کوں چاک کر

نکلے ہیں گل چمن سوں ترے اشتیاق میں

اے دل عقیق لب کے یہ آے ہیں مشتری

موتی نہ بوجھ زہرہ جبیں کے بُلاق میں

تیرے سخن کے نغمۂ رنگیں کوں سن ولیؔ

ڈوبا عرق کے بیچ عراقیؔ عراق میں

233

جب تک نہ دیکھا تھا تجھے دل بند تھا اوراق میں

تیری بھواں کوں دیکھ کر جزدان چھوڑا طاق میں

مشرق سوں مغرب لگ سدا پھرتا ہے ہرہر گھر ولے

اب لگ سُرج دیکھا نہیں ثانی ترا آفاق میں

دل مستِ جام بے خودی اُس انجمن میں کیوں نہ ہو

جیوں موج مَے ہے ہر ادا ساقیِ سیمیں ساق میں

تیرے دہن کوں دیکھ کر اے نو بہار عاشقاں

جیوں غنچۂ گل ہر سحر جاتا ہوں استغراق میں

اے صبح تجھ کوں نئیں خبر اس مطلع انوار کی

ہرچند عالم گیر ہے تو حکمت اشراق میں

آیا ہے جب سوں دید میں وو نور چشم عاشقاں

جیوں نور بستا ہے سَدا مجھ دیدۂ مشتاق میں

تیری تواضع دیکھ کر بر جا ہے اے جانِ ولیؔ

گر بوعلی سینا لکھے دفتر ترے اخلاق میں

234

تجھ عشق کی اگن سوں سجن جل گیا ہوں میں

تیری گلی کی خاک میں جا رَل گیا ہوں میں

تجھ سوز میں جلا ہے جو دل شمع کی نمن

پروانہ ہو کے اس کے اُپر بَل گیا ہوں میں

اے آفتاب دیکھ ترے مکھ کی روشنی

بے تاب ہو کے مہ کے نمن گل گیا ہوں میں

یہ پھر کے دیکھنا ترا مجھ دل پہ گھات ہے

تیری نگہ کے رمز کوں اٹکل گیا ہوں میں

تجھ دل کا دیکھ سوز اَدِھک اے ولیؔ مدام

بولا پتنگ ہاتھ کوں یاں مل گیا ہوں میں

235

ہوا تو خسرو عالم سجن! شیریں مقالی میں

عیاں ہیں بدر کے معنی تری صاحب کمالی میں

جو کیفیت سیہ مستی کی تجھ انکھیاں میں ہے ظالم

نہیں وو رنگ وو مستی شراب پرتگالی میں

تری زلفاں کے حلقے میں اَہے یوں نقش رخ روشن

کہ جیسے ہند کے بھیتر لگیں دیوے دِوالی میں

اگرچہ ہر سخن تیرا ہے آب خضر سوں شیریں

ولے لذت نرالی ہے پیا تجھ لب کی گالی میں

کہو اس نور چشم و پستہ لب کوں آشنائی سوں

کہ جیوں بادام کے وو مغز ہوویں یک نہالی میں

نظر میں نئیں ہے مردوں کی صلابت اہل زینت کی

نئیں دیکھا کوئی رنگ شجاعت شیرقالی میں

ولیؔ کے ہر سخن کا وو ہوا ہے مو بہ مو خواہاں

جو کُئی پایا ہے لذت تجھ بھواں کے شعر حالی میں

236

چھپا ہوں میں صد اے بانسلی میں

کہ تا جاؤں پری رو کی گلی میں

نہ تھی طاقت مجھے آنے کی لیکن

بزور آہ پہنچا تجھ گلی میں

عیاں ہے رنگ کی شوخی سوں اے شوخ

بدن تیرا قباے صندلی میں

جو ہے تیرے دہن میں رنگ و خوبی

کہاں یہ رنگ، یہ خوبی کلی میں

کیا جیوں لفظ میں معنی، سری جن

مقام اپنا دل و جان ولیؔ میں

237

دل نے تسخیر کیا شوخ کوں حیرانی میں

آرسی شہرۂ عالم ہے پری خوانی میں

خط کے آنے نے خبردار کیا گل رو کوں

نشۂ ہوش ہے اِس بادۂ ریحانی میں

جوہر آئینہ تجھ خط کی سُنا جب سوں خبر

موجِ گوہر کی نمن غرق ہوا پانی میں

خط کا آخر کوں ہوا رخ پہ پری رو کے گزر

مور کوں راہ ملی ملک سلیمانی میں

دل بے تاب کہ اک آن نہیں اس کوں قرار

زلف دلدار سوں ہمسر ہے پریشانی میں

گل رخاں بات اَپس دل کی مجھے کہتے ہیں

بسکہ ہوں شہرۂ آفاق سخن دانی میں

جُر ولی بات اپس دل کی کسی پاس نہ کہہ

راہ ہر دل کو نہیں مطلب پنہانی میں

238

سحر پرداز ہیں پیا کے نین

ہوش دشمن ہیں خوش ادا کے نین

اے دل اس کے آگے سنبھل کے جا

تیغ بر کف ہیں میرزا کے نین

دل ہوا آج مجھ سوں بے گانہ

دیکھ اس رمز آشنا کے نین

جگ میں اپنا نظیر رکھتے نہیں

دلبری میں وو دل ربا کے نین

نرگسستاں کوں دیکھنے مت جا

دیکھ اس نرگسی قبا کے نین

وو ہے گل زار آبرو کا گل

حق نے جس کو دیئے حیا کے نین

اے ولی کس اَگے کروں فریاد

ظلم کرتے ہیں بے وفا کے نین

239

فرش گر عاشق کریں تجھ راہ میں اپنے نَین

تو نزاکت سوں رکھے نا اُس اُپر اپنے چرن

تجھ لباں کے لعل کی خوبی کا کیا بولوں بیاں

چشم عاشق جس سوں ہیں کان بدخشاں و یمن

خط کے تئیں رحل زمرد مکھ کوں تیرے اہل فضل

مصحف گل بول کر کرسی پہ بٹھلایا سخن

شمع لے انگشت حیرت منھ میں سرتا پا جلی

جب اَپس کے مکھ سوں تو روشن کیا ہے انجمن

پھول کی پکھری پہ جیوں مارا ہے چنگل رنگ نے

دل نے تیوں پکڑا ہے تیرا دامن اے گل پیرہن

منھ پہ شیریں، دل میں سنگیں، حال معشوقاں کا دیکھ

کیوں نہ مارے غم سوں تیشہ سر پر اپنے کوہ کن

اے ولیؔ اس کی گلی دل یاد کرتا ہے مُدام

کیوں کرے نئیں یاد، ہے ایمان الحب الوطن

240

باندھا ہے جب سوں شوخ بے خنجر کمر منیں

سب گل رخاں کے جیو پڑے ہیں خطر منیں

جو آب و رنگ تیرے سخن میں ہے اے سجن

ہرگز وو آب و رنگ نہیں ہے گہر منیں

ہر وقت طبع راغب شربت ہے اے صنم

شاید ترے لباں کا اثر ہے شکر منیں

جمعیت آسماں سوں، توقع بجا نہیں

ہیں آفتاب و ماہ ہمیشہ سفر منیں

قوسِ قزح کا مصرع ثانی ہو اے ولیؔ

تعریف اُس بھواں کی لکھوں جس سطر منیں

241

خوش قداں دل کوں بند کرتے ہیں

ق

نام اپنا بلند کرتے ہیں

اپنے شیریں سخن کوں دے کے رواج

سرد بازار قند کرتے ہیں

جس کوں بے تاب دیکھتے ہیں اُسے

اپنے اوپر سپند کرتے ہیں

بند کرنے کوں عاشقاں کے سدا

زلف اپنی کمند کرتے ہیں

اے ولیؔ جو کہ ہیں بلند خیال

شعر میرا پسند کرتے ہیں

242

خوب رو خوب کام کرتے ہیں

یک نگہ میں غلام کرتے ہیں

دیکھ خوباں کوں وقت ملنے کے

کس ادا سوں سلام کرتے ہیں

کیا وفادار ہیں کہ ملنے میں

دل سوں سب رام رام کرتے ہیں

کم نگاہی سوں دیکھتے ہیں ولے

کام اپنا تمام کرتے ہیں

کھولتے ہیں جب اپنی زلفاں کوں

صبح عاشق کوں شام کرتے ہیں

صاحب لفظ اس کوں کہہ سکیے

جس سوں خوباں کلام کرتے ہیں

دل لجاتے ہیں اے ولیؔ میرا

سرو قد جب خرام کرتے ہیں

243

گل مقصد کے ہار ڈالے ہیں

نقد ہستی جو ہار ڈالے ہیں

کیوں نہ ہو راہ عشق نشتر زار

تیری پلکاں نے خار ڈالے ہیں

دیکھ اُس کے نین کے خنجر کوں

چشم آہوں کوں وار ڈالے ہیں

کیوں کے نکلے برہ کے کوچے سوں

زلف تیری نے مار ڈالے ہیں

اے ولیؔ شہر حسن کے اطراف

خط سوں اس کے حصار ڈالے ہیں

244

جو کہ تجھ پر نگاہ کر تا نئیں

وو اپس کی خودی بسر تا نئیں

کیوں کے ہو میری حُسن سوں تیرے

دھوپ کھانے سوں پیٹ بھرتا نئیں

پی کے لب سوں پیا جو آب حیات

دور آخر تلک وو مرتا نئیں

غیر تیرے خیال کے اے شوخ

دل میں میرے دوجا اُترتا نئیں

اے ولیؔ اس کے نقش عالی کوں

غیر مانی دوجا چتر تا نئیں

245

جو پی کے نام پاک پہ جی سوں فدا نئیں

راضی کسی طرح ستی اس پر خدا نئیں

اے نور جان و دیدہ ترے انتظار میں

مدت ہوئی پلک سوں پلک آشنا نئیں

عشاق مستحق ترحم ہیں اے عزیز

اُن کے غریب حال پہ سختی روا نئیں

ترشی اپس جبیں سوں نکال اے شکر بچن

عشاق پر غضب ہے یہ ناز و ادا نئیں

اے نور بہار حسن و گل باغ جان و دل

افسوس ہے کہ تجھ منیں رنگ وفا نئیں

ترک لباس بس کہ کیا ہوں جہاں منیں

تیری گلی کی خاک درا مجھ قبا نئیں

ڈالے اُکھاڑ کوہ کوں جیوں کاہ اے ولیؔ

عاشق کی آہ سرد کہ جس میں صدا نئیں

246

مجھے گلشن طرف جانا روا نئیں

اگر گلشن میں وو رنگیں ادا نئیں

بغیر از نقد جانِ پاک بازاں

متاع حسن کا دوجا بہا نئیں

کیا ہے عاشقاں کے خوں سوں رنگیں

کفِ خوں ریز پر رنگِ حنا نئیں

سنا ہوں تجھ نگاہ باحیا سوں

کہ ہرگز چشم نرگس میں حیا نئیں

تری زلفاں کے سنبل کا محرک

ہواے عشق بازاں ہے صبا نئیں

ترا قد دیکھ کر کہتی ہے قمری

کہ ہرگز سرو میں ایسی ادا نئیں

ترا مکھ دیکھنا ہے واجب العین

اداے فرض میں خوف و ریا نئیں

عجب ہے اے دُرِ دریاے خوبی

کہ دل تیرا مروت آشنا نئیں

ولیؔ گل رو کی دانش پر نظر کر

بہارِ حسن کوں چنداں بقا نئیں

247

مرا غم دفع کرنے کا وو عالی جاہ قاصد نئیں

تو آوے کیوں مرے نزدیک کچھ گمراہ قاصد نئیں

ہوا ہے مجھ کوں یو معلوم اس بے دست گاہی میں

کہ مجھ احوال پہنچانے کوں غیر از آہ قاصدنئیں

دوجے کو مطلع کرنا نہیں غیرت روا رکھتی

ہمن سے بے سروماں نزک اس راہ قاصد نئیں

جو میرے جان و دل کا حال ہے تجھ ہجر میں ساجن

تجھے وو حال پہنچانے کروں کیا آہ قاصد نئیں

بجز وجدانِ دلبر کُئی نہ پاوے حال عاشق کا

تو میرے راز کے نامے ستی آگاہ قاصد نئیں

نہ پاوے شاہد معنی اپس کوں جو کیا خالی

خبر یوسف کی پہنچانے کوں غیر از چاہ قاصد نئیں

ولیؔ کیوں کر لکھوں اس بے خبر کوں درد دل اپنا

لِجانے درد کے نامے کوں کُئی دل خواہ قاصد نئیں

248

سجن کے باج عالم میں دگر نئیں

ہمن میں ہے ولے ہم کو خبر نئیں

عجب ہمّت ہے اس کی جس کوں جگ میں

بغیر از یار دوجے پر نظر نئیں

نہ پاوے صندلِ راز الٰہی

جسے گرمی سوں دل کی درد سر نئیں

ہوا نئیں جب تلک خالی اپس سوں

گرفتاراں میں ہرگز معتبر نئیں

نہ دیویں راہ تجکو ملک دل میں

وفا کا جب تلک تجھ میں اثر نئیں

اپس کے مدعا کے آشیاں کوں

نہ پہنچے جب تلک ہمت کے پر نئیں

نہ پوچھو درد کی بے درد سوں بات

کہے کیا بے خبر جس کوں خبر نئیں

ہوا ہوں جیوں کماں خم زور غم سوں

سِنے میں تیر ہے آہ جگر نئیں

ولیؔ اس کی حقیقت کیوں کے بوجھوں

کہ جس کا بوجھنا حدِّ بشر نئیں

249

دیکھا ہے جن نے باغ میں اس سرو قد کے تئیں

طوبیٰ کی خوش قدی پہ سٹا دست رو کے تئیں

دل جا پڑا ہے جاہ زنخداں میں یک بیک

اے زلف یار پہنچ تو میری مدد کے تئیں

اے سرو تیرے قد سوں ہے نت عید عاشقاں

قرباں کیا ہوں تجھ پہ میں عمرِ ابد کے تئیں

ہیں دنگ آسماں پہ ملک جب کیا شکار

آہو نے تجھ نین کے فلک کے اسد کے تئیں

یاجوج ہو رقیب جب آیا سجن کے پاس

پیدا کیا حجاب سکندر کی سد کے تئیں

درکار نئیں ہے صافیِ دل کوں لباس زر

جیوں آرسی پسند کیا ہوں نمد کے تئیں

پی کے مشابہت کا دِسا نئیں مجھے ولیؔ

دیکھا ہوں آفتاب نمط چار حد کے تئیں

250

اے سامری تو دیکھ مری ساحری کے تئیں

شیشے میں دل کے بند کیا ہوں پری کے تئیں

اس زلف کے طلسم کوں دیکھا ہوں جب ستی

پایا ہوں تب سوں رشتۂ جادوگری کے تئیں

اُس گُن بھری چنچل نے لیا مکھ پہ جب اَنچل

قرباں کیا اپس پہ شہ خاوری کے تئیں

خورشید لے کے مکھ پر شفق شرم سوں چھپا

نکلا ہے جب وو پہن لباس زری کے تئیں

پیدا ہوا ہے جگ میں ولیؔ صاحب سخن

میری طرف سوں جا کے کہو انوریؔ کے تئیں

251

تجھ حسن نے دیا ہے بہار آرسی کے تئیں

بخشا ہے خال و خط نے نگار آرسی کے تئیں

روشن ہے بات یہ کہ اَول سادہ لوح تھی

بخشے ہیں اس کے منھ سوں سنگھار آرسی کے تئیں

خوبی منیں اَوَل سوں ہوئی ہے دو چند تر

جب سوں کیا صنم نے دو چار آرسی کے تئیں

حیرت کی انجمن میں وو حیرت فزا نے جا

ایک دید میں کیا ہے شکار آرسی کے تئیں

کس خط کے پیچ و تاب کوں دل میں رکھے کہ آج

جیوں آبجو نہیں ہے قرار آرسی کے تئیں

حیرت سوں آنکھ اپس کی نہ موندے حشر تلک

یک پل ہو اس نزک جو گزار آرسی کے تئیں

گر اس کے دیکھنے کی ولیؔ آرزو ہے تجھ

بیگی اپس کے دل کی سنوار آرسی کے تئیں

ردیف ’و‘

252

ہر رات اپس کے لطف و کرم سوں ملا کرو

ہر دن کوں عید بوجھ گلے سوں لگا کرو

وعدہ کیے تھے رات کہ آؤں گا صبح میں

اے مہربان وعدے کوں اپنے وفا کرو

حق تجھ سوں ہم کلام رکھے مجکوں رات دن

اس بات سوں مدام رقیباں جلا کرو

کب لگ رکھو گے طرز تغافل کوں دل منیں

ٹک کان دھر کے حال کسی کا سنا کرو

جب لگ ہے آسمان و زمیں جگ میں برقرار

جیوں پھول اس جہاں کے چمن میں ہنسا کرو

آیا ہوں احتیاج لے تم پاس اے صنم

اپنے لباں کے خضر سوں حاجت روا کرو

یک بات ہے ولیؔ کی سنو کان دھر سجن

میری انکھاں کے باغ میں دائم رہا کرو

253

چاہو کہ ہوش سرسوں اپس کے بدر کرو

یک بار اُس پری کی گلی میں گزر کرو

ہے قصّۂ دراز کے سننے کی آرزو

اُس زُلف تابدار کی تعریف سر کرو

بوجھو ہلال چرخ کوں ابروے پیر زال

اس کی بھواں کے خم پہ اگر ٹک نظر کرو

اس گل کے گر وصال کی ہے دل میں آرزو

شبنم نمن تمام انکھیاں اپنی تر کرو

اے دوستاں بہ تنگ ہوا ہوں میں ہوش سوں

پیتم کا نانوں لے کے مجھے بے خبر کرو

پہنچا ہے جس کے ہجر کی سختی سوں حال نزع

اُس بے خبر کوں حال سوں میرے خبر کرو

ہر شعر سوں ولیؔ کے عزیزاں بیاض میں

مسطر کے خط کوں رشتۂ سلک گہر کرو

254

وحشیِ ملک عدم کوں تمھیں تسخیر کرو

خون عنقا کے اگر رنگ سوں تصویر کرو

دل دیوانۂ عاشق کوں دوجے قید نہیں

زلف کی موج سوں اس پگ منیں زنجیر کرو

گرد خجلت کوں ندامت کے انجھو ساتھ ملاؤ

موردِ رحمت حق اس ستی تعمیر کرو

صفحۂ نین پہ پتلی کی سیاہی لے کر

نقطۂ خال کی تعریف کوں تحریر کرو

عشق کہتا ہے ولیؔ آ کے بآواز بلند

اے جواناں تمھیں سب درد کوں مل پیر کرو

255

چاہو کہ پی کے پگ تلے اپنا وطن کرو

اوّل اپس کوں عجز میں نقشِ چرن کرو

ہے گل رخاں کو ذوقِ تماشاے عاشقاں

داغاں ستی دلاں کوں اپس کے چمن کرو

ثابت ہو عاشقی میں جلا جو پتنگ وار

تارِ نگاہ شمع سوں اس کا کفن کرو

گر آرزو ہے دل میں ہم آغوشیِ صنم

انجھواں سوں اپنے سیج پہ فرش سمن کرو

چاہو کہ ہو ولیؔ کی نمن جگ میں دُور بیں

انکھیاں میں سرمہ پیو کی خاک چرن کرو

256

عالم کوں تیغ ناز سوں بے جاں نکو کرو

غمزے سوں اپنے غارت ایماں نکو کرو

جمعیت آرزو ہے فلاطوں کوں خم منیں

زلفاں دکھا کے اس کوں پریشاں نکو کرو

آئینۂ جمال منور کوں کر عیاں

خوبانِ خود پرست کوں حیراں نکو کرو

زاہد چلا ہے صورت محراب دیکھ کر

ابرو دکھا کے اس کوں پریشاں نکو کرو

ہے روز حشر، روز مکافات ہر عمل

ہر اک کوں قتل خنجر مژگاں نکو کرو

درکار ہے نثار کوں گوہر اے عاشقاں

انجھواں کو صرف گوشۂ داماں نکو کرو

مدّت سوں تجھ نگاہ کا مشتاق ہے ولیؔ

کن نے کہا غریب پر احسان نکو کرو

257

مت تمن انتظار ماہ کرو

ماہ رو کوں چراغ راہ کرو

سفر عشق کا اگر ہے خیال

ہمّت دل کوں زاد راہ کرو

مکھ دکھا وے گا یوسفِ معنی

دل سوں گر دیکھنے کی چاہ کرو

عاشقاں! عاشقی کے دعوے پر

آہ و زاری کوں دو گواہ کرو

گل و بلبل کا گرم ہے بازار

اس چمن میں جدھر نگاہ کرو

سرخ روئی ہے عاشقاں کی مدام

گر رقیباں کا رو سیاہ کرو

حال دل پر ولیؔ کے اے جاناں

نظرِ لطف گاہ گاہ کرو

258

صحبت غیر موں جایا نہ کرو

دردمنداں کوں کڑھایا نہ کرو

حق پرستی کا اگر دعویٰ ہے

بے گناہاں کوں ستایا نہ کرو

اپنی خوبی کے اگر طالب ہو

اپنے طالب کوں جلایا نہ کرو

ہے اگر خاطر عشاق عزیز

غیر کوں درس دکھایا نہ کرو

مجکوں ترشی کا ہے پرہیز صنم

چینِ ابرو کوں دکھایا نہ کرو

دل کوں ہوتی ہے سجن، بے تابی

زلف کوں ہاتھ لگایا نہ کرو

نگہِ تلخ سوں اپنی ظالم

زہر کا جام پلایا نہ کرو

ہم کوں برداشت نہیں غصّے کی

بے سبب غصّے میں آیا نہ کرو

پاک بازاں میں ہے مشہور ولیؔ

اس سوں چہرے کوں چھپایا نہ کرو

259

شوخی و ناز سوں عشاق کوں حیراں نہ کرو

گردش چشم کوں غارت گرِ ایماں نہ کرو

فکر جمعیت اپس دل میں کیے ہیں زہاد

زلف کوں کھول غریباں کوں پریشاں نہ کرو

عشق کا داغ ہے محتاج نمک کا دائم

لب دلدار بِنا اس کا نمک داں نہ کرو

تب تلک بوئے محبت کی نہ پاؤ ہرگز

جب تلک گل کی نمن چاک گریباں نہ کرو

لب تمھارے ہیں شفا بخش ولیؔ ہے بیمار

حیف صد حیف کہ اس وقت میں درماں نہ کرو

260

غفلت میں وقت اپنا نہ کھو ہشیار ہو ہشیار ہو

کب لگ رہے گا خواب میں بیدار ہو بیدار ہو

گر دیکھنا ہے مدعا اس شاہد معنی کار‘و

ظاہر پرستاں سوں سدا بیزار ہو بیزار ہو

جیوں چتر داغ عشق کوں رکھ سر پر اپنے اولاً

تب فوج اہل درد کا سردار ہو سردار ہو

وو نور چشم عاشقاں ہے جیوں سحر جگ میں عیاں

اے دیدہ وقتِ خواب نئیں بیدار ہو بیدار ہو

مطلع کا مصرع اے ولیؔ دردِ زباں کر رات دن

غفلت میں وقت اپنا نہ کھو ہشیار ہو ہشیار ہو

261

اے دل سدا اُس شمع پر پروانہ ہو پروانہ ہو

اس نو بہار حسن کا دیوانہ ہو دیوانہ ہو

اے یار گر منظور ہے تجھ آشنائی عشق کی

ہر آشنائے عقل سوں بے گانہ ہو بے گانہ ہو

میری طرف ساغر بکف آتا ہے وہ مستِ حیا

اے دل تکلف برطرف مستانہ ہو مستانہ ہو

اُس آشنائے گوش سوں ہونا ہے مجکو آشنا

دریاے دل میں اے سخن دُردانہ ہو دُردانہ ہو

میرے سخن کوں مہر سوں سنتا ہے وو رنگیں ادا

اے سرگزشت حال دل افسانہ ہو افسانہ ہو

چاہے کہ شاہ حُسن کوں لادے اپس کے حکم میں

ٹک عشق کے میدان میں مردانہ ہو مردانہ ہو

جاری رکھے گا کب تلک رسم جفا و جور کوں

اے معنیِ ہر جان و دل جانا نہ ہو جانا نہ ہو

مجکوں خمار ہجر سوں پیدا ہوا ہے دردِ سر

اے گردش چشم پری، پیمانہ ہو پیمانہ ہو

اس وقت پیتم کی نگہ کرتی ہے مشقِ دلبری

یہ آن غفلت کی نئیں فرزانہ ہو فرزانہ ہو

اے عقل کب لگ وہم سوں یک جا کرے گی خار و خس

آتا ہے سیلِ عاشقی ویرانہ ہو ویرانہ ہو

عالم میں تجکوں اے ولیؔ ہے فکرِ جمعیت اگر

ہر دم خیال یار سوں ہم خانہ ہو ہم خانہ ہو

262

نہ دیو آزار میرے دل کوں اے آرام جاں سمجھو

یہ خوبی کچھ سدا رہتی نئیں اے مہرباں سمجھو

کیا ہے پیچ و تاب عشق نے بے تاب مجھ دل کوں

ہوا ہوں موے سوں باریک اے نازک میاں سمجھو

تمھارے نین نے زخمی کیا تیر تغافل سوں

کرو گے کب تلک یہ ظلم اے ابرو کماں سمجھو

تمھاری خیر خواہی کا بیاں ہے مجھ زباں اوپر

یقیں ہے مہرباں ہو مجھ پہ گر میرا بیاں سمجھو

سخن کے آشنا سوں لطف رکھتا ہے سخن کہنا

ولیؔ سوں بات کرتا ہے بجا اے دوستاں سمجھو

ردیف ’ہ‘

263

سجن ٹک ناز سوں مجھ پاس آ آہستہ آہستہ

چھپی باتیں اپس دل کی سنا آہستہ آہستہ

غرض گویاں کی باتاں کوں نہ لا خاطر منیں ہرگز

سجن اس بات کوں خاطر میں لا آہستہ آہستہ

ہر اک بات سننے پر توجہ مت کر اے ظالم

رقیباں اس سیں ہوئیں گے جدا آہستہ آہستہ

مبادا محتسب بدمست سن کر تان میں آوے

طنبورہ آہ کا اے دل بجا آہستہ آہستہ

ولیؔ ہرگز اپس کے دل کوں سینے میں نہ رکھ غمگیں

کہ بر لاوے گا مطلب کوں خدا آہستہ آہستہ

264

کیا مجھ عشق نے ظالم کوں آب آہستہ آہستہ

کہ آتش گل کوں کرتی ہے گلاب آہستہ آہستہ

وفاداری نے دلبر کی بجھایا آتش غم کوں

کہ گرمی دفع کرتا ہے گلاب آہستہ آہستہ

عجب کچھ لطف رکھتا ہے شب خلوت میں گل رو سوں

خطاب آہستہ آہستہ جواب آہستہ آہستہ

مرے دل کوں کیا بے خود تری انکھیاں نے آخر کوں

کہ جیوں بے ہوش کرتی ہے شراب آہستہ آہستہ

ہوا تجھ عشق سوں اے آتشیں رو دل مرا پانی

کہ جیوں گلتا ہے آتش سوں گلاب آہستہ آہستہ

ادا و ناز سوں آتا ہے وو روشن جبیں گھر سوں

کہ جیوں مشرق سوں نکلے آفتاب آہستہ آہستہ

ولیؔ مجھ دل میں آتا ہے خیال یار بے پروا

کہ جیوں انکھیاں منیں آتا ہے خواب آہستہ آہستہ

265

ہوا ظاہر خط روئے نگار آہستہ آہستہ

کہ جیوں گلشن میں آتی ہے بہار آہستہ آہستہ

کیا ہوں رفتہ رفتہ رام اس کی چشم وحشی کوں

کہ جیوں آہو کوں کرتے ہیں شکار آہستہ آہستہ

جو اپنے تن کوں مثل جوئبار اول کیا پانی

ہوا اس سرو قد سوں ہم کنار آہستہ آہستہ

برنگ قطرۂ سیماب میرے دل کی جنبش سوں

ہوا ہے دل صنم کا بے قرار آہستہ آہستہ

اسے کہنا بجا ہے عشق کے گل زار کا بلبل

جو گل رویاں میں پایا اعتبار آہستہ آہستہ

مرا دل اشک ہو پہنچا ہے کوچے میں سریجن کے

گیا کعبے میں یہ کشتی سوار آہستہ آہستہ

ولیؔ مت حاسداں کی بات سوں دل کوں مکدر کر

کہ آخر دل سوں جاوے گا غبار آہستہ آہستہ

266

ہوئے ہیں رام پیتم کے نَین آہستہ آہستہ

کہ جیوں پھاندے میں آتے ہیں ہرن آہستہ آہستہ

مرا دل مثل پروانے کے تھا مشتاق جلنے کا

لگی اس شمع سوں آخر لگن آہستہ آہستہ

گریباں صبر کا مت چاک کر اے خاطر مسکیں

سنے گا بات وو شیریں بچن آہستہ آہستہ

گل و بلبل کا گلشن میں خلل ہووے تو برجا ہے

چمن میں جب چلے وو گل بدن آہستہ آہستہ

ولیؔ سینے میں میرے پنجۂ عشق ستم گر نے

کیا ہے چاک دل کا پیرہن آہستہ آہستہ

267

ترے غم میں مرے نیناں سوں گر جاری ہوں جیحوں اُٹھ

کریں تعظیم اس سیلِ انجھو کی کوہ و ہاموں اُٹھ

ترے قامت کی بالائی میں گر مصرع کروں موزوں

سرو قد سوں کرے تعظیم میری سر و موزوں اُٹھ

شکست فوج دل آساں ہے گر نیناں ترے ظالم

نگہ کی تیغ قاتل لے کریں شب کو سو شبخوں اُٹھ

اگر تجھ حسن کی شہرت سُنے اے غیرت لیلیٰ

عجب نئیں قبر میں سیں گر چلے رسوا ہو مجنوں اُٹھ

تری بیمار چشماں کی حقیقت کس پہ ظاہر نئیں

گیا ہے سُدھ بسر عالم کی عرصے سوں فلاطوں اُٹھ

ولیؔ تیری نگاہ مست کی تعریف گر بولے

تو استقبال کوں آویں ہزاراں چشم میگوں اُٹھ

268

آج دستا ہے حال کچھ کا کچھ

کیوں نہ گزرے خیال کچھ کا کچھ

دل بے دل کوں آج کرتی ہے

شوخ چنچل کی چال کچھ کا کچھ

مجکوں لگتا ہے اے پری پیکر

آج تیرا جمال کچھ کا کچھ

اثر بادۂ جوانی ہے

کر گیا ہوں سوال کچھ کا کچھ

اے ولیؔ دل کوں آج کرتی ہے

بوے باغ وصال کچھ کا کچھ

269

تجھ مکھ پہ جو اس خط کا اندازہ ہوا تازہ

اب حسن کے دیواں کا شیرازہ ہوا تازہ

پھولاں نے اپس کا رنگ ایثار کیا تجھ پر

تجھ مکھ پہ جب اے موہن یو غازہ ہوا تازہ

اس حسن کے عالم میں تو شہرۂ عالم ہے

ہر مکھ سوں ترا جگ میں آوازہ ہوا تازہ

سینے سوں لگانے کی ہوئی دل کو امنگ تازی

آلس ستی جب تجھ میں خمیازہ ہوا تازہ

جو شعر لباسی تھے جیوں پھول ہوئے باسی

جب شعر ولیؔ تیرا یو تازہ ہوا تازہ

270

گریاں ہے ابر چشم مری اشک بار دیکھ

ہے برق بے قرار مجھے بے قرار دیکھ

فردوس دیکھنے کی اگر آرزو ہے تجھ

اے جیو پی کے مکھ کے چمن کی بہار دیکھ

حیرت کا رنگ لے کے لکھے شکلِ بے خودی

تیرے ادا و ناز کوں مانی نگار دیکھ

وہ دل کہ تجھ دَتَن کے خیالاں سوں چاک تھا

لایا ہوں تیری نذر بجاے انار دیکھ

اے شہسوار تو جو چلا ہے رقیب پاس

سینے میں عاشقاں کے اُٹھا ہے غبار دیکھ

تیری نگاہ خاطر نازک پہ بار ہے

اے بوالہوس نہ پی کی طرف بار بار دیکھ

تجھ عشق میں ہوا ہے جگر خون و داغ دار

دل میں ولیؔ کے بیٹھ کے یو لالہ زار دیکھ

271

جی چل بچل ہوا ہے چنچل تیری چال دیکھ

دل جا پڑا خلل میں ترے مکھ کا خال دیکھ

ہر شب ہوں پیچ و تاب میں تجھ زلف کے سبب

گل کر ہوا ہوں بال نمط تیرے بال دیکھ

خوباں جو تجھ پہ رشک لجاویں توکیا عجب

جلتا ہے آفتاب یو جاہ و جلال دیکھ

اے نو بہار حسن تو گلشن میں جب چلا

گّل کر ہوئے گلاب گُلاں تیرے گال دیکھ

مت کہہ اپس کے حال کوں رمّال کے اَگے

مصحف میں اس جمال کے اَے جیو فال دیکھ

دونو جہاں کی عید کی ہے آرزو اگر

پیتم کے ابرواں میں دو شکلِ ہلال دیکھ

دل پیچ و تاب میں ہے ولیؔ کا مثال موج

تجھ زلف تابدار کا پُر پیچ حال دیکھ

272

تیرے نَین کا دیکھ کے مے خانہ آئنہ

ہے تجھ نگاہ مست کا دیوانہ آئنہ

اے شمع سر بلند ترا نور دیکھ کر

سب جوہراں کیے ہیں سو پروانہ آئنہ

صافی اپس کی لے کے سنوارا ہے شوق سوں

رکھنے کوں تجھ خیال کے کاشانہ آئنہ

جب سوں پڑا ہے عکس ترا آئنے بِھتر

تب سوں لیا ہے شکل پری خانہ آئنہ

تجھ صاف مکھ پہ دیکھ کے یو خطِّ جوہراں

زنجیر پگ میں ڈال ہے دیوانہ آئنہ

تیرے نین کی دیکھ کے پتلی کوں اے صنم

سر تا قدم ہے صورت بت خانہ آئنہ

مانند اس ولیؔ کے ہوا مست و بے خبر

تجھ نین سوں پیا ہے جو پیمانہ آئنہ

ردیف ’ی‘

273

منگا کے پی کوں لکھوں میں اپس کی بے تابی

لیا نَین کی سفیدی سوں کاغذ آبی

لکھا پلک کے قلم سوں میں اے کماں ابرو

جگر کے خون سوں تجھ تیغ کی سیہ تابی

ہوا ہے جب سوں وو نور نظر انکھاں سوں جدا

نہیں نظر میں مری تب سوں غیر بے خوابی

نگہ کے جھاڑ کا پھل تو ہے اے بہار کرم

ترے جمال کے گلشن میں نِت ہے سیرابی

ولیؔ خیال میں اس مہ کوں جو کوئی کہ رکھے

تو خواب میں نہ دسے اس کوں غیر مہتابی

274

آیا وو شوخ باندھ کے خنجر کمر ستی

عالم کوں قتل عام کیا اک نظر ستی

طاقت رہے نہ بات کی پھر انفعال سوں

تشبیہہ تجھ لباں کوں اگر دوں شکر ستی

غم نے لیا ہے تب سوں مجھے پیچ و تاب میں

باندھا ہے جب سوں جیو کوں اس مو کمر ستی

غم کے چمن کوں باد خزاں کا نہیں ہے خوف

پہنچا ہے اس کوں آب مری چشم تر ستی

یک بار جا کے دیکھ ولیؔ اس دسَن کے تئیں

لکھتا ہوں جس کے وصف کوں آب گہر ستی

275

اُس سوں رکھتا ہوں خیالِ دوستی

جس کے چہرے پر ہے خال دوستی

خشک لب وو کیوں رہے عالم منیں

جس کوں حاصل ہے زلال دوستی

شمع بزم اہل معنی کیوں نہ ہوئے

جس اُپر روشن ہے حال دوستی

اس سخن سوں آشنا ہے دردمند

دردِ دوری ہے وبال دوستی

اے سجن تجھ مکھ کے مصحف میں مجھے

دیکھنا بر جا ہے فال دوستی

فیض سوں تجھ قد کے اے رنگیں بہار

تازہ و تر ہے نہال دوستی

اے ولیؔ ہر آن کر مشق وفا

ہے وفاداری کمال دوستی

276

جو کُئی ہر رنگ میں اپنے کو شامل کر نئیں گنتے

ہمن سب عاقلاں میں اس کوں عاقل کر نئیں گنتے

مدرس مدرسے میں گر نہ بولے درس درشن کا

تو اس کوں عاشقاں اُستاد کامل کر نئیں گنتے

خیالِ خام کوں جو کئی کہ دھووے صفحۂ دل سوں

تصوف کے مطالب کوں وو مشکل کر نئیں گنتے

جو بسمل نئیں ہوا تیری نین کی تیغ سوں بسمل

شہیداں جگ کے اُس بسمل کوں بسمل کر نئیں گنتے

پرت کے پنتھ میں جو کُئی سفر کرتے ہیں رات ہور دن

وو دنیا کوں بغیر از چاہ بابل کر نئیں گنتے

نہیں جس دل میں پی کی یاد کی گرمی کی بے تابی

تو ویسے دل کوں سارے دلبراں دل کر نئیں گنتے

رہے محروم تیری زلف کے مہرے سوں وو دائم

جو کُئی تیری نَین کوں زہر قاتل کر نئیں گنتے

نہ پاوے وو دنیا میں لذت دیوانگی ہرگز

جو تجھ زلفاں کے حلقے کوں سلاسل کر نئیں گنتے

بغیر از معرفت سب بات میں گر کُئی اچھے کامل

ولیؔ سب اہل عرفاں اس کوں کامل کر نئیں گنتے

277

بزرگاں کَن جو کُئی آپس کوں ناداں کر نئیں گنتے

سخن کے آشنا اُن کوں سخن داں کر نئیں گنتے

طریقہ عشق بازاں کا عجب نادر طریقہ ہے

جو کُئی عاشق نئیں اُس کوں مسلماں کر نئیں گنتے

گریباں جو ہوا نئیں چاک بے تابی کے ہاتھوں سوں

گلے کا دام ہے اس کوں گریباں کر نئیں گنتے

عجب کچھ بوجھ رکھتے ہیں سر آمد بزم معنی کے

تواضع نئیں ہے جس میں اس کوں انساں کر نئیں گنتے

ولیؔ راہِ محبت میں وفاداری مقدّم ہیوفا نئیں جس

میں اس کوں اہل ایماں کر نئیں گنتے

278

سجن! تجھ بِن ہمن گلشن کوں گلشن کر نئیں گنتے

بجز تیرے مہ روشن کوں روشن کر نئیں گنتے

سکندر کیوں نہ جاوے بحر حیرت میں کہ مشتاقاں

تمھارے مکھ اَگے درپن کوں درپن کر نئیں گنتے

نئیں تیرے رقیباں سوں عداوت دل میں ہمنا کے

مروت دوستاں دشمن کوں دشمن کر نئیں گنتے

اگر انجھواں کے گوہر سوں مکلّل نئیں ہوا دامن

محبت مشرب اس دامن کوں دامن کر نئیں گنتے

ولیؔ دل میں ہمارے حاسداں کا خوف نئیں ہرگز

مجرد رَو کسی رہ زن کوں رہ زن کر نئیں گنتے

279

تجھ گوش میں کیا ہے جب سوں مکان موتی

اُس روز سوں ہوا ہے صافی کی کان موتی

بالی نئیں عزیزاں! عاشق کے مارنے کوں

تا گوش کھینچتا ہے زریں کمان موتی

بے جا نئیں ہے لرزاں تجھ گوش میں سریجن

منگتا ہے تجھ نگہ سوں دائم اَمان موتی

اے شوخ جب کیا ہوں تعریف تجھ دَتن کی

میرے سخن کوں سُن کر پکڑا ہے کان موتی

بالی میں نازنیں کی رہتا ہے رات ہور دن

مدّت ستی ولیؔ کا ہوکر پران موتی

280

کاں لگ بیاں کروں میں بالاں کے کھَب کی شوخی

جس کن ہے موے سوں کم دار الحرب کی شوخی

حیرت سوں گئی پری سوں پر مارنے کی طاقت

دیکھی جو یک نظر بھر تجھ ناز و چھب کی شوخی

گستاخ ہو کے مہندی تیرے قدم لگی ہے

کس رنگ سوں کہوں میں اس بے ادب کی شوخی

ہیرے کا تجھ دسن سوں روشن ہوا ہے ہردا

یاقوت سوں ادھک ہے تجھ رنگ لب کی شوخی

تجھ لب اَگے سٹی ہے پستے کوں پست کر کر

اور شرم سوں لہو میں ڈوبی عنَب کی شوخی

دل کر کے جیوں کھلونا تیرے نذر کیا ہے

منظور ہے جسے تجھ لہو و لعب کی شوخی

طفل طلب نے ہٹ سوں تجھ لب پہ دل بندھا ہے

معذور رکھ ولیؔ کے طفل طلب کی شوخی

281

ترے قد کی نزاکت سوں دسے مجھ سرو جیوں لکڑی

ترے گل برگ لب آگے خجل ہے پھول کی پکھڑی

کلاہ آبرو اس کی اُتاری باغباں بھوئیں پر

چمن میں پھول کی ڈالی تجھے جو دیکھ کر اکڑی

ستم پرور سوں دکھ کہنا کٹے پر لَون لانا ہے

نہ کہیو سر اُسے جو کُئی نہ بوجھے سر ہے یا ککڑی

غریبی سوں نہ سمجھو سادہ دل بقّال پُرفن کوں

کہ جو کھا اُن ہر عاشق کوں بھواں کی ہاتھ لے تکڑی

نہ ہو وے اے ولیؔ حل ہرگز اس کا عقدۂ مشکل

تماشے سوں کہ جن نے دل منیں اپنے گرہ پکڑی

282

مجھ دل میں بے دل کے سدا وو دلبر جاناں بسے

جیوں روح قالب کے بھتر یوں مجھ منیں پنہاں بسے

پتلی میں میرے نین کے بستا ہے دلبر عین یوں

پردے منیں ظلمات کے جیوں چشمۂ حیواں بسے

اس دل ربا دل دار کا ہے ٹھار میرے دل منیں

یوں دل بھِتر رہتا ہے وو جیوں دل منیں ایماں بسے

ہے دل مراد دریائے غم اور نقش اس لب سرخ کا

رہتا ہے میرے دل میں یوں دریا میں جیوں مرجاں بسے

یوں دل میں میرے اے ولیؔ بستا ہے وو اہل شفا

سینے منیں جیوں بید کے ہر درد کا درماں بسے

283

یہ مرا رونا کہ تیری ہے ہنسی

آپ بَس نئیں پَر بسی ہے پَر بسی

کُلِّ عالم میں کرم، میرے اُپر

جُز رسی ہے جز رسی ہے جز رسی

رات دن جگ میں رفیق بے کساں

بے کسی ہے بے کسی ہے بے کسی

مست ہونا عشق میں تیرے صنم

ناکسی ہے ناکسی ہے ناکسی

باعثِ رسوائیِ عالم ولیؔ

مفلسی ہے مفلسی ہے مفلسی

284

زبان یار ہے از بسکہ یار خاموشی

بہار خط میں ہے برجا بہار خاموشی

سیاہیِ خط شب رنگ سوں مصور ناز

لکھا نگار کے لب پر نگار خاموشی

اُٹھا ہے لشکر اہل سخن میں حیرت سوں

خبار خط سوں صنم کے غبار خاموشی

ظہور خط میں کیا ہے حیا نے بس کہ ظہور

یو دل شکار ہوا ہے شکار خاموشی

ہمیشہ لشکر آفات سوں رہے محفوظ

نصیب جس کوں ہوا ہے حصار خاموشی

غرور زر سوں بجا ہے سکوت بے معنی

کہ بے صدا ہے سدا کوہسار خاموشی

ولیؔ نگاہ کر اس خط سبز رنگ کوں آج

کہ طور نور میں ہے سبزہ زار خاموشی

285

کیوں نہ آوے نشۂ غم سوں دماغ عاشقی

بادۂ حیرت سوں ہے لب ریز ایاغ عاشقی

اشک خوں آلود ہے سامان طغراے نیاز

مُہر فرمان وفاداری ہے داغ عاشقی

آب سوں دریا کے ہرگز کام نئیں عشاق کوں

گریۂ حسرت سوں ہے سرسبز باغ عاشقی

گر طلب ہے تجکوں راز خانۂ دل ہو عیاں

آہ کی آتش سوں روشن کر چراغ عاشقی

دردمنداں باغ میں ہرگز نہ جاویں اے ولیؔ

گر نہ دیوے نالۂ بلبل سراغ عاشقی

286

مشتاق ہیں عشاق تری بانکی ادا کے

زخمی ہیں محبّاں تری شمشیر جفا کے

ہر پیچ میں چیرے کے ترے لپٹے ہیں عاشق

عالم کے دلاں بند ہیں تجھ بند قبا کے

لرزاں ہے ترے دست اَگے پنجۂ خورشید

تجھ حسن اَگے مات ملائک ہیں سما کے

تجھ زلف کے حلقے میں ہے دل بے سرو بے پا

ٹک مہر کرو حال اُپر بے سر و پاکے

تنہا نہ ولیؔ جگ منیں لکھتا ہے ترے وصف

دفتر لکھے عالم نے تری مدح و ثنا کے

287

تجھ مکھ کی آب دیکھ گئی آب آب کی

یہ تاب دیکھ عقل گئی آفتاب کی

تجھ حسن کے دریا کا سُنا جوش جب ستی

پُرنم ہیں اشتیاق سوں انکھیاں حباب کی

جگ، تجھ لباں کے دیکھ تبسم کوں سُدھ سٹا

زنجیر پائے عقل ہے موج اس شراب کی

دیکھا ہوں جب سوں خواب میں وو چشم نیم خواب

صورت خیال و خواب ہوئی مجکو خواب کی

میرے سخن میں فکر سوں کر اے ولیؔ نگاہ

ہر بیت مجھ غزل منیں ہے انتخاب کی

288

جس کوں لذت ہے سجن کے دید کی

اس کوں خوشی وقتی ہے روز عید کی

دل مرا موتی ہو تجھ بالی میں جا

کان میں کہتا ہے باتاں بھید کی

زلف نئیں تجھ مکھ پر اے دریاے حسن

موج ہے یہ چشمۂ خورشید کی

اُس کے خط و خال سوں پوچھو خبر

بوجھتا ہندو ہے باتاں بید کی

تجھ دہن کو دیکھ کر بولا ولیؔ

یہ کلی ہے گلشن اُمید کی

289

پریشاں عاشقاں کے دل فدا ہیں تجھ ستم گر کے

بلاگرداں ہیں جیو جوہر نمن تجھ تیغ و خنجر کے

دیا ہے حق نے اس دنیا میں جنت کے قصور اُن کو

بجان و دل جو کئی مشتاق ہیں تجھ حور پیکر کے

ترے اس حسن عالم گیر کوں کھینچے اپس بَر میں

مگر رکھتی ہے کیا یہ آرسی طالع سکندر کے

اگر چاہوں لکھوں تجھ لعل کے اوصاف رنگیں کوں

رگ یاقوت سے اول بناؤں تار مُسطر کے

ولیؔ تیرے سخن یاقوت سوں رنگیں ہوئے لیکن

خریداراں جہاں بھیتر کہاں ہیں آج گوہر کے

290

نرگس قلم ہوئی ہے سجن تجھ نین اَگے

شکر ڈبی ہے آب میں تیرے بچن اَگے

غنچے کوں گل کے حال میں آنا محال ہے

تیرے دہن کی بات کہوں گر چمن اَگے

ڈالا ہے تیرے چیرے نے غنچے کوں بیچ میں

ہر گل ہے سینہ چاک ترے پیرہن اَگے

ہے تجھ نیَن کے پاس مرا عجز بے اثر

زاری نہ جاوے پیش کدھی راہزن اَگے

کر حال پر ولیؔ کے پیا لطف سوں نظر

لایا ہے سر نیاز سوں تیرے چرن اَگے

291

تجھ لب کی شیرنی سوں ہوئی دل کوں بستگی

تجھ زلف کی شکن نے دیا مجھ شکستگی

تیرے نین کے دام میں بادام بند ہے

چھوڑیا ترے لباں ستی پستے نے بستگی

تجھ قد کی راستی نے کیا بند سرو کوں

آزادگی سوں آج ہوئی اس کوں رُستگی

تجھ زلف سحر ساز کے جلوے کے فیص سوں

بے طاقتی میں ہوش نے پایا ہے جستگی

مجلس سوں جو ولیؔ کی وو شیریں ادا اُٹھا

عشرت کے تار ساز نے پائی گسستگی

292

اس کوں حاصل کیوں کے ہوئے جگ میں فراغ زندگی

گردش افلاک ہے جس کوں ایاغ زندگی

اے عزیزاں سیر گلشن ہے گل داغ الم

صحبت احباب ہے معنی میں باغ زندگی

لب ہیں تیرے فی الحقیقت چشمۂ آب حیات

خضر خط نے اس سوں پایا ہے سراغ زندگی

جب سوں دیکھا نئیں نظر بھر کاکل مشکیں یار

تب سوں جیوں سنبل پریشاں ہے دماغ زندگی

آسماں میری نظر میں کُلبۂ تاریک ہے

گر نہ دیکھوں تجکوں اے چشم و چراغ زندگی

لالۂ خونیں کفن کے حال سوں ظاہر ہوا

بستگی ہے خال سوں خوباں کے داغ زندگی

کیوں نہ ہووے اے ولیؔ روشن شب قدر حیات

ہے نگاہ گرم گل رویاں چراغ زندگی

293

جسے عشق کا تیر کاری لگے

اُسے زندگی کیوں نہ بھاری لگے

نہ چھوڑے محبت دم مرگ لگ

جسے یار جانی سوں یاری لگے

نہ ہووے اُسے جگ میں ہرگز قرار

جسے عشق کی بے قراری لگے

ہر اک وقت مجھ عاشق پاک کوں

پیاری تری بات پیاری لگے

ولیؔ کوں کہے تو اگر یک بچن

رقیباں کے دل میں کٹاری لگے

294

تعریف اس پری کی جسے تم سناؤ گے

تا حشر اس کے ہوش کوں اس میں نہ پاؤگے

جس وقت سر کرو گے بیاں اس کی زلف کا

سودا زدوں پہ غم کے سیہ روز لاؤ گے

جس وقت اُس کے حسن کو دیکھو گے بے حجاب

حیراں ہوں کیونکے جامے میں اپنے سماؤ گے

طوبیٰ طرف نہ دیکھو گے ہرگز نگاہ کر

گر اس کے قد سوں جیو کو اپنے لگاؤ گے

دوگے اگر ولیؔ کوں خبر اُس کے لطف سوں

آتش نمن رقیب کا سینہ جلاؤ گے

295

ترا قد دیکھ اے سیّد معالی

سخن فہماں کی ہوئی ہے فکر عالی

ترے پانواں کی خوبی پر نظر کر

ہوئے ہیں گل رخاں جیوں نقش قالی

شفق لوہو میں ڈوبا سر سوں یک لگ

تو باندھا سر پہ جب چیرا گلالی

ہوا تیرے خیالاں سوں سرا پا

مرا دل مثل فانوس خیالی

تری انکھیاں دسیں مجھ یوں سیہ مست

پیا گویا شراب پرتگالی

گیا ہے خوف سوں اُڑ لعل کا رنگ

ترے یاقوت لب کی دیکھ لالی

خیال اس خال کا از بس ہے دلچسپ

نہیں دنیا میں یک دل اس سوں خالی

ترے لب ہور ترے ابرو کے دیکھے

پڑھوں شعر زُلالیؔ اور ہلالیؔ

تری انکھیاں میں ڈورے دیکھ کر سرخ

بنائی خلق نے ریشم کی جالی

کرے تا استراحت مجھ انکھیاں میں

کیا ہوں وو پلک تو شک نہالی

اگر پوچھے وو بے پروا مرا نانوں

کہوں مشتاق رند لا اُبالی

ہوئے معزول خوباں جگ کے جب سوں

ہوا تو حسن کے کشور کا والی

ولیؔ تب سوں ہوا ہم کار فرہاد

سنا جب سوں تری شیریں مقالی

296

کرتی ہے دل کوں بے خود اس دل ربا کی گالی

گویا ہے جام حیرت اس خوش ادا کی گالی

کس ناز و کس ادا سوں آتا ہے اے عزیزاں

ہے میرزا ادا میں اُس میرزا کی گالی

مدت کے بعد گرمی دل کی فرو ہوئی ہے

شربت ہے حق میں میرے اس بے وفا کی گالی

گل زار سوں وفا کے کیوں جا سکوں میں باہر

کرتی ہے بندوں کوں گلگوں قبا کی گالی

جیوں گل شگفتگی سوں جامے میں نئیں سماتا

جب سوں سنا ولیؔ نے رنگین ادا کی گالی

297

اقلیم دلبری کا وو دل ربا ہے والی

آتا ہے جس پہ صادق مفہوم بے مثالی

وحشی نگہ کوں ہرگز مسند نشیں نہ پاوے

محروم صید سوں ہے ہر آن شیر قالی

جُز رمزداں نہ پہنچے معنی کوں اس کے ہرگز

مدِّ نگاہ عاشق ہے مصرع خیالی

ابیات صاف و رنگیں رکھتا ہے مثنوی میں

تیرے لباں کا گویا شاگرد ہے زلالیؔ

جب لگ مری حقیقت تفصیل سوں نہ بوجھے

ہرگز نہ ہو مسخر وو رند لا اُبالی

غیرت کوں کام فرما، نا محرموں سوں مت مل

اے نوجواں نئیں ہے ہنگام خُرد سالی

آزردکی سوں اس کی مت خوف کر ولیؔ توں

ہے عین مہربانی اس مہرباں کی گالی

298

اگر گلشن طرف وو نوخط رنگیں ادا نکلے

گل و ریحاں سوں رنگ و بو شتابی پیشوا نکلے

کھلے ہر غنچۂ دل جیوں گل شاداب شادی سوں

اگر ٹک گھر سوں باہر وو بہار دل کشا نکلے

غنیم غم کیا ہے فوج بندی عشق بازاں پر

بجا ہے آج وو راجہ اگر نوبت بجا نکلے

نثار اس کے قدم اوپر کروں انجھواں کے گوہر سب

اگر کرنے کوں دل جوئی وو سروِ خوش ادا نکلے

صنم آے کروں گا نالۂ جاں سوز کوں ظاہر

مگر اس سنگ دل سوں مہربانی کی صدا نکلے

رہے مانند لعل بے بہا شاہاں کے تاج اوپر

محبت میں جو کُئی اسباب ظاہر کوں بہا نکلے

بخیلی درس کی ہرگز نہ کیجیو اے پری پیکر

ولیؔ تیری گلی میں جب کہ مانندِ گدا نکلے

299

اگر باہر اپس کے گھر سوں موہن یک قدم نکلے

تماشا دیکھنے اس کا ہر اک سینے سوں غم نکلے

ترے مکھ کے گلستاں کی اگر حوراں میں شہرت ہو

تو ہر اک مست ہوکر چھوڑ گل زار ارم نکلے

اگر اے رشک چیں جاوے تو کرنے سیر ملک چیں

تو ہر دیول سوں استقبال کوں تیرے صنم نکلے

ترے اس حسن پر مائل ہیں جگ کے عابد و زاہد

یو شہرت سن عجب نئیں بھوئیں سوں ابراہیم ادہم نکلے

اگر ملک عرب میں تو دکھاوے آنکھ کا جلوہ

تو اس کی دید کوں بے خود ہو آہوے حرم نکلے

فجر کے وقت گر دلبر چلے حماّم کی جانب

تو جیوں سورج ہر اک کے دل سوں یک چشمہ گرم نکلے

ولیؔ سودا زدہ دل کی حقیقت گر سکوں لکھنا

تو دیوانہ نہ ہو سا نکل پگ میں باہر یک رقم نکلے

300

اگر ٹک گھر سوں وو گل گوں قبا شیریں بچن نکلے

مرے سینے سوں بے تابانہ آہِ کوہ کن نکلے

ہر اک نقش قدم سوں دستۂ گُل جلوہ پیرا ہوئے

اگر سیر گلستاں کوں وو رشک صد چمن نکلے

خُتن میں ہور خطا میں بوئے آہو کی نہ پاوے کُئی

نگہ کی تیغ قاتل لے اگر وو من ہرن نکلے

بندھا ہے اے صنم جو دل ترے ماتھے کے صندل پر

عجب نئیں ہے اگر سائے سوں اس کے برہمن نکلے

چراغاں کی نہ ہووے گرمیِ بازار کیوں آخر

ولیؔ جب جانب مجلس وو زیبِ انجمن نکلے

301

چھوڑ اے شوخ طرز خود کامی

مت ہو ہر دیدہ باز کا دامی

تجھ لب و زلف کے تماشے کوں

چل کے آئے ہیں مصری و شامی

زلف تیری ہوئی ہے چرب زباں

حفظ کر کر قصیدۂ لامی

باغ میں تجھ انکھاں سوں پایا ہے

گل نرگس تخلّصِ جامیؔ

نامۂ حسن پر نگہ کر دیکھ

پی کی انکھیاں ہیں مُہر بادامی

اے نگیں لب کیا ہے حق نے تجھے

نونہالانِ حسن میں نامی

چشم رکھتا ہوں اے سجن کہ پڑھوں

تجھ نگہ سوں قصیدۂ جامی

پستہ لب تجھ انکھاں کوں کر کر یاد

پہنتا ہوں قبائے بادامی

اے ولیؔ غیر عشق حرف دگر

پختہ مغزاں کے نزد ہے خامی

302

تری انکھیاں کوں دیکھے دل ہے آہوے بیابانی

تری زلفاں سوں جی ہے بستۂ دامِ پریشانی

ہوا ہے دل ہر اک عاشق کا نالاں مثل بلبل کے

ترے مکھ نے کیا ہے جب سوں جگ بھیتر گلستانی

ہوا یاقوت رنگیں دیکھ تیرے لعل رنگیں کوں

ہوا سرسبز جو تجھ خط میں دیکھا رنگ ریحانی

سجن تیری غلامی میں کیا ہوں سلطنت حاصل

مجھے تیری گلی کی خاک ہے تخت سلیمانی

ولیؔ کوں گر ترے نزدیک کُئی دیکھے تو یوں بوجھے

لگی ہے صفحۂ ہستی اُپر تصویر حیرانی

303

چیتے کوں نہیں دی ہے یہ باریک میانی

پائی ہے کہاں غنچے نے یہ تنگ دہانی

آغوش میں آنے کی کہاں تاب ہے اس کوں

کرتی ہے نگہ جس قد نازک پہ گرانی

دریا سوں مری طبع کے جوشاں ہے ہر اک شب

تجھ زلف کی تعریف میں امواج معانی

کیا تاب مرے دل کوں، کہ آئینۂ فولاد

تجھ حسن کی ہیبت سوں ہوا صورت پانی

ہو شمۂ مجھ حال سوں واقف، کہ دیا ہے

تجھ زہدۂ آفاق کوں حق نے ہمہ دانی

دریا ستی نسبت ہے بجا طبع کوں میری

اس مرتبہ امواج سخن کی ہے روانی

معشوق کی مت گرمیِ ظاہر پہ نظر کر

پروانے کوں جیوں شمع سوں اخلاص زبانی

مت دور ہو یک آن ولیؔ پاس سوں ہرگز

اے باعث جمعیّتِ ایاّم جوانی

304

ترا لب دیکھ حیواں یاد آوے

ترا مکھ دیکھ کنعاں یاد آوے

ترے دو نین جب دیکھوں نظر بھر

مجھے تب نرگسستاں یاد آوے

تری زلفاں کی طولانی کوں دیکھے

مجھے لیل زمستاں یاد آوے

ترے خط کا زمرد رنگ دیکھے

بہار سنبلستاں یاد آوے

ترے مکھ کے چمن کے دیکھنے سوں

مجھے فردوس رضواں یاد آوے

تری زلفاں میں یو مکھ جو کہ دیکھے

اُسے شمع شبستاں یاد آوے

جو کُئی دیکھے مری انکھیاں کو روتے

اُسے ابر بہاراں یاد آوے

جو میرے حال کی گردش کوں دیکھے

اُسے گرداب گرداں یاد آوے

ولیؔ میرا جنوں جو کُئی کہ دیکھے

اُسے کوہ و بیاباں یاد آوے

305

اُس وقت مرے جیو کا مقصود بر آوے

جس وقت مرے بر منیں وو سیم برآوے

انکھیاں کی کروں مسند و پُتلیاں کروں بالش

وو نور نظر آج اگر میرے گھر آوے

اس وقت مرے بخت کی ظاہر ہو بلندی

جس وقت وو خوش قامت عالی نظر آوے

جامے منیں غنچے کی نمن رہ نہ سکوں میں

گر پی کی خبر لے کے نسیمِ سحر آوے

گر اس مہ دل جو‘ کا گزر میری طرف ہو

دل کے شجر خشک کوں پھر برگ و بر آوے

اس وقت مجھے دعویِ تسخیر بجا ہے

جس وقت مرے حکم میں وو عشوہ گر آوے

تجھ چشم سیہ مست کے دیکھے ستی زاہد

تجھ زلف کے کوچے منیں ایماں بِسر آوے

تجھ لب کی اگر یاد میں تصنیف کروں شعر

ہر شعر منیں لذت شہد و شکر آوے

جس آن ولیؔ وصف کروں پی کے دتن کا

ہر شعر مرا غیرت سِلک گہر آوے

306

سرود عیش کاویں ہم، اگر وو عشوہ ساز آوے

بجاویں طبل شادی کے اگر وو دل نواز آوے

خمار ہجر نے جس کے دیا ہے درد سر مجکوں

رکھوں نشہّ نمن انکھیاں میں گر وو مست ناز آوے

جنونِ عشق میں مجکوں نہیں زنجیر کی حاجت

اگر میری خبر لینے کوں وو زلف دراز آوے

ادب کے اہتمام آگے نہ پاوے بار واں ہرگز

ترے سائے کی پا بوسی کوں گر رنگ ایاز آوے

عجب نئیں گر گلاں دوڑیں پکڑ کر صورت قمری

ادا سوں جب چمن بھیتر وو سرو سرفراز آوے

پرستش اُس کی میرے سر پہ ہوئے سر ستی لازم

صنم میرا رقیباں کے اگر ملنے سوں باز آوے

ولیؔ اس گوہر کانِ حیا کی کیا کہوں خوبی

مرے گھر اس طرح آتا ہے جیوں سینے میں راز آوے

307

جس وقت تبسم میں وو رنگیں دہن آوے

گل زار میں غنچے کے دہن پر سخن آوے

تاحشر اُٹھے بوئے گلاب اس کے عرق سوں

جس بَر منیں یک بار وو گل پیرہن آوے

سایہ ہو مرا سبز برنگ پرِ طوطی

گر خواب میں وو نو خطِ شیریں بچن آوے

مجھ حال اُپر ہالۂ مہ رشک لجا وے

جس وقت مجھ آغوش میں وو سیم تن آوے

گر حال میں رقت کے ترے لب کوں کروں یاد

ہر اشک مرا رشک عقیق یمن آوے

کھینچیں اپس انکھیاں منیں جیوں کحل جواہر

عشاق کے گر ہاتھ وو خاکِ چرن آوے

یک گل کوں اپس حال میں اس وقت نہ پاوے

جس وقت چمن بیچ وو رشک چمن آوے

عالم میں ترے ہوش کی تعریف کیا ہوں

ایسا تو نہ کر کام کہ مجھ پر سخن آوے

گر ہند میں تجھ زلف کی، کافر کوں خبر ہو

لینے کوں سبق کفر کا ہر برہمن آوے

ہرگز سخن سخت کوں لاوے نہ زباں پر

جس ذہن میں یک بار وو نازک بدن آوے

تجھ بر کی اگر وصف کوں تحریر کروں میں

ہر لفظ کے غنچے ستی بوئے سمن آوے

تا حشر کرے سیر خیاباں کے چمن میں

گر گور پہ عاشق کے وہ امرت بچن آوے

برجا ہے اگر جگ میں ولیؔ پھر کے دُجے بار

رکھ شوق مرے شعر کا شوق حسنؔ آوے

308

کسی کی گر خطا اوپر ترے ابرو پہ چیں آوے

نہ سمجھا کر سکے تجھ کوں اگر فغفور چیں آوے

بجز تیرے دہن ہرگز نہ چاہوں دولت عنقا

اگر خورشید کے مانند فلک زیرنگیں آوے

نہ جاوے کچھ چراغاں سوں شب فرقت کی تاریکی

اُجالا تب ہو مجھ گھر میں کہ جب وو مہ جبیں آوے

کہیں مجھ دل کوں سب مل خاتم مہر سلیمانی

خیال لعل دلبر اس میں کر ہوکر نگیں آوے

ولیؔ مصرع فراقیؔ کا پڑھوں تب، جبکہ وو ظالم

کمر سوں کھینچتا خنجر، چڑھاتا آستیں آوے

309

اگر بازار میں خوبی کے وو رشک پری آوے

عجب نئیں گر فلک سیتی سُرج ہو مشتری آوے

قلم نرگس کی جب لے کر لکھوں تجھ چشم کی خوبی

ہزاراں آفریں کر تا مرے گھر عبہری آوے

کبھی خاطر منیں خطرہ نہ آوے حور جنت کا

اگر یک بار مجھ خلوت میں وو رشک پری آوے

سجن! میں خواب میں دیکھا ہوں تیرے مکھ کا آئینہ

عجب نئیں گر مرے گھر دولت اسکندری آوے

ولیؔ رکھتا ہوں سینے میں ہزاراں گوہر معنی

دکھاؤں اپنے جوہر کوں اگر کُئی جوہری آوے

310

فلاطوں ہوں زمانے کا سجن جب مجھ گلی آوے

نہ بوجھوں طفل مکتب کر اگر وہاں بوعلی آوے

سرود عشق مجھ دل میں لبالب ہے، عجب مت کر

اگر مجھ آہ کی نَے سوں صدائے بانسلی آوے

تماشا دیکھنے تیرے دہن کا اے گلستاں رو

برنگ گل نکل کر ہر چمن سوں ہر کلی آوے

کروں کیا اے سجن تجھ پر مرا افسوں نئیں چلتا

وگر نہ اک اشارت میں پری مجھ گھر چلی آوے

غرور حسن نے تجکوں کیا ہے اس قدر سرکش

کہ خاطر میں نہ لاوے تو اگر تجھ گھر ولیؔ آوے

311

یک بار گر چمن میں وو نو بہار جاوے

بلبل کے دل سوں گل کا سب اعتبار جاوے

آوے اگر کرم سوں مانند ابر رحمت

دیکھے سوں آب اس کی دل کا غبار جاوے

چنچل کی بات لاوے طوطی اگر زباں پر

البتہ آرسی کے دل سوں غبار جاوے

جاتی ہے حاسداں کے یوں دل میں بیت میری

سینے میں دشمناں کے جیوں ذوالفقار جاوے

مستی نے تجھ نَین کی بے خود کیا ولیؔ کوں

آوے جو بزم مَے میں کیوں ہوشیار جاوے

312

اگر وو رشک گل زار ارم گلشن طرف جاوے

عجب نئیں باغ میں مالی کیے پر اپنے پچھتاوے

کہاں ہے تاب مانی کوں کہاں بہزاد کوں طاقت

کہ تیری ناز کی تصویر تجکوں لکھ کے دکھلاوے

رکھے جیوں دانۂ تسبیح عنبر طبلۂ دل میں

خیال خال دلبر عاشق بے دل اگر پاوے

کہاں ہے آج یا رب جلوۂ مستانۂ ساقی

کہ دل سوں تاب، جی سوں صبر، سر سوں ہوش لے جاوے

کیا ہے جس کی زلفاں نے ہمارے دل کوں سرگرداں

نئیں کُئی اس ہٹیلے کوں وہ نازنیں ٹک کام فرماوے

ولیؔ ارباب معنی میں اسے ہے عرش کا رُتبہ

پری زاد معانی کوں جو کُئی کرسی پہ بٹھلاوے

313

تو اس زلفاں کے حلقے سوں اگر دریا پہ چل جاوے

عجب نئیں اے پری پیکر اگر گرداب بل جاوے

کہاں طاقت ہے ہر اک کوں کہ دیکھے تجھ طرف ظالم

ترے ابرو کی یہ شمشیر رستم دیکھ ٹل جاوے

لگے برسات انجھواں کی ہر اک کے دیدۂ تر سوں

جہاں مانند بجلی کے مرا چنچل چپل جاوے

تو جب نہانے کوں جاوے روز روشن جانب دریا

تری زلفاں کے ہندو کی سیاہی تار جل جاوے

ترے فدوی ترے دربار آسکتے نہیں ہرگز

رقیب رو سیہ جاوے تو اس گھر سوں خلل جاوے

چمن میں گر خبر جاوے ہمارے دل کی سوزش کی

دل بلبل کے مانند ہر گل خوش رنگ جل جاوے

کروں جب آہ و نالہ کا علم برپا ترے غم میں

مرے انجھواں کی فوجاں سوں ندی کا پل کھسل جاوے

تری انکھیاں کی ہے تعریف ہر ہر بیت میں میری

غزالاں صید ہو آویں جہاں میری غزل جاوے

ولیؔ ہے اس قدر صافی صنم کے صاف چہرے پر

کہ اس کے وصف لکھنے میں قلم کا پگ پھسل جاوے

314

دل چھوڑ کے، یار کیوں کے جاوے

زخمی ہے شکار کیوں کے جاوے

جب لگ نہ ملے نہ شراب دیدار

انکھیاں کا خمار کیوں کے جاوے

ہے حسن ترا ہمیشہ یکساں

جنت سوں بہار کیوں کے جاوے

انجھواں کی اگر مدد نہ ہووے

مجھ دل کا غبار کیوں کے جاوے

ممکن نہیں اب ولیؔ کا جانا

ہے عاشق زار کیوں کے جاوے

315

چمن میں جلوہ گر جب وو گل رنگیں ادا ہووے

خزانِ خاطر عاشق بہار مدعا ہووے

ہوا ہوں زرد و لاغر کاہ کے مانند تجھ غم میں

بجا ہے گر کشش تیری بھواں کی کہربا ہووے

برنگ گرد باد اس کوں کرے عالم میں سرگرداں

جسے عشق بلا انگیز خوباں رہنما ہووے

نہ چھوڑیں راستی روشن دلاں صبح قیامت لگ

اگر جیوں شمع ہر ہر آن تن سوں سر جدا ہووے

اَپس کے کعبۂ مقصد کوں بے سعی سفر پہنچوں

خیال اُس کا اگر کشتی میں دل کی ناخدا ہووے

چمن میں دل کے جب گزرے خیال اس سرو قامت کا

سراپا آہ سردِ سینہ سروِ خوش ادا ہووے

پڑھے گر فاتحہ ظالم لب جاں بخش سوں اپنے

شہادت گاہ عاشق چشمۂ آب بقا ہووے

نہ ہوے یک صبح نانِ گرم سورج سوں اسے سیری

تمھارے درس کی نعمت کی جس کوں اشتہا ہووے

جُدا اُس گوہرِ یکتا سوں ہونا سخت مشکل ہے

اگر یک آن ہم دریا دلاں سوں آشنا ہووے

ولیؔ مشکل نہیں ہرگز پہنچنا آب حیواں کوں

اگر خضرِ خط خوباں ہمارا رہنما ہووے

316

اگر موہن کرم سوں مجھ طرف آوے تو کیا ہووے

ادا سوں اس قد نازک کوں دکھلاوے تو کیا ہووے

مجھے اس شوخ کے ملنے کا دائم شوق ہے دل میں

اگر یک بار مجھ سوں آکے مل جاوے تو کیا ہووے

رقیباں کے نہ ملنے میں نہایت اس کی خوبی ہے

اگر دانش کوں اپنی کام فرماوے تو کیا ہووے

پیا کے قند لب اوپر کیا ہے ہٹ مرے دل نے

محبت سوں اگر ٹک اس کوں سمجھاوے تو کیا ہووے

ولیؔ کہتا ہوں اس موہن سوں ہر اک بات پردے میں

اگر میرے سخن کے مغز کوں پاوے تو کیا ہووے

317

اگر مجھ کَن، تو اے رشک چمن ہووے تو کیا ہووے

نگہ میری کا تیرا مکھ وطن ہووے تو کیا ہووے

سیہ روزاں کے ماتم کی سیاہی دفع کرنے کوں

اگر یک نس تو شمع انجمن ہووے تو کیا ہووے

تری باتاں کے سننے کا ہمیشہ شوق ہے دل میں

اگر یک دم تو مجھ سوں ہم سخن ہووے تو کیا ہووے

مُوا جو شوق میں تجھ دیکھنے کے اے ہلال ابرو

اسے انکھیاں کے پردے کا کفن ہووے تو کیا ہووے

اگر غنچہ نمن یک رات اِس ہستی کے گلشن میں

ولیؔ مجھ بر میں وو گل پیرہن ہووے تو کیا ہووے

318

گرمی سوں وو پری رو جب شعلہ تاب ہووے

برجا ہے دل جلوں کا سینہ کباب ہووے

جو تجھ سوں ہو مقابل وو شرم سوں عجب نئیں

جیوں عکس آرسی میں گر غرق آب ہووے

تصویر تجھ پری کی دیکھا ہے جن نے اُس کا

برجا ہے گر تخلص حیرت مآب ہووے

آلودہ کیوں نہ ہووے دامان پاک زاہد

جب دست نازنیں میں جام شراب ہووے

شبنم میں غرق ہووے شرمندگی سوں ہر گل

وو گل بدن چمن میں جب بے حجاب ہووے

تیرے لباں کے آگے برجا ہے اے پری رو

گر آب زندگانی موج سراب ہووے

کیوں بے خودی نہ آوے اس وقت پر ولیؔ کوں

وو سرو ناز پیکر جب نیم خواب ہووے

319

تجھ رخ سوں جب کنارے صبح نقاب ہووے

عالم تمام روشن جیوں آفتاب ہووے

آوے تو کیا عجب ہے شیشے پہ دل کے آفت

جس وقت وو ستم گر مست شراب ہووے

برجا ہے انجمن میں اس دل رُبا کی اَے دل

گر تار سوں نگہ کے تار رباب ہووے

کیوں کر رہے عزیزاں تاریکیِ شب غم

وو رشک ماہ انور جب بے حجاب ہووے

گرمی سوں دیکھتا ہوں تیری طرف اے گل رو

تا وو رقیب بد خو جَل بَل کباب ہووے

ہے ماہ نو کے دل میں یہ آرزو ہمیشہ

اے شہسوار آکر تیری رکاب ہووے

ہرہر نگہ سوں اپنی بے خود کرے ولیؔ کوں

وو چشم مست سر خوش جب نیم خواب ہووے

320

وو محبت میں تری فانی ہوئے

روز و شب جو محو حیرانی ہوئے

دیکھ تجھ ابرو کی جوہر دار تیغ

جوہراں تلوار کے پانی ہوئے

تجھ نَین کے خنجراں پر کر نظر

دیدہ بازاں چشم قربانی ہوئے

اے سجن تیری پرت کے دوست کے

دوستاں کئی دشمن جانی ہوئے

جب سوں تو کھایا ہے پان اے آفتاب

تیرے لعلِ لب بدخشانی ہوئے

تجھ دہان کالعدم کی یاد سوں

بات میں عشاق کئی فانی ہوئے

تجھ دتن کی دیکھ خوبی گوہراں

غرق دریائے پشیمانی ہوئے

تجھ کو جو دیکھے یہاں اے صبح رو

جیوں سُرج دل اُن کے نورانی ہوئے

عشق میں اُس رشک لیلیٰ کے ولیؔ

مثل مجنوں کئی بیابانی ہوئے

321

جب کیا رات کوں تجھ زلف نے بے تاب مجھے

تب پریشانی میں جیوں کال دِسے خواب مجھے

تیرے غبغب کے خیالاں میں پھنسا جب ستی دل

عشق نے بحر میں غم کے کیا گرداب مجھے

مضطرب عشق سوں ہوں مجکوں ملامت نہ کرو

تپش دل نے دیا رعشۂ سیماب مجھے

جب کیا چاہ ترے چاہ زنخداں کی یو دل

چرخ گرداں نے دیا گردش دولاب مجھے

خم ہوئی قوسِ قزح اس کا خمِ ابرو دیکھ

جس نے دیوار میں غم کے کیا محراب مجھے

چمن اُمید کا گرمی سوں گنہ کی جو سُکھا

ابر رحمت نے کیا فیض سوں سیراب مجھے

جم کے رتبے سوں ولیؔ مرتبہ اوپر ہے اگر

جام میں دل کے میسّر ہو مئے ناب مجھے

322

سرخوشی حاصل ہوئی ہے آج گوناگوں مجھے

سبزۂ خط نے دیا ہے نشۂ افیوں مجھے

کشتۂ منت، نئیں مینائے نرگس کا کبھی

ہے خیال چشم خوباں بادۂ گل گوں مجھے

لالہ و گل مجھ سوں لے جاتے ہیں رنگ و بوے درد

گل رخاں کے عشق نے جب سوں کیا خوں مجھے

ہوش کھونا عاشق بے دل کا کچھ مشکل نہیں

نام لے اُس رشک لیلیٰ کا کرو مجنوں مجھے

کیوں نہ ہووے آہ میری ہمسر سرو بلند

یاد آتا ہے عزیزاں وو قد موزوں مجھے

کثرت اسباب دل لینے کوں کچھ درکار نئیں

یک نگاہ لطف سوں کر اے صنم مفتوں مجھے

آبرو کی کس سوں راکھوں جگ منیں چشم امید

ہر گھڑی کرتے ہیں رسوا دیدۂ پُرخوں مجھے

کیا ہوا گر عقل دور اندیش کی سنتا ہوں بات

ہوش سوں کھووے گا آخر وو لب میگوں مجھے

اے ولیؔ رکھ دل میں آوے وو صنم آہنگ شوق

نغمۂ عشاق کا آوے اگر قانوں مجھے

323

کیوں نہ حاصل ہو رِم آہو مجھے

اُس کی انکھیاں نے کیا جادو مجھے

رات آنے کہہ کے پھر آیا نئیں

پیچ دیتا ہے وو مشکیں مو مجھے

اے عزیزاں کیا کروں اخلاص کی

پہنچتی نئیں گل بدن سوں بو مجھے

کیوں کے بیٹھوں گوشۂ آرام میں

کھینچتا ہے وو کماں ابرو مجھے

بلبل نالاں ہوا ہوں درد سوں

جب نظر آیا ہے وو گل رو مجھے

شوخیِ چشم پری کا دنگ ہوں

حیرت افزا ہے رم آہو مجھے

ذہن میں بستا ہے وو خورشید رو

گرمیِ غم سوں ہوئی ہے خو مجھے

بسکہ ہوں تیری جدائی سوں ضعیف

آرسی دیتی نئیں ہے رو مجھے

اے ولیؔ ہے جگ میں محراب دعا

قبلہ رو کا ہر خم ابرو مجھے

324

تجھ نگاہ مست سوں حاصل ہے مدہوشی مجھے

تجھ لبِ خاموش نے بخشی ہے خاموشی مجھے

غیر سوں خالی کیا ہوں دل کوں اپنے جیوں حباب

تجھ نگہ نے جب سوں بخشی خانہ بردوشی مجھے

جام میں روشن ہے جم کی سلطنت کا سب حساب

عیش سلطانی کا ہے فیضِ قدح نوشی مجھے

تجھ کمر کی تاب پر طاقت ربائی ختم ہے

اس نزاکت نے دیا میل ہم آغوشی مجھے

اے ولیؔ از بسکہ اس کی یاد میں ہے محو دل

غیر کے خطرے سوں نس دن ہے فراموشی مجھے

325

حافظے کا حسن دکھلایا ہے نسیانی مجھے

ہے کلید قفل دانش طرز نادانی مجھے

موجزن ہے دل میں میرے ہر رین میں پیچ و تاب

جب سوں تیری زلف نے دی ہے پریشانی مجھے

کیوں پری رویاں نہ آویں حکم میں میرے تمام

تجھ دہن کی یاد ہے مُہر سلیمانی مجھے

یک پلک دوجے پلک سوں نئیں ہوئی ہے آشنا

جب سوں تیرے حسن نے بخشی ہے حیرانی مجھے

اے ولیؔ حق رفاقت کے ادا کرتے کیا

مستحق مغفرت آلودہ دامانی مجھے

326

مدت ہوئی سجن نے کتابت نئیں لکھی

آنے کی اپنے رمز و کنایت نئیں لکھی

میں اپنے دل کی تجکوں حکایت نئیں لکھی

تیری مفارقت کی شکایت نئیں لکھی

کرتا ہوں اپنے دل کی نمن چاک چاک اسے

جو آہ کے قلم سوں کتابت نئیں لکھی

تصویر تیرے قد کی مصوّر نہ لکھ سکے

ہرگز کسی نے ناز کی صورت نئیں لکھی

مارا ہے انتظار نے مجکوں ولے ہنوز

اُس بے وفا کوں دل کی حقیقت نئیں لکھی

وو دل ہے نور حق ستی فارغ کہ جس منیں

مصحف سوں تجھ جمال کے آیت نئیں لکھی

کیوں سنگ دل تمام مسخر ہوے، اگر

طالع میں میرے کشف و کرامت نئیں لکھی

ڈرتا ہوں سادگی ستی موہن کی اے ولیؔ

اس خوف سوں رقیب کی غیبت نئیں لکھی

327

پڑا حیرت میں دل اُس حسن عالم گیر کے دیکھے

مصوّر دنگ ہے جس جلوۂ تصویر کے دیکھے

ہوا جی محو یوں اُس زلف خم در خم کے دیکھے سوں

کہ جیوں ہوتی ہے طالب کی حقیقت پیر کے دیکھے

تری زلفاں کے پیچاں سوں مرے دل کوں اندیشہ نئیں

کہ دیوانے کو جیوں پروا نئیں زنجیر کے دیکھے

مرا دل دیکھ کر غمزے کوں تیرے ہوئی ہے خوش وقتی

کہ جیوں ہوتی ہے شادی شیر کوں نخچیر کے دیکھے

کھلا یوں دل مرا تیری نگہ کے تیر کی خاطر

کماں آغوش جیوں کر کھولتی ہے تیر کے دیکھے

ترے مکھ کے صفحے پر خط لکھا قدرت کے کاتب نے

تعجب میں ہیں سب خطاّط اس تحریر کے دیکھے

ولیؔ کے دل کوں یوں ہوتی ہے راحت تجھ گلی بھیتر

کہ جیوں ہوتی ہے خاطر منشرح کشمیر کے دیکھے

328

مست تیرے جام لب کا باغ میں لالا اَہے

بے خودی کا ہاتھ میں اُس کے سدا پیالا اَہے

شوق سوں تجھ سرو قد کے سرکشی پایا ہے سرو

سب نہالاں میں سخن اس کا سدا بالا اَہے

تجھ لٹک چلنے کی کیفیت صنوبر نے سُنا

تو گلاں کی انجمن میں مست و متوالا اَہے

بے نشاں ہے جس کے دل میں نئیں محبت کی شراب

شیشۂ خالی نمن مجلس سوں نر والا اَہے

اس انکھاں ہور زلف کا از بسکہ دیکھا ہے طلسم

شعر تیرا اے ولیؔ یو سحر بنگالا اَہے

329

کمر اس دل رُبا کی دل رُبا ہے

نگہ اُس خوش ادا کی خوش ادا ہے

سجن کے حسن کوں ٹک فکر سوں دیکھ

کہ یہ آئینۂ معنی نما ہے

یہ خط ہے جوہر آئینہ راز

اسے مشک ختن کہنا بجا ہے

ہوا معلوم تجھ زلفاں سوں اے شوخ

کہ شاہ حسن پر ظلّ ہُما ہے

نہ ہووے کو کن کیوں آکے عاشق

جو وو شیریں ادا گل گوں قبا ہے

نہ پوچھو آہ و زاری کی حقیقت

عزیزاں عاشقی کا مقتضا ہے

ولیؔ کوں مت ملامت کر اے واعظ

ملامت عاشقوں پر کب روا ہے

330

نگہ کی تیغ لے وو ظالم خوں خوار آتا ہے

جگت کے خوب رویاں کا سپہ سالار آتا ہے

ہر اک دیدے کوں حکم آرسی ہے اس کے جلوے سوں

جدھاں وو حیرت افزا جانب بازار آتا ہے

سُرج کو بوجھتا ہوں صبح کے تاراں سوں بھی کمتر

نظر میں میری جب وو یار مہ رخسار آتا ہے

صنوبر کے دل اوپر کیوں نہ ہو قائم قیامت تب

ادا سوں جب چمن بھیتر وو خوش رفتار آتا ہے

مثال شمع کرتا ہے سِنے کی انجمن روشن

ولیؔ جس شب کوں مجھ دل میں خیال بار آتا ہے

331

ترے خورشید مُکھ اوپر عجب جھلکار دستا ہے

ترے رخسار پر تل نقطۂ پرکار دستا ہے

اگرچہ جام جم میں راز عالم تھا عیاں لیکن

ترے مکھ کے سجنجل میں دوجا اسرار دستا ہے

انکھیاں نرگس، زُلَف دہن غنچہ عذاراں گل

ترے مُکھ کے گلستاں میں یو سب گلزار دستا ہے

حقیقت زلف تیری کی جگت پر کچھ نہیں ظاہر

یو بے شک مجھ گناہاں کا سیہ طومار دستا ہے

نگہبانی کوں تجھ مکھ کی بندھے ہے زلف نے حلقہ

خزینے حسن کے اوپر یو بے شک مار دستا ہے

تری چنچل انکھیاں کی جگ منیں تمثیل ظاہر نئیں

مگر پُتلی نیَن کی یو کشن اوتار دستا ہے

تری انکھیاں کے پردے میں خدا کے راز ہیں مخفی

سیاہی نَین کی یو نقطۂ اسرار دستا ہے

ترے گل زار مُکھ اوپر پسینے کا یو شبنم نئیں

کہ ہر یک بوند رخ اوپر دُرِ شہوار دستا ہے

ولیؔ مشتاق درسن کا اگر نئیں تو سبب کیا یو

جو تجھ دربار پر دایم ہزاراں بار دستا ہے

332

مغز اس کا سو باس ہوتا ہے

گل بدن کے جو پاس ہوتا ہے

آشتابی، نئیں تو جاتا ہوں

کیا کروں جی اداس ہوتا ہے

کیوں کے کپڑے رنگوں میں تجھ غم میں

عاشقی میں لباس ہوتا ہے؟

تجھ جدائی میں نئیں اکیلا میں

درد و غم آس پاس ہوتا ہے

اے ولیؔ دل ربا کے ملنے کوں

جی میں میرے ہلاس ہوتا ہے

333

آج سرسبز کوہ و صحرا ہے

ہر طرف سیر ہے تماشا ہے

چہرۂ یار و قامت زیبا

گل رنگین و سرو رعنا ہے

معنیِ حسن و معنیِ خوبی

صورتِ یار سوں ہویدا ہے

دم جاں بخش نو خطاں مجکوں

چشمۂ خضر ہے مسیحا ہے

کمر نازک و دہان صنم

فکر باریک ہے معما ہے

مو بہ مو اس کوں ہے پریشانی

زلف مشکیں کا جس کوں سودا ہے

کیا حقیقت ہے تجھ تواضع کی

یو تلطف ہے یا مدارا ہے

سببِ دل ربائیِ عاشق

مہر ہے لطف ہے دلاسا ہے

جوں ولیؔ رات دن ہے محو خیال

جس کوں تجھ وصل کی تمناّہے

334

عشاق کی تسخیر کوں بالا یہ بلا ہے

یا ناز مجسّم ہے یا تصویر ادا ہے

از بسکہ دل اس رشک پری پر جو بندھا ہوں

ہر موسوں مرے رنگ جنوں جلوہ نما ہے

یا لفظ ہے رنگین ہم آغوش معانی

یا بر میں گل اندام کے گل رنگ قبا ہے

جاتا نہیں گلشن کی طرف صبح وو گل رو

بوجھا ہے کہ واں آہ مری باد صبا ہے

بیماریِ عاشق ہے تجھ انکھیاں ستی لیکن

صد شکر کہ تجھ لب منیں ہر دکھ کی دوا ہے

مجھ حال پر اے بوعلی وقت نظر کر

تجھ چشم میں بوجھا ہوں کہ قانون شفا ہے

گر حکم میں میرے ہو سعادت تو عجب نئیں

سایہ ترا مجھ سر کے اُپر ظل ہما ہے

یک دید کا وعدہ دیا توں اپنی رضا سوں

راضی ہوں میں اس پر کہ تری جس میں رضا ہے

پایا ہوں ولیؔ سلطنت ملک قناعت

اب تخت و چتر حق میں مرے ارض و سما ہے

335

نہ وہ بالا نہ وہ بالی بلا ہے

بلائے عاشقاں ناز و ادا ہے

تغافل شوخ کا عاشق کے حق میں

ستم ہے ظلم ہے جور و جفا ہے

کہا مژگاں نے اس کی سو زباں سوں

کہ عاشق پر ستم کرنا روا ہے

نہ جاوے تجھ کوں چھوڑ اے گلشن ناز

مرا دل بلبل باغ وفا ہے

زہے دولت کہ دائم سایۂ یار

ہمارے سر پہ جیوں ظل ہما ہے

مرا دل کیوں نہ جاوے اس گلی میں

گلی اس دل ربا کی دل کشا ہے

ہمیشہ عندلیب عاشقی کوں

گل مقصود تیرا نقش پا ہے

ولیؔ آتے ہیں راہ عشق میں وو

کہ جن کوں استقامت کا عصا ہے

336

دیکھا ہوں جسے وو مبتلا ہے

خوباں کی نگاہ نئیں بلا ہے

گر تجھ کوں ہے عزم سیر گلشن

دروازۂ آرسی کھلا ہے

صیقل سوں تیری بھواں کی اے شوخ

آئینۂ عشق کوں جلا ہے

تجھ باج نظر میں بلبلاں کی

گلشن نئیں دشت کربلا ہے

خوباں کا ہوا جو سرد بازار

تجھ حسن کا جب سوں غلغلا ہے

جیوں شمع ہوا جو تجھ پہ عاشق

وہ سر سوں قدم تلک جلا ہے

اے اہل ہوس نگاہ مت کر

بالائے سہی قداں بلا ہے

یک دل نئیں آرزو سوں خالی

برجا ہے محال اگر خلا ہے

تسخیر کیا ہے گوش گل کوں

بلبل کا ولیؔ عجب گلا ہے

337

صنم میرا سخن سوں آشنا ہے

مجھے فکر سخن کرنا بجا ہے

چمن منیں وصل کے ہر جلوۂ یار

گل رنگیں بہار مدّعا ہے

نہ بخشے کیوں ترا خط زندگانی

کہ موج چشمۂ آب بقا ہے

تغافل نے ترے زخمی کیا مجھ

تری یہ کم نگاہی نیمچا ہے

نئیں واں آب، غیر از آب خنجر

شہادت گاہ عاشق کر بلا ہے

غنیمت بوجھ ملنے کوں ولیؔ کے

نگاہ پاک بازاں کیمیا ہے

338

گلستانِ لطافت میں ترا قد سرو رعنا ہے

ہمیشہ نازکی کے آبجو میں جلوہ پیرا ہے

عدم ہے تجھ دہن کا جگ میں ثانی اے پری پیکر

اگر بالفرض و التقدیر ثانی ہے تو عنقا ہے

ہوا ہے دل نشیں وو سرو قامت بسکہ مجھ دل میں

صنوبر گر مرے سائے سوں پیدا ہوتو بَرجا ہے

پریشانی کے مکتب کا معلم اس کوں کہہ سکیے

تری زلف پریشاں کا صنم جس سر میں سودا ہے

ولیؔ میری تواضع سوں رقیب سنگ دل دائم

پشیماں ہے خجل ہے منفعل ہے سخت رسوا ہے

339

قد ترا رشک سرو رعنا ہے

معنیِ نازکی سراپا ہے

تجھ بھواں کی میں کیا کروں تعریف

مطلعِ شوخ و رمز و ایما ہے

ساقی و مطرب آج ہیں ہم رنگ

نشۂ بے خودی دو بالا ہے

کیوں نہ ہر ذرہ رقص میں آوے

جلوہ گر آفتاب سیما ہے

نہ رہے اس کے قد کوں دیکھ بجا

سرو ہر چند پائے برجا ہے

چمن حسن میں نگہ کر دیکھ

زلف معشوق عشق پیچا ہے

نہ کرے کیوں نثار نقد نیاز

جس کوں تجھ ناز کی تمنا ہے

کیوں نہ مجھ دل کوں زندگی بخشے

بات تیری دم مسیحا ہے

سنبل اس کی نظر میں جا نہ کرے

جس کوں تجھ گیسواں کا سودا ہے

اس کے پیچاں کا کچھ شمار نہیں

زلف ہے یا یہ موج دریا ہے

ترک کر اے رقیب فرعونی

آہ میری عصائے موسا ہے

آج تجھ غم سوں ہے ولیؔ گریاں

دیکھ جَل پور کا تماشا ہے

340

کماں ابرو پہ جیو قرباں ہوا ہے

دل اس کے تیر کا پیکاں ہوا ہے

بھواں تیغ و پلک، خنجر، نگہ، تیر

یو کس کے قتل کا ساماں ہوا ہے

مرا دل مجھ سوں کر کر بے وفائی

پسندِ خاطر خوباں ہوا ہے

پیا ہے جام دل سوں بادۂ خوں

جو بزم عشق میں مہماں ہوا ہے

عزیزاں کیا ہے پروانے کے دل میں

کہ جی دینا اُسے آساں ہوا ہے

طبیباں کا نئیں محتاج ہرگز

جسے درد بتاں درماں ہوا ہے

برنگ گل فراق گل رخاں میں

گریباں چاک تا داماں ہوا ہے

سواد خطِّ خوباں دل کشی میں

بہار گلشن ریحاں ہوا ہے

ولیؔ تصویر اس کی جن نے دیکھا

مثال آرسی حیراں ہوا ہے

341

عشق نئیں یہ ہنر بر آیا ہے

دشمن ہوش و صبر آیا ہے

دیکھ اُس کی کلاہ بارانی

چاند پر آج ابر آیا ہے

مجھ سوں وحشی ہیں خوش نین، گویا

فوج آہو میں ببر آیا ہے

یا صنم کا ہے غمزۂ بے دیں

یا ولایت سوں گبر آیا ہے

اے ولیؔ کیا سبب کہ آج صنم

بر سر جور و جبر آیا ہے

342

سُرج ہے شعلہ تری اگن کا جو جا فلک پر جھلک لیا ہے

نمک نے اپنے نمک کوں کھوکر ترے نمک سوں نمک لیا ہے

یہ درسوں تیرے جو نور چمکا سو اس سوں تارے ہوئے منور

یو چاند تجھ حسن کا جو نکلا فلک نے تجھ سوں اُچک لیا ہے

ترے درس کا یہ نور انور جدھاں سوں روشن ہوا ہے جگ میں

تدھاں سوں بجلی نے اس چمک سوں اپس چمک میں چمک لیا ہے

ترے شکر لب کی کیا ثنا کہوں کہ لعل جگ میں جو ہے معزز

ترے لباں کی یہ دیکھ سرخی سو اُس نے رنگ و دمک لیا ہے

جو کھول لٹ کوں چلا لٹک کر جھلک جھلک کر جو مکھ دکھایا

سوں لٹ کو دیکھے ولیؔ اٹک کر سجن نین میں اٹک لیا ہے

343

مکتب میں جس کے ہاتھ ادا کی کتاب ہے

خوبی میں آج ہم سبق آفتاب ہے

ظاہر ہوا ہے مجھ پہ ترے ناز سوں صنم

رنگیں بہار حسن بہار عتاب ہے

مانند مو ضعیف کیا اس کے شوق نے

جس مو کمر کا ناؤں نزاکت مآب ہے

کیفیت بہار ادا تب سوں ہے عیاں

وو مست ناز جب ستی مست شراب ہے

تیرے نَین کے دور میں بے وقر ہے شراب

مے خانہ تجھ نگاہ سوں دائم خراب ہے

دیوان میں ازل کے ملے جب سوں حسن و عشق

تب سوں نیاز و ناز میں باہم حساب ہے

پوشیدہ حال عشق رہے کیوں کے اے ولیؔ

غماز یادِ زلفِ صنم پیچ و تاب ہے

344

عشق میں جس کوں مہارت خوب ہے

مشرب مجنوں طرف منسوب ہے

عاشق بے تاب سوں طرز وفا

جیوں ادا محبوب کی محبوب ہے

عشق کے مفتی نے یوں فتویٰ دیا

دیکھنا، خوباں کا درس خوب ہے

لخت دل پر خط لکھا ہوں یار کوں

داغ دل مہر سر مکتوب ہے

غمزہ و ناز و ادائے نازنیں

ظلم ہے طوفان ہے آشوب ہے

لکھ دیا یوسف غلامی خط تجھے

گرچہ نورِ دیدۂ یعقوب ہے

ہر گھڑی پڑھتا ہے اشعار ولیؔ

جس کوں حرف عاشقی مرغوب ہے

345

جسے اقلیم تنہائی میں انداز اقامت ہے

جبین حال پر اُس کی سدا رنگ سلامت ہے

گزر اس سرو قامت کا ہوا ہے جب سوں مسجد میں

موذن کی زباں اوپر ہمیشہ لفظ قامت ہے

مجھے روز قیامت کا رہا نئیں خوف اے واعظ

خیال قامتِ رعنا مرے حق میں قیامت ہے

ہوا ہے صورت دیوار زاہد کنج عزلت میں

یہی اس حسن حیرت بخش کی ظاہر کرامت ہے

ہوا ہے جو جبیں فرسا تری محراب ابرو میں

صف عشاق میں اس کوں بحکم عشق امامت ہے

سیہ بختی ہوئی جگ میں نصیب عاشق بے دل

یہ تجھ زلف پریشاں کی پریشانی کا شامت ہے

نہ ہو ناصح کی سختی سوں مکدر اے دل شیدا

سَدا نقد محبت کا محک سنگ ملامت ہے

شرف ذاتی ہے تجھ کوں اے گل گل زار معشوقی

تجلی مکھ اُپر تیرے سیادت کی علامت ہے

ولیؔ جو عشق بازی کی حقیقت سوں نئیں واقف

سخن اس کا قیامت میں گل باغ ندامت ہے

346

جس دل رُبا سوں دل کوں مرے اتحاد ہے

دیدار اُس کا میری انکھاں کی مراد ہے

رکھتا ہے بر میں دلبر رنگیں خیال کوں

مانند آرسی کے جو صاف اعتقاد ہے

شاید کہ دام عشق میں تازہ ہوا ہے بند

وعدے پہ گل رخاں کے جسے اعتماد ہے

باقی رہے گا جور و ستم روز حشر لگ

تجھ زلف کی جفا میں نپٹ امتداد ہے

مقصود دل ہے اُس کا خیال اے ولیؔ مجھے

جیوں مجھ زباں پہ نام محمدؐ مراد ہے

347

سرو میرا مہر سوں آزاد ہے

شوخ ہے بے درد ہے صیاد ہے

ہاتھ سوں اُس غمزۂ خوں ریز کے

داد ہے بے داد ہے فریاد ہے

آب ہووے کیوں کے دل اس سرو کا

سخت ہے بے رحم ہے فولاد ہے

عشق میں شیریں بچن کے رات دن

آہ دل پر تیشۂ فرہاد ہے

غم نئیں مجنوں کوں ہرگز اے ولیؔ

خانۂ زنجیر اگر آباد ہے

348

ہے بجا عشاق کی خاطر اگر ناشاد ہے

غمزۂ خوں خوار ظالم بر سر بے داد ہے

کیوں نہ ہو فوارۂ خوں جوش زن رگ رگ ستی

ہر نگاہ تیز خوباں نشتر فصاد ہے

یک گھڑی تجھ ہجر میں اے دل رُبا تنہا نہیں

مونس دم ساز میرا آہ ہے، فریاد ہے

تل بناتے دیکھ اس کوں مجھ پہ یوں ظاہر ہوا

صید کرنے کوں ہمارے رغبت صیاد ہے

آسماں اوپر نہ بوجھو چادر ابر سفید

جا نمازِ زاہد عزلت نشیں برباد ہے

حرف شیریں اُس ستی ہوتے ہیں ہر دم جلوہ گر

اہل معنی کی زباں کیا تیشۂ فرہاد ہے

سرو کی دارستگی اوپر نظر کر اے ولیؔ

باوجود خود نمائی کس قدر آزاد ہے

349

گل رخاں میں جس کے سر پر طرۂ زرتار ہے

زیب گلزار ادا وو سرو خوش رفتار ہے

چہرۂ گل رنگ و زلف موج زن خوبی منیں

آیت جنات تجری تحتہا الانہار ہے

بسکہ بے درداں ہوئے ہیں مجتمع چاروں طرف

بستۂ زلف پری رویاں پہ مارا مار ہے

زخم دل تھا گرچہ کاری لیکن اس سوں غم نئیں

سبزۂ خطِّ دل آرا مرہمِ زنگار ہے

کیوں کے جاوے بوالہوس اس کی گلی میں ہو دلیر

ہر نگاہ تیز اس کی تیر ہے تروار ہے

کیوں نہ لیویں زاہد تجھ دیکھ طرز برہمن

رشتۂ اخلاص تیرا رشتۂ زنار ہے

مت نصیحت کر ولیؔ کوں اے سخن نا آشنا

ترک کرنا عشق کوں دشوار ہے دشوار ہے

350

عشق میں صبر و رضا درکار ہے

فکر اسباب وفا درکار ہے

چاک کرنے جامۂ صبر و قرار

دل برِ رنگیں قبا درکار ہے

ہر صنم تسخیر دل کیوں کر سکے

دل رُبائی کوں ادا درکار ہے

زلف کوں وا کر کہ شاہ عشق کوں

سایۂ بال ہما درکار ہے

رکھ قدم مجھ دیدۂ خوں بار پر

گر تجھے رنگ حنا درکار ہے

دیکھ اس کی چشم شہلا کوں اگر

نرگس باغ حیا درکار ہے

عزم اس کے وصل کا ہے اے ولیؔ

لیکن امداد خدا درکار ہے

351

بیاباں عاشقاں کوں ملک اسکندر برابر ہے

ہر اک گوہر انجھو کا تخت کے اختر برابر ہے

جنوں کے ملک کے سلطاں کوں کیا کیا حاجت ہے ، افسرکی

بگولا سر اُپر مجنوں کے سو افسر برابر ہے

جو کُئی حاصل کیا ہے دولت عالی کوں سوزش کی

پھپھولا اس دل دریا بھتر گوہر برابر ہے

فنا کر کر جو کُئی دنیا کی سمجھا زندگانی کوں

اسے گزران کرنے کوں جنگل ہور گھر برابر ہے

ولیؔ دیواں میں میرے تودۂ دفتر کی حاجت نئیں

کہ مجھ دیواں میں ہر اک شعر سو دفتر برابر ہے

352

نہ سمجھو خود بخود دل بے خبر ہے

نگہ میں اُس پری رُو کی اثر ہے

اجھوں لگ مکھ دکھایا نئیں اپس کا

سجن مجھ حال سوں کیا بے خبر ہے

مروت ترک مت کر اے پری رو

محبت میں مروت معتبر ہے

ترے قد کے تماشے کا ہوں طالب

کہ راہ راست بازی بے خطر ہے

تری تعریف کرتے ہیں ملائک

ثنا تیری کہاں حد بشر ہے

بیانِ اہل معنی ہے مطوّل

اگرچہ حسب ظاہر مختصر ہے

ولیؔ مجھ رنگ کوں دیکھے نظر بھر

اگر وو دل ربا مشتاق زر ہے

353

نہ جانوں خط میں تیرے کیا اثر ہے

کہ اُس دیکھے سوں دل زیر و زبر ہے

اُسے باریک بیں کہتے ہیں عاشق

نظر میں جس کو وو نازک کمر ہے

نہ ہووے کیوں ہجوم راست بازاں

جہاں اس سرو قامت کا گزر ہے

ہر اک سوں آشنا ہو نا ہنر نئیں

پری رخسار سوں ملنا ہنر ہے

نہ پاؤں تجھ سوں گر سیب زنخداں

نہال عشق بازی بے ثمر ہے

رہیں گے خاک ہو تیری گلی میں

وفاداری ہماری اس قدر ہے

ولیؔ مجھ دل کی آتش پر نظر کر

جہنم کی زباں پر الحذر ہے

354

مکھ ترا آفتاب محشر ہے

شور اس کا جہاں میں گھر گھر ہے

رگ جاں سوں ہوا ہے خون جاری

یاد تیری پلک کی نشتر ہے

پہنچتاہے دلوں کوں ہر جاگہ

غم ترا روزیِ مقدّر ہے

مکھ ترا بحر حسن ہے جاناں

زلف پُرپیچ موج عنبر ہے

بات میٹھی ترے لباں کی صنم

حسد انگیز شیر و شکّر ہے

قد سوں تیرے کدھیں نہ پایا پھل

حق میں میرے درخت بے بر ہے

تجھ بن اے نور بخش محفل دل

حالِ مجلس تمام ابتر ہے

آگ ہُئی ہے بقدر نیزہ بلند

شمع نئیں آفتاب محشر ہے

دود آتش کیا ہے سرمۂ چشم

داغِ دل دیدۂ سمندر ہے

صفحۂ دل پہ درد کوں لکھنے

رشتۂ آہ تار مسطر ہے

آج جیوں آرسی ہوے ہیں عزیز

خود نمائی جِنوں کا جوہر ہے

سادہ رو ہیں ہمیشہ باعزت

آب نِس دن محیط گوہر ہے

مجکوں پہنچی ہے آرسی سوں یہ بات

صاف دل وقت کا سکندر ہے

سیر دریاے معرفت کوں سنوار

کشتیِ دل اگر قلندر ہے

اے ولیؔ کیا ہے حاجت قاصد

نامہ میرا پرِ کبوتر ہے

355

قبلۂ اہل صفا شمشیر ہے

ہادیِ مشکل کشا شمشیر ہے

غازیاں اہل سعادت کیوں نہ ہو

سایۂ بال ہُما شمشیر ہے

بوالہوس اس کے اَگے کیوں آسکے

صورت دست قضا شمشیر ہے

کیوں نہ دشمن کے کرے سینے میں جا

ناخنِ شیر خدا شمشیر ہے

اولاً ریحان و آخر لالہ رنگ

ظاہرا برگِ حنا شمشیر ہے

زندۂ جاوید شہدا کیوں نہ ہوں

موجۂ آب بقا شمشیر ہے

سالک راہ فنا کوں دم بدم

آخرت کی رہنما شمشیر ہے

صاحب ہمت کوں نت ہے دست گیر

مرشد حاجت روا شمشیر ہے

راہ غربت میں کہ مشکل ہے تمام

ناتوانوں کا عصا شمشیر ہے

دشمناں کیوں کر سکیں مکرو فریب

صیقل زنگ دغا شمشیر ہے

کیوں نہ ہووے آب سر سوں تا قدم

جوہر کانِ حیا شمشیر ہے

کیوں نہ ہووے قتل عاشق دم بدم

شوخ کی بانکی ادا شمشیر ہے

جن نے پکڑا گوشۂ آزادگی

اُس کوں موج بوریا شمشیر ہے

کعبۂ فتح و ظفر میں اے ولیؔ

شکل محراب دعا شمشیر ہے

356

عاشقاں کی قید تیرا حسن عالم گیر ہے

بلبلاں کے واسطے ہر موج گل زنجیر ہے

تجھ نَین کی ہے نگاہ راست تیر بے خطا

کج ادائی تجھ بھواں کی جوہر شمشیر ہے

حسن تیرا عالم علوی سوں دیتا ہے خبر

یہ دم عیسیٰ کی تیرے دم منیں تاثیر ہے

کیا کہ حیراں تری تعریف اے آئینہ رو

مو بہ مو تیرا سرا پا ناز کی تصویر ہے

اے ولیؔ کہتی ہے بلبل اس کا سن رنگیں سخن

غنچہ لب کے لب اُپر جیوں بوے گل تقریر ہے

357

تشنہ لب کوں تشنگی مَے کی نئیں ناسور ہے

پنبۂ مینا اسے جیوں مرہم کافور ہے

یاد سوں ساقی کے نس دن ہر پلک ہے شاخ تاک

اشک حسرت اس اُپر جیوں خوشۂ انگور ہے

اُس کا دل ہرگز نہ ہو ویراں ازل سوں تا ابد

یاد سوں دلدار کی جس کا سِنہ معمور ہے

نفس سرکش پر جو کُئی پایا ہے یاں فتح و ظفر

دارِ عقبیٰ کے بھتر الحق و ہی منصور ہے

تجھ تجلی کے صحیفے کا سُرج ہے یک ورق

عکس تیری زلف کا جگ میں شبِ دیجور ہے

جو سیاہی ہور سفیدی سوں ہوا ہے آشنا

اہل بینش کی نظر میں وو سدا منظور ہے

جلد رو ہو عشق کی رہ میں کہ تا پہنچے نزیک

کاہلی کوں سٹ دے اے سالک کہ منزل دور ہے

خاکساری جس کوں سلطانی ہے اس عالم منیں

کاسۂ خالی اُسے جیوں چینیِ فغفور ہے

یار کے دیدار کا طالب ہے موسیٰ ہر زماں

اے ولیؔ دربار اُس کا اس کوں کوہ طور ہے

358

نہ بوجھو خود بخود موہن میں اَڑ ہے

رقیب رو سیہ فتنہ کی جڑ ہے

ہر اک زلفاں کے دیکھے نئیں اٹکتا

اٹکتا ہوں جہاں دل کی پکڑ ہے

کروں کیوں سنگ دل کے دل کوں تسخیر

زبردستی میں بیجاپُر کا گَڑ ہے

نئیں بل دار چیرا سر پر اس کے

عزیزاں! یو جوانی کی اکڑ ہے

برستا ہے سجن کے مکھ اُپر نور

نگاہوں کی ہر ایک جانب سوں جھڑ ہے

عجب تیزی ہے تجھ پلکاں میں اے شوخ

دو عالم اس دُودھاری سوں دو دھڑ ہے

ولیؔ تو بحر معنی کا ہے غواّص

ہر اک مصرع ترا موتیاں کی لڑ ہے

359

اُس کے نین میں غمزۂ آہو پچھاڑ ہے

اے دل سنبھال چل کہ اَگے مار دھاڑ ہے

تجھ نین کے چمن منیں کیوں آسکوں کہ یاں

خاراں کی ٹھار خنجر مژگاں کی باڑ ہے

جس کوں نئیں ہے بو‘جھ ترے حسن پاک کی

تنکا نزیک اُس کے مثال پہاڑ ہے

نرگس کے پھولنے کی کرے سیر دم بہ دم

جو تجھ نگاہ مست کا کیفی کراڑ ہے

دل میں رکھا جدھاں سوں ولیؔ پنجتن کی یاد

داڑِم نمن تدھاں سوں سِنے میں دڑاڑ ہے

360

حُسن کا مسند نشیں وو دلبر ممتاز ہے

دلبراں کا حسن جس مسند کا پا انداز ہے

غیرت حیرت ہے خبر اُس آئنہ رو کی کسے

راز کے پردے میں جس کی خامشی آواز ہے

اُس نزاکت آفریں پر ناز ہے کیا ناز کا

سر ستی پاؤں تلک سب ناز ہے سب ناز ہے

دل منیں آکر ہوا خلوت نشیں تیرا خیال

غم ترا سینے میں میرے راز کا ہمراز ہے

وو اپس کے وقت کا منصور ہے عالم منیں

صدق سوں تجھ باٹ میں جو عاشق سرباز ہے

سوکھ کر تجھ غم منیں یہ تن ہوا ہے جیوں رباب

دل مرا سینے میں میرے جیوں کہ تار ساز ہے

یاد سوں اُس رشک گلزار ارم کی اے ولیؔ

رنگ کوں میرے سدا جیوں بوئے گل پرداز ہے

361

لہریا چیرا صنم کا بسکہ خوش انداز ہے

دل ربائی میں برنگ موج گل ممتاز ہے

موسم خط میں نہ کر فکر اے گل رنگیں ادا

سبزۂ گلزار خوبی کا ابھی آغاز ہے

روبرو آنے میں اس کے حال دل ظاہر ہوا

جلوۂ آئینہ رویاں کاشف ہر راز ہے

غیر سوں الفت پکڑنا ہجر میں درکار نئیں

دم بدم آہ دل بے تاب گر دم ساز ہے

زندگی میں طائروں کوں خلاصی کیوں کے ہو

پنجۂ ظلم ستم گر چنگل شہباز ہے

دردمنداں کی نظر سوں اس کا گرنا ہے بجا

جو برنگ طفل اشک عاشقاں غماز ہے

زندہ کرنا استخواں کوں گرچہ تھا کارِ مسیح

زندہ کرنا شوق کوں تجھ ناز کا اعجاز ہے

دردمنداں کو سدا ہے قول مطرب دل نواز

گرمیِ افسردہ طبعاں شعلۂ آواز ہے

بزم کوں رونق دیا ہے جب سوں وو عالی مقام

رشتۂ آہ دل بے تاب تار ساز ہے

دیکھنا آئینہ رو کا امر مشکل نئیں ولے

سدِّ راہ سینہ صافاں طالع ناساز ہے

اے ولیؔ یہ مصرع موزوں ہے ہر دل کا عزیز

قامت رعنا صنم کا سرو باغ ناز ہے

362

مجھ حکم میں وو راست قد دل نواز ہے

جس کے ہر ایک بول میں عشرت کا ساز ہے

دم ساز زہرہ رو ہے جو خالی ہے آپ سوں

نے کی صدائے خاص سوں واضح یہ راز ہے

کہتے ہیں کھول پردہ شناسانِ مدعا

جو اوج میں ہوا کے اُڑے شاہ باز ہے

جب سوں رکھا ہوں عشق کی آتش اُپر قدم

تب سوں مثال عود مرا جیو گداز ہے

اے بوالہوس نہ دل میں رکھ آہنگ عاشقی

جاں باز عاشقاں پہ یہ دروازہ باز ہے

کرنے کوں سیر راہ حجاز و عراق عشق

عشاق پاس ساز و نوا سب نیاز ہے

تو اصل کے دائرے میں ہے جگ دُجے ہیں فرع

اوج حضیض ہیچ تو ہی یکّہ تاز ہے

تیرے خیال میں جو ہوا خشک جیوں رباب

مضراب غم کا ہاتھ اُس اوپر دراز ہے

محراب تجھ بھواں کی عجب ہے مقام خاص

ہر پنج گاہ جس میں دلوں کی نماز ہے

سن حرف راست باز کا مت مل رقیب سوں

ہرچند تیری طبع مخال نواز ہے

خاراں دلاں کے چشم کی نسبت کے فیض سوں

سرمے کوں اصفہاں کے عجب امتیاز ہے

بولی تجھے صبا نے سرِ زلف یہ سخن

نوروز عاشقاں کا ترا حسن و ناز ہے

بانگ بلند بات یہ کہتا ہوں اے ولیؔ

اس شعر پر بجا ہے اگر مجکوں ناز ہے

363

زلف موہن کی کہ عنبر بیز ہے

حسن کے دعوے کی دست آویز ہے

ہے گل رعنا بہار حسن کا

ناز تیرا، جو نیاز آمیز ہے

شوق کے مرکب کوں راہ عشق میں

اے سجن تیری نگہ مہمیز ہے

ہر پلک تیری کہ ہے تیغ فرنگ

عاشقاں کے مارنے کوں تیز ہے

ہاتھ میں میرے نہ سمجھو تم بیاض

شوخ کے ملنے کی دست آویز ہے

چاہتا ہوں دل ستی اے نازنیں

جنگ تیری وو کہ صلح آمیز ہے

تجھ سخن کے وصف لکھنے میں قلم

ابرنیساں کے نمن دُر ریز ہے

تجھ تغافل سوں ہوا ہے رونما

گریۂ عاشق کہ خوں آمیز ہے

دل مرا اے دلبر شیریں بچن

تجھ لباں کے شوق سوں لبریز ہے

اے ولیؔ لگتا ہے ہر دل کوں عزیز

شعر تیرا بسکہ شوق انگیز ہے

364

ہر نگاہ شوخ و سرکش دشنۂ خوں ریز ہے

تیغ اس ابرو کی ہر دم مارنے کوں تیز ہے

عشق کے دعوے میں اُس کی بات رکھتی ہے اساس

سنبل زلف پری سوں جس کوں دست آویز ہے

آج گل گشتِ چمن کا وقت ہے اے نوبہار

بادۂ گل رنگ سوں ہر جام گل لبریز ہے

جب سوں تیری زلف کا سایہ پڑا گلشن منیں

تب ستی صحن چمن ہر ٹھار سنبل خیز ہے

سادہ رویاں کوں کیا مشتاق اپنے حسن کا

شعر تیرا اے ولیؔ از بسکہ شوق انگیز ہے

365

تحصیل دل کے ہونے یہ مکھ کتاب بس ہے

دانائے منتخب کوں یہ انتخاب بس ہے

مجھ حال کا کرے گر آکر سوال دلبر

تو لاجواب ہونا مجکوں جواب بس ہے

تاب کمر سوں تیری بے تاب بسکہ ہوں میں

مانند زلف خوباں مجھ پیچ و تاب بس ہے

جو عشق کے نگر کا ہے صوبہ دار جگ ہے

مجنونِ لیلائے حسن اس کا خطاب بس ہے

جو کُئی ولیؔ کے مانند پیتا ہے عشق کی مَے

اس برہا کے جلے کوں دل کا کباب بس ہے

366

عاشق کوں تجھ درس کا دائم خیال بس ہے

خاموش ہو کے رہنا اتنا چہ قال بس ہے

گر خلق عید خاطر منگتی ہے ماہ نو کوں

مجھ دل کی عید ہونے ابرو ہلال بس ہے

گر کانورومیں لوگاں عالم کوں موہتے ہیں

مجھ دل کوں موہ لینے یہ خط و خال بس ہے

ہر دل رُبا کوں ہرگز دیتا نہیں ہوں دل مَیں

دل بستگی کوں میری وو بے مثال بس ہے

ہرچند اے ولیؔ ہوں میں غرقِ بحر عصیاں

مجکوں شفیعِ محشر حضرت کی آل بس ہے

367

ہم کو شفیع محشر وو دیں پناہ بس ہے

شرمندگی ہماری عذر گناہ بس ہے

خاطر سوں گئی ہے خواہش اسباب دُنیوی کی

ہمت برہ کی رہ میں مجھ زاد راہ بس ہے

جو صاف دل ہیں اُن کوں درکار نئیں ہے زینت

جیوں آرسی، نمد کی سر پر کلاہ بس ہے

اسباب جنگ رکھنا درکار نئیں ہمن کوں

دشمن کو مارنے کوں اک تیر آہ بس ہے

نئیں آرزو کہ بیٹھوں مسند پہ سلطنت کی

تیری گلی میں آنا یہ دست گاہ بس ہے

درکار نئیں ہے مسجد سجدے کوں عاشقاں کے

محراب تجھ بھواں کی اے قبلہ گاہ بس ہے

مت تیر ہور کماں کی کر فکر اے خوش ابرو

عاشق کے مارنے کوں سیدھی نگاہ بس ہے

تجھ عشق کے جلے کوں کیا کام چاندنی سوں

تجھ حسن کا تماشا اے رشک ماہ بس ہے

بے جا ہے بادشاہی ہر خوب رو کوں دینا

خوبی کے تخت اوپر اک بادشاہ بس ہے

دل لے گیا ہمارا جادو سوں وو پری رُو

دیوانگی ہماری اس پر گواہ بس ہے

درکار نئیں کہ دیکھوں ہر اک ادا کوں تیری

تجھ چال کا تماشا اے کج کلاہ بس ہے

غم نئیں اگر رقیباں آئے ہیں چڑھ ولیؔ پر

اے دوست تجھ کرم کی اس کوں پناہ بس ہے

368

آج ہر گل نور کی فانوس ہے

کوہ و صحرا صورتِ طاؤس ہے

گر نہ نکلے سیر کوں وو نوبہار

ظلم ہے، فریاد ہے، افسوس ہے

اے صنم تیرے دہن کے شوق سوں

ہر کلی میں نغمۂ ناقوس ہے

نور سوں تجھ یاد کی اے شمع رو

پردۂ دل پردۂ فانوس ہے

دیکھ کر اُس کی ادا و ناز کوں

ہر پری کوں خواہش پا بوس ہے

دل نہ دے دوجے کوں غافل بوجھ اسے

کم نگاہی شوخ کی جاسوس ہے

دیکھنے سوں سیر نئیں ہوتا ولیؔ

مدّعا اُس کا کنار و بوس ہے

369

سرو میرا جب ستی گل پوش ہے

ہر طرف سوں بلبلاں کا جوش ہے

اے سجن یک بات ہے لیکن اُسے

بوجھتا ہے وو کہ جس کوں ہوش ہے

گول پگڑی کے نہ پھر ہرگز تو گرد

گول پگڑی حسن کا سرپوش ہے

دیکھنا تجھ قد کا اے نازک بدن

باعثِ خمیازۂ آغوش ہے

اب خلاصی عشق سوں ممکن نہیں

دام دل، زلف دو دامی پوش ہے

کیوں نہ ہو امید کا روشن چراغ

شمع مجلس ساقیِ مے نوش ہے

ہر سخن تیرا الطافت سوں ولیؔ

مثل گوہر زینت ہرگوش ہے

370

دل طلب گار ناز مہوش ہے

لطف اس کا اگرچہ دل کش ہے

مجھ سوں کیوں کر ملے گا حیراں ہوں

شوخ ہے، بے وفا ہے سرکش ہے

کیا تری زلف کیا ترے ابرو

ہر طرف سوں مجھے کشاکش ہے

تجھ بن اے داغ بخش سینہ و دل

چمنِ لالہ دشت آتش ہے

اے ولیؔ تجربے سوں پایا ہوں

شعلۂ آہ شوق بے غش ہے

371

ہر طرف ہنگامۂ اجلاف ہے

مت کسو سوں مل اگر اشراف ہے

ہر سحر تجھ نعمت دیدار کی

آرسی کوں اشتہائے صاف ہے

نئیں شفق ہر شام تیرے خواب کوں

پنجۂ خورشید مخمل باف ہے

نقد دل دوجے کوں دینا تجھ بغیر

حق شناسوں کے نزک اسراف ہے

کیا کروں تفسیر غم، ہر اشک چشم

راز کے قرآن کا کشاف ہے

مست جام عشق کوں کچھ غم نہیں

خاطر ناصح اگر نا صاف ہے

وسوسے سوں دل کو مت کر زر قلب

سینہ صافوں کی نظر صراف ہے

جب سوں وو آتا ہے ہمراہ رقیب

دردمنداں کا مکاں اعراف ہے

رحم کرتا نئیں ہمارے حال پر

شوخ ہے سرکش ہے بے انصاف ہے

اے ولیؔ تعریف اس کی کیا کروں

ہر طرح مستغنی الاوصاف ہے

372

ہرچند کہ اس آہوے وحشی میں بھڑک ہے

بے تاب کے دل لینے کوں لیکن ندھڑک ہے

عشاق پہ تجھ چشم ستم گار کا پھرنا

تروار کی اوجھڑ ہے کَتّے کی سُڑک ہے

گرمی سوں تری طبع کی ڈرتے ہیں سیہ بخت

غصے سوں کڑکنا ترا بجلی کی کڑک ہے

تیری طرف انکھیاں کوں کہاں تاب کہ دیکھیں

سورج سوں زیادہ ترے جامے کی بھڑک ہے

کرنے کوں ولیؔ عاشق بے تاب کوں زخمی

وو ظالم بے رحم نپٹ ہی ندھڑک ہے

373

اے دوست تیری یاد میں دل کوں کمال ہے

نقش مراد آئینہ تیرا خیال ہے

ہے راستی سوں قد کوں ترے مرتبہ بلند

جنّت میں اس کے عشق سوں طوبیٰ نہال ہے

حاجت نہیں شمع کی اس انجمن منیں

جس انجمن میں شمع سجن کا جمال ہے

آ اے مہِ دو ہفتہ مرے پاس ایک روز

ہرآن تجھ فراق کی سینہ پہ سال ہے

ہم سایۂ بُتاں نے کیا قد مرا دوتا

اس مدعا پہ طرۂ خمدار دال ہے

زاہد کوں مثل دانۂ تسبیح ایک آن

کوچے ستی ریا کے نکلنا محال ہے

لازم ہے درس یار کی تحصیل رات دن

ہر مدرسے کے بیچ یہی قیل و قال ہے

جب سوں ترے خیال نے دل میں کیا گزر

بے تاب جیو مرے پر غضب وجد و حال ہے

اے عاشقاں کی عید تامل سوں کر نظر

تیری بھواں کی یاد میں تن جیوں ہلال ہے

صد برگ سو زبان ستی کہتا ہے یو بچن

غنچے کوں تجھ دہن سوں سدا انفعال ہے

روئے زمیں کا خال ہے زینت میں اے صنم

تیرا جو مثل نقش قدم پائمال ہے

تیری نَین کی یاد میں جن نے سفر کیا

اس کے سفر کی راہ نگاہ غزال ہے

بانگ بلند بات یہ کہتا ہوں اے سجن

کعبے میں تجھ جمال کے تل جیوں بلال ہے

خاموش گر رہا ہے ولیؔ تو عجب نہیں

غواّص کا ہمیشہ خموشی کمال ہے

374

حسن تیرا سُرج پہ فاضل ہے

مکھ ترا رشک بدر کامل ہے

حسن کے درس میں لیا جو سبق

مجھ نزک فاضل و مکمل ہے

رات دن تجھ جمال روشن سوں

فضل پروردگار شامل ہے

جس کوں تجھ حسن کی نئیں ہے خبر

بے گماں وو جہاں میں غافل ہے

زاد رہ دل سوں جو بغل میں لیا

عشق کے پنتھ میں وو عاقل ہے

عشق کے راہ کے مسافر کوں

ہر قدم تجھ گلی میں منزل ہے

اے ولیؔ طرز عشق آسان نئیں

آزمایا ہوں میں کہ مشکل ہے

375

نشّہ بخش عاشقاں وو ساقیِ گل فام ہے

جس کی انکھیاں کا تصوّر بے خودی کا جام ہے

کھولنا زلفاں کا کچھ درکار نئیں اے خوش نَین

یک نگاہ ناز تیری دوجہاں کا دام ہے

آفتاب آتا ہے محرم ہو کے تجھ کوچے طرف

صبح صادق اس کے بَر میں جامۂ احرام ہے

دل کوں جمعیت ہے جب جاتا ہوں دنبال صنم

آرسی کے ساتھ میں سیماب کوں آرام ہے

مت قدم رکھ اس طرف اے زاہد خلوت نشیں

غمزۂ خوں خوار ظالم دشمنِ اسلام ہے

جس صنم کی سرکشی کا جگ میں ہے صیت بلند

شکر حق وو کافر بدکیش میرا رام ہے

اے ولیؔ کیوں خشک مغزی کا نہیں کرتا علاج

یاد اُن انکھیاں کی تجھ کوں روغنِ بادام ہے

376

اس سرو خوش ادا کوں ہمارا سلام ہے

اُس یار بے وفا کوں ہمارا سلام ہے

لیتا نئیں سلام ہمارا حجاب سوں

اُس صاحب حیا کوں ہمارا سلام ہے

اُس باج دل میں میرے دوجا نئیں ہے مدّعا

اُس دل کے مدعا کوں ہمارا سلام ہے

ناز و ادا سوں دل کوں مرے مبتلا کیا

اُس نازنین پیا کوں ہمارا سلام ہے

آرام جان و دل ہے ولیؔ جس کا دیکھنا

اُس جان دل رُبا کو ہمارا سلام ہے

377

اس شاہ نو خطاں کو ہمارا سلام ہے

جس کے نگینِ لب کا دوعالم میں نام ہے

سرشار انبساط ہے اُس انجمن منیں

جس کوں خیال تیری انکھیاں کا مدام ہے

جس سرزمیں میں تیری بھواں کا بیاں کروں

خوبی ہلال چرخ کی وہاں ناتمام ہے

جب لگ ہے تجھ گلی میں رقیب سیاہ رو

تب لگ ہمارے حق میں ہر اک صبح شام ہے

تنہا نہ سبد عشق میں تھیر ہوا ولیؔ

یہ زلف حلقہ دار دوعالم کا دام ہے

378

ترا مجنوں ہوں صحرا کی قسم ہے

طلب میں ہوں تمنا کی قسم ہے

سراپا ناز ہے تو اے پری رو

مجھے تیرے سراپا کی قسم ہے

دیا حق حسن بالا دست تجکوں

مجھے تجھ سرو بالا کی قسم ہے

کیا تجھ زلف نے جگ کوں دِوانا

تری زلفاں کے سودا کی قسم ہے

دو رنگی ترک کر ہر اک سے مت مل

تجھے تجھ قدِّ رعنا کی قسم ہے

کیا تجھ عشق نے عالم کوں مجنوں

مجھے تجھ رشک لیلیٰ کی قسم ہے

ولیؔ مشتاق ہے تیری نگہ کا

مجھے تجھ چشم شہلا کی قسم ہے

379

صنم میرا نپٹ روشن بیاں ہے

برنگ شعلہ سر تا پا زباں ہے

نظر کرنے میں دل اس کا لیا ہوں

کمندِ گل، نگاہ بلبلاں ہے

بجا ہے گر وو سرو گلشنِ ناز

ہماری راستی پر مہرباں ہے

وفا کر حسن پر مغرور مت ہو

وفاداری بہار بے خزاں ہے

صنم مجھ دیدہ و دل میں گزر کر

ہوا ہے، باغ ہے، آب رواں ہے

ہوا تیر ملامت کا نشانہ

نظر میں جس کی وو ابرو کماں ہے

ولیؔ اس کی جفا سوں خوف مت کر

جفا کرنا وفا کا امتحاں ہے

380

یو تل زنگی و خط مشک ختن ہے

سخن مصری و لب کان یمن ہے

مجھ اوپر کھینچتے ہیں تیغ ہندی

ترے ابرو کہ چیں جن کا وطن ہے

ہوئی ہے دنگ تصویر فرنگ دیکھ

تری صورت کہ یہ رشک دمن ہے

دسے تیرے نَین میں کا نور ودیس

تری باتاں میں بنگالے کا فن ہے

ترے لب میں دِسے لعلِ بدخشاں

سخن تیرا ہر اک دُرِّ عدن ہے

تری یہ زلف ہے شام غریباں

جبیں تیری مجھے صبح وطن ہے

ولیؔ ایران و توراں میں ہے مشہور

اگرچہ شاعر ملک دکن ہے

381

عارفاں پر ہمیشہ روشن ہے

کہ فن عاشقی عجب فن ہے

کیوں نہ ہو مظہر تجلی یار

کہ دل صاف مثل درپن ہے

عشق بازاں ہیں تجھ گلی میں مقیم

بلبلاں کا مقام گلشن ہے

سفر عشق کیوں نہ ہو مشکل

غمزۂ چشم یار رہ زن ہے

بار مت دے رقیب کوں اے یار

دوستاں کا رقیب چشم سوزن ہے

مجکوں روشن دلاں نے دی ہے خبر

کہ سخن کا چراغ روشن ہے

گھیر رکھتا ہے دل کوں جامۂ تنگ

جگ منیں دور دور دامن ہے

عشق میں شمع رو کے جلتا ہوں

حال میرا سبھوں پہ روشن ہے

اے ولیؔ تیغ غم سوں خوف نہیں

خاکساری بدن پہ جوشن ہے

382

دشمن دیں کا دین دشمن ہے

راہزن کا چراغ رہزن ہے

ترش روئی ہے حسن اہلِ لباس

چین دامن کا زیب دامن ہے

پاک بازی میں دل کوں ہے عزّت

صافی درپن آب درپن ہے

باغ گل راستی کا ہے سرسبز

سرو گلشن میں حسن گلشن ہے

اے ولیؔ صاحب سخن کی زباں

بزم معنی میں شمع روشن ہے

383

شکار انداز دل وو من ہرن ہے

لقب جس شوخ کا جادو نَین ہے

ہوا ہے جو شہید لالہ رُویاں

برنگ داغ دل خونیں کفن ہے

نئیں درکار گل گشت چمن زار

بہار عاشقاں وو گل بدن ہے

کرے گی سنگ دل کے دل میں جا نقش

صدائے بے دلاں فرہاد فن ہے

بجا ہے اس کوں کہنا خسروِ وقت

نظر میں جس کو وو شیریں بچن ہے

ترا قد اے بہار گلشن ناز

مثال سرو زیب انجمن ہے

خودی سوں اولاً خالی ہو اے دل

ق

اگر اس شمع روشن کی لگن ہے

غلام و فدوئ درگاہ احمد

صدا اس کی زباں پر یو بچن ہے

ہوا جو خادم شاہ ولایت

ولیؔ ہے والی ملک سخن ہے

384

ترے لب پر جو خط عنبریں ہے

خط یاقوت سوں نقش نگیں ہے

چمن آرائے باغ خوش ادائی

نہال قد سرو گل جبیں ہے

کہو زاہد کوں جاوے اس گلی میں

اگر مشتاق فردوس بریں ہے

نہ آوے گی کدھی لکھنے میں ہرگز

مصوّر یو ادائے نازنیں ہے

ہمیشہ دیکھتی ہے تجھ کمر کوں

نگہ میری سدا باریک بیں ہے

مرے حق میں عنایت نامۂ یار

مثال شہپر روح الامیں ہے

کرے اک آن میں جگ کوں دِوانہ

نگہ تیری کہ جادو آفریں ہے

نہیں گل برگ گلشن میں اے لالن

ترے گل گوں کا یو دامان زیں ہے

سویدا کی نمط جاوے نہ ہرگز

خیال اس خال کا جو دل نشیں ہے

ولیؔ جن نے سنا میرے سخن کوں

زباں پر اس کی ذکر آفریں ہے

385

ہر اک سوں مل متواضع ہو سروری یہ ہے

سنبھال کشتیِ دل کوں قلندری یہ ہے

نکال خاطر فاتر سوں جام کا غم

صفا کر آئینۂ دل سکندری یہ ہے

تو جان بوجھ، آجانا ہوا سو میں بوجھا

کہ زندگی منیں مقصود زر گری یہ ہے

خیال یار کوں رکھ اپنے دل میں محکم کر

کہ عاشقاں کے نزک شیشہ و پری یہ ہے

بسا عزیز ہیں تجھ مکھ کے آفتاب پرست

تو جلوہ گر ہو کہ اب ذرہ پروری یہ ہے

ٹک اک نقاب اُچا کر اپس کا مکھ دکھلا

کہ دلبراں کے نزک حق دل بری یہ ہے

بسار دل سوں اپس کے تو یاد خاقانیؔ

ولیؔ کوں دیکھ کہ اب رشک انوریؔ یہ ہے

386

نکل اے دل رُبا گھر سوں کہ وقت بے حجابی ہے

چمن میں چل بہار نسترن ہے ماہتابی ہے

کسی کی بات سنتا نئیں کسی پر رحم کرتا نئیں

ہٹیلا ہے، ستمگر ہے، جفا جو ہے، شرابی ہے

گیا ہے جب سوں وو گل رو چمن میں مے کشی کرنے

ہر اک گل صورت ساغر ہر اک غنچہ گلابی ہے

گلی میں اُس ستم گر کی نہ جا اے دل، نہ جا اے دل

کہ جاں بازی میں آفت ہے، قیامت ہے، خرابی ہے

کسے طاقت ہے انکھیاں کھول کر دیکھے تری جانب

جھلک تجھ حسن روشن کی شعاع آفتابی ہے

تمھارے اُس سجن مدت سوں فدوی ہیں دعا گو ہیں

ہمن سوں بے حسابی بات کرنا بے حسابی ہے

وفاداری بہار گلشن خوبی ہے اے گل رو

نہ بوجھو سرسری ہرگز سخن میرا کتابی ہے

بہار عاشقی کوں تازہ کرنا اے گل رعنا

تلطّف ہے، مدارا ہے کرم ہے، بے عتابی ہے

ولیؔ پایا رباعی چار ابرو کے تصوّر میں

تخلّص چشم گریاں کا بجا ہے گر سحابیؔ ہے

387

مفلسی سب بہار کھوتی ہے

مرد کا اعتبار کھوتی ہے

کیوں کے حاصل ہو مجکو جمعیت

زلف تیری قرار کھوتی ہے

ہر سحر شوخ کی نگہ کی شراب

مجھ انکھاں کا خمار کھوتی ہے

کیوں کے ملنا صنم کا ترک کروں

دلبری اختیار کھوتی ہے

اے ولیؔ آب اُس پری رو کی

مجھ سِنے کا غبار کھوتی ہے

388

دل کوں تجھ باج بے قراری ہے

چشم کا کام اشک باری ہے

شب فرقت میں مونس و ہمدم

بے قراروں کوں آہ و زاری ہے

اے عزیزاں مجھے نہیں برداشت

سنگ دل کا فراق بھاری ہے

فیض سوں تجھ فراق کے ساجن

چشم گریاں کا کام جاری ہے

فوقیت لے گیا ہوں بلبل سوں

گرچہ منصب میں وو ہزاری ہے

عشق بازوں کے حق میں قاتل کی

ہر نگہ خنجر و کٹاری ہے

آتش ہجر لالہ رو سوں ولیؔ

داغ سینے میں یادگاری ہے

389

عشق بے تاب جاں گدازی ہے

حسن مشتاق دل نوازی ہے

اشک خونیں سوں جو کیا ہے وضو

مذہب عشق میں نمازی ہے

جو ہوا راز عشق سوں آگاہ

وو زمانے کا فخر رازی ہے

پاک بازاں سوں یوں ہوا مفہوم

عشق مضمون پاک بازی ہے

جاکے پہنچی ہے حد ظلمت کوں

بسکہ تجھ زلف میں درازی ہے

تجربے سوں ہوا مجھے ظاہر

ناز مفہوم بے نیازی ہے

اے ولیؔ عیش ظاہری کا سبب

جلوۂ شاہد مجازی ہے

390

کوچۂ یار عین کاسی ہے

جوگیِ دل وہاں کا باسی ہے

پی کے بیراگ کی اداسی سوں

دل پہ میرے سدا اُداسی ہے

اے صنم تجھ جبیں اُپر یہ خال

ہندوے ہردوار باسی ہے

زلف تیری ہے موج جمنا کی

تل نزک اس کے جیوں سناسی ہے

گھر ترا ہے یہ رشک دیولِ چیں

اس میں مدت سوں دل اُپاسی ہے

یہ سیہ زلف تجھ زنخداں پر

ناگنی جیوں کُنوے پہ پیاسی ہے

طاس خورشید غرق ہے جب سوں

بر میں تیرے لباس طاسی ہے

جس کی گفتار میں نئیں ہے مزا

سخن اس کا طعام باسی ہے

اے ولیؔ جو لباس تن پہ رکھا

عاشقاں کے نزک لباسی ہے

391

ترا مکھ مشرقی، حسن انوری، جلوہ جمالی ہے

نَین جامی، جبیں فردوسی، و ابرو ہلالی ہے

ریاضی فہم و گلشن طبع و دانا دل، علی فطرت

زباں تیری فصیحی و سخن تیرا زُلالی ہے

نگہ میں فیضی و قدسی سرشتِ طالب و شیدا

کمالِ بدر دل اہلی و انکھیاں سوں غزالی ہے

تو ہی ہے خسرو روشن ضمیر و صائب و شوکت

ترے ابرو یہ مجھ بیدل کوں طغرائے وصالی ہے

ولیؔ تجھ قد و ابرو کا ہوا ہے شوقی و مائل

تو ہر اک بیت عالی ہور ہر اک مصرع خیالی ہے

392

نہ پوچھو خود بخود اس شوخ میں صاحب کمالی ہے

نگاہ پاک بازاں حسن کے گلشن کا مالی ہے

نہ جانوں کیا بلا لاوے گی اُس کے کان سوں لگ کر

بلائے جان مشتاقاں کہ جس کا نانون بالی ہے

سدا اس مو کمر کا وصف آتا ہے زباں اوپر

عزیزاں طبع میں میری عجب نازک خیالی ہے

زباں پر قمریاں کی یہ سخن جاری ہے گلشن میں

کہ عشقِ سرو قد رکھتا ہے جس کی فکر عالی ہے

ہمیشہ جیوں صنوبر، راست بازاں وجد کرتے ہیں

مگر قدِ پری رو مصرع برجستہ حالی ہے

عیاں ہے شاہ بیتِ عبہری تجھ چشم جادو سوں

کرشمہ تجھ بھواں میں معنیِ بیت ہلالی ہے

کہا اس شکریں گفتار نے میرے سخن سن کر

کہ طوطی کی زباں اوپر عجب شیریں مقالی ہے

نہ جانوں کس پری رو کا گزر ہے آج مجلس میں

کہ حیرت سوں ہر اک گل رو مثال نقش قالی ہے

ولیؔ وو سرو قامت ہے بہار گلشن خوبی

نہ رہنا اس کی صحبت میں نپٹ بے اعتدالی ہے

393

باغِ ارم سوں بہتر موہن تری گلی ہے

ساکن تری گلی کا ہر آن میں ولیؔ ہے

تجھ عشق کی صدا سوں لبریز ہوں سراپا

ہر استخواں میں میری آواز بانسلی ہے

بولے ہیں اہل دل نے یہ بات تہہ دلی سوں

عارف کا دل بغل میں قرآن ہیکلی ہے

تجھ مکھ کے گرد یو خط باریک ہے ولیکن

انکھیاں کوں نور دینے جیوں قطعۂ جلی ہے

امید ہے کہ ہووے مجھ درد سر کا درماں

جامے کا رنگ تیرے اے شوخ صندلی ہے

یک بار دل جلے کوں ٹھہرا کدھی نہ دیکھا

تیری نگاہ ظالم مانند بیجلی ہے

آتا نہیں ہے تجھ بن اک آن خواب راحت

تکیہ مرے سرہانے ہر چند مخملی ہے

ہرگز ترے دہن میں نئیں رنگ و بو سخن کا

گویا دہن یہ تیرا تصویر کی کلی ہے

مجکوں کہا سجن نے لاؤں گا بندگی میں

زمرے میں شاعراں کے ہر چند تو ولیؔ ہے

394

قد میں تیرے وو خوش خرامی ہے

جس سوں تجھ ناز کی تمامی ہے

گرچہ سب خوب رو ہیں خوب دلے

سرو میرا سبھوں میں نامی ہے

ہر پلک تیری اے نگۂ بدمست

نشّہ بخشی میں شعر جامی ہے

آتش شوق زلف سوں تیری

دل عاشق کباب شامی ہے

سرو کوں باوجود آزادی

تجھ ستی دعوئ غلامی ہے

جو بندھا تجھ نگین لب سوں جانا

عشق بازاں کے حق میں خامی ہے

تب کا مشتاق جی ہے لکھمن سوں

کِشن سوں جب کہ رام رامی ہے

اے ولیؔ اس کے بیت ابرو ہیں

معنیِ نسخۂ حسامی ہے

395

گرچہ طناز یار جانی ہے

مایۂ عیش جاودانی ہے

یاد کرتی ہے خط کوں زلف صنم

کام ہندو کا بید خوانی ہے

تجھ سوں ہرگز جدا نہ ہوں اے جاں

جب تلک مجھ میں زندگانی ہے

آشنا نونہال سوں ہونا

ثمرۂ گلشنِ جوانی ہے

دل میں آیا ہے جب سوں سرو رواں

تب سوں مجھ شعر میں روانی ہے

اے سکندر نہ ڈھونڈ آب حیات

چشمۂ خضر خوش بیانی ہے

وقت مرنے کے بولتا ہے پتنگ

کہ محبت رفیق جانی ہے

گرچہ پابند لفظ ہوں لیکن

دل مرا عاشقِ معانی ہے

اے ولیؔ تیغ غم سوں خوف نئیں

خاکساری بدن پہ جوشن ہے

396

سدا ہم کوں خیال رنگ روے یار جانی ہے

ہمارے شیشۂ دل میں شرابِ ارغوانی ہے

زبانِ حال سوں کہتا ہے خضرِ سبزۂ نو خط

بیاں کرنا صنم کے لب کا آب زندگانی ہے

گیا ہے حسن کی شادی میں از بس بے تکلف ہو

سراپا عشق کے بر میں لباس زعفرانی ہے

تواضع کی توقع نونہالاں سوں نہ رکھ اے دل

کہ بے باکی و شوخی لازم وقت جوانی ہے

ہوا ہے شوق زلف مو کمر سوں جو سخن سرزد

ولیؔ وو شعر نازک موج دریائے معانی ہے

397

مو بہ مو میں تجھ غم سوں ضعف و ناتوانی ہے

ٹک کرم کرو ساجن، وقت مہربانی ہے

دیکھنے سوں خوباں کے منع مت کر اے زاہد

موسم بزرگی نئیں عالم جوانی ہے

جیو یاد کرتا ہے نو بہار کے خط کوں

رات دن برہمن کا کام بید خوانی ہے

کنج غم میں تنہا نئیں عاشق بلا انگیز

گر شب جدائی میں آہ یار جانی ہے

یک سخن ترے لب سوں اے مسیح روح افزا

حق میں جاں نثاروں کے آب زندگانی ہے

تجھ سوں ہم نشیں ہونا، اے گل بہار دل

وجہ شادمانی ہے، عیش جاودانی ہے

نام اس دو رنگے کا، کیوں نہ ہو گل رعنا

چیرہ ارغوانی ہے، جامہ زعفرانی ہے

جب سوں نو خط گل رو، جلوہ گر ہے گلشن میں

سبزہ کہربائی ہے، رنگ گل خزانی ہے

سادہ رو جہاں کے سب گوش رکھ کے سنتے ہیں

اے ولیؔ سخن تیرا، گوہر معانی ہے

398

تجھ کوں خوباں میں بادشاہی ہے

سَر اُپر سایۂ الٰہی ہے

باعثِ دل رُبائیِ عاشق

خوش نگاہوں میں خوش نگاہی ہے

کم نکلنے میں اس پری رو کے

عشق بازاں کی خیرخواہی ہے

جگ میں تیری بھواں کی شہرت سوں

کشتیِ عاشقاں تباہی ہے

قتل عشاق پر بندھیا ہے کمر

غمزۂ تیغ زن سپاہی ہے

شاہ خوباں کے رخ پہ سبزۂ خط

حسن کی فوج کی سیاہی ہے

کیوں نہ ہو عشق باز خسرو وقت

عشق کا داغ چتر شاہی ہے

نو خطاں کی طرف نہ جا زاہد

زہد و تقویٰ کا واں مناہی ہے

عشق بازاں میں ہے ولیؔ ثابت

طالبِ گل رخاں کماہی ہے

399

مت تصور کرو مجھ دل کوں کہ ہرجائی ہے

چمن حسن پری رو کا تماشائی ہے

گل رخا کیوں نہ کہیں تجکوں سکندر طالع

جلوہ گر بر میں ترے جامۂ دارائی ہے

یاد کرتا ہے سدا مصرع زنجیر جنوں

دل بے تاب کہ تجھ زلف کا سودائی ہے

چشم خونبار کوں رونے سوں نئیں ہرگز غم

خط شب رنگ ترا سرمۂ بینائی ہے

دیکھ کر اس کوں ہوئے سرو و صنوبر پابند

اس قدر قد میں ترے جلوۂ رعنائی ہے

شیخ مت گھر سوں نکل آج توں خوباں کے حضور

گول دستار تری باعث رسوائی ہے

اے ولیؔ رہنے کوں دنیا میں مقام عیش

کوچۂ یار ہے یا گوشۂ تنہائی ہے

400

شکر وو جان گئی، پھر آئی

عیش کی آن گئی پھر آئی

تیرے آنے ستی اے راحت جاں

شہر کی جان گئی پھر آئی

پھر کے آنا ترا ہے باعث شوق

جس طرح تان گئی پھر آئی

تیرے آنے ستی اے مایۂ حسن

عشق کی شان گئی پھر آئی

اے ولیؔ قند مکرر ہے یو بات

شکر، وو جاں گئی پھر آئی

401

ترا مکھ ہے چراغ دل رُبائی

عیاں ہے اس میں نور آشنائی

لکھا ہے تجھ قد اوپر کاتب صنع

سراپا معنیِ نازک ادائی

تو ہے سر پاؤں لگ از بسکہ نازک

نگہ کرتی ہے تجھ پگ کوں حنائی

ہوا تیری نگہ کی بسکہ ہے مجھ

ہوا ہے دل مِرا تیر ہوائی

ثنا تیری کیا ہوں ورد از بس

بجا ہے گر کہیں مجھ کوں ثنائی

محبت میں تری اے گوہر پاک

ہوا ہے رنگ میرا کہربائی

تری انکھیاں کی مستی دیکھنے میں

گئی ہے پارسا کی پارسائی

ولیؔ ہنستی ہے ہر شب بزم میں شمع

پتنگ میں دیکھ کر عشقِ ریائی

402

سجن میں ہے شعار آشنائی

نہ ہو کیوں دل شکار آشنائی

صنم تیری مروت پر نظر کر

ہوا ہوں بے قرار آشنائی

نپٹ دشوار تھا مجھ دل میں اے جاں

زمانِ انتظار آشنائی

ہوا معلوم تجھ ملنے سوں لالن

کہ رنگیں ہے بہار آشنائی

حیا کے آب سوں باغ وفا میں

رواں ہے جوئبار آشنائی

وفا دشمن نہ ہو اے آشناور

وفا پر ہے مدار آشنائی

مروت کے ہمیشہ ہاتھ میں ہے

عنان اختیار آشنائی

مدارا ترک مت کر اے حیا دوست

مدارا ہے حصار آشنائی

ولیؔ اس واسطے گریاں ہوں ہر آن

کہ تر ہو سبزۂ زار آشنائی

403

تجھ مکھ کا رنگ دیکھ کنول جل میں جل گئے

تیری نگاہِ گرم سوں گَل گَل پگھل گئے

ہر اک کوں کاں ہے تاب جو دیکھے تری طرف

شیراں تری نگاہ کی دہشت سوں ٹل گئے

صافی ترے جمال کی کاں لگ بیاں کروں

جس پر قدم نگاہ کے اکثر پھسل گئے

مرنے ستی جو آگئے مُوئے اس جگت منیں

تصویر کی نمط وو خودی سوں نکل گئے

پائے ہیں جو کہ لذت دیں جگ میں اے ولیؔ

وو ہات اس دنیا منیں حسرت سوں مل گئے

404

اندوہ و غم کی بات ترے باج بن گئی

آواز میری آہ کی پھر تا گگن گئی

تا حشر اس کا ہوش میں آنا محال ہے

جس کی طرف صنم کی نگاہِ نین گئی

سُرمے کا منھ سیاہ کیا اُن نے جگ منیں

جس کی نیَن میں پیو کی خاک چرن گئی

تنہا سواد ہند میں شہرت نئیں صنم

تجھ زلف مشک بو کی خبر تا خُتن گئی

اب لگ ولیؔ پیا نے دکھایا نئیں درس

جیوں شمع انتظار میں ساری رَیَن گئی

****